AMOSA, 3 - Samoan Old Version Bible

O LE MATAUPU III.O le toasa o le Atua ma mea na ala mai ai.

1Le fanauga a Isaraelu e, ia outou faalogologo mai i lenei upu, o loo fetalai mai ai Ieova ia te outou, atoa ma le aiga uma na ou aveina ae ai le nuu o Aikupito; o loo faapea mai,

2Ua na o outou lava ua ou iloa i aiga uma o le lalolagi; o le mea lea ou te faasalaina ai outou ona o a outou agasala uma.

3E feoai faatasi ea se toalua, pe a le loto gatasi i laua?

4E tagi ea le leona i le vao, pe a leai se mea ua na saeia? E lagona atu ea le leo o le tamai leona ai lona lua, pe afai ua na le maua se mea?

5E lavea ea le manu lele i le mailei i le laueleele, a ua leai se mailei mo ia? E avae ea le mailei ai le laueleele, a ua le maua se mea?

6E ilia ea le pu i le aai, a e le atuatuvale ai tagata? E tupu ea se malaia i le aai, a e le faia e Ieova?

7E le faia lava se mea e le Alii o Ieova, a e faaalia lona finagalo i ana auauna o perofeta.

8Ua tagi le leona, po o ai se le fefe? ua fetalai mai le Alii o Ieova, po o ai se le vavalo?

9Ia outou tala‘iina atu i maota o Asetota, ma maota i le nuu o Aikupito, ma ia outou faapea atu, Ia outou faapotopoto mai i mauga o Samaria, ma vaavaai atu ai i vāvāō tetele o i ai, atoa ma sauaga o i ai.

10Auā o loo fetalai mai Ieova, Latou te le iloa ona fai mea tonu, o e faaputu i o latou maota o mea e maua i le saua ma le vete.

11O le mea lea o loo faapea mai ai le Alii o Ieova, O le ua ita mai e fealuai o ia i le nuu; e aveesea foi e ia lou malosi ai ia te oe, e vetea ou maota.

12O loo faapea mai Ieova, Faapei ona fao e le leoleo mamoe o alaga e lua, po o se fasi taliga i le gutu o le leona, e faapea ona laveaiina o le fanauga a Isaraelu o e nonofo i Samaria, i le pito moega, ma Tamaseko foi i le moega.

13Ia outou faalogologo, ma faailo atu i le aiga o Iakopo, o loo faapea mai le Alii o Ieova, o le Atua o ‘au.

14O le aso ou te taui atu ai agasala a Isaraelu ia te ia, ou te asiasi foi i fata faitaulaga i Peteli; e vavaeeseina foi nifo o fata faitaulaga, ona pauu ai lea i le eleele.

15Ou te taia le fale o le tausaga maalili, atoa ma le fale o le tausaga vevela; e faaumatia fale nifo elefane, e mavae atu foi o fale tetele, o loo fetalai mai ai Ieova.