1Faauta, ou te tuuina atu la‘u sāvali, na te sauni le ala i o‘u luma; e faafuasei foi ona oo mai i lona malumalu o le Alii, o le ua sailia e outou, o le Agelu lava lea o le feagaiga, o le ua outou naunau i ai; faauta, e afio mai lava o ia, ua fetalai mai ai Ieova o ‘au.
2A o ai se na te lavā tali le aso o lona afio mai? o ai foi se na te tulai pe a faaalia mai o ia? auā o ia e tusa ma le afi a lē tunu auro; e tusa foi ma le moli a lē tāofu;
3e nofo o ia, o lē tunu ma faamamā i le ario; na te faamamāina le fanauga a Levi, na te faate‘a ese foi le eleele ia te i latou e pei o le auro ma le ario; latou te avatu ai ia Ieova le taulaga e fai i le amiotonu.
4Ona mālie ai lea ia Ieova o le taulaga a Iuta ma Ierusalema, e pei o aso o le vavau, e pei o tausaga anamua.
5Ou te faalatalata foi ia te outou i le faamasinoga; e vave foi ona fai o a‘u ma molimau i e fai togafiti faataulāitu, ma ē mulilulua, ma ē tauto pepelo, ma ē faasaua i le taui o le auauna tauia, o le fafine ua oti lana tane, ma le ua mātuaoti, atoa ma ē faapioina le faamasinoga o le tagata ese; ua latou le matatau foi ia te au, ua fetalai mai ai Ieova o ‘au.
6Auā o a‘u o Ieova, ou te le liliu; o le mea lea ua le faaumatia ai outou le fanauga a Iakopo.
7Talu mai aso o outou tamā, ua outou tete‘a ese ai i a‘u tulafono, ma outou le tausiusi i ai. Foi mai ia ia te au, ona ou foi atu lea ia te outou, ua fetalai mai ai Ieova o ‘au. A ua outou fai mai, Matou te foi atu ma ni a?
8Pe faoa e le tagata mea a le Atua? a o outou, ua outou faoa a‘u mea. A ua outou fai mai, Ni a ea au mea ua matou faoa? Ua outou faoa mea e sefulu a‘i a outou mea, atoa ma taulaga.
9Ua matuā faafanoina outou, o le nuu uma lava, auā ua outou faoa a‘u mea.
10Ina aumaia mea e sefulu a‘i a outou mea uma lava i le fale e tuu ai mea; ina ia i ai mea e ‘ai i lo‘u fale; ma ia outou tofotofo mai ai ia te au i lenei mea, ua fetalai mai ai Ieova o ‘au; pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.
11Ou te aoai atu, ona o outou, le na te ‘aina mea; na te le faaumatia le fua o lo outou laueleele; e fua mai foi le vine i o outou fanua, ua fetalai mai ai Ieova o ‘au.
12E faaamuia foi ia te outou e nuu uma lava; auā e fai outou ma nuu e moomia, ua fetalai mai ai Ieova o ‘au.
13Ua mamafa a outou upu ia te au, ua fetalai mai ai Ieova; a ua outou fai mai, Se a sa matou upu ua fai atu ai ia te oe?
14Ua outou fai ane, E le aoga ona auauna i le Atua; se a foi se mea ua maua ina ua tatou tausiusi i ana sauniga, ma tatou feoai ma ofu eleelea i luma o Ieova o ‘au?
15O lenei, ua tatou faaamuia i e faamaualuluga; ua atiina ae foi e ua fai amio leaga; ua latou tofotofo lava i le Atua, a e sao i latou.
16Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.
17E fai foi i latou ma‘u oloa tāua, ua fetalai mai ai Ieova o ‘au, i le aso ua ou tofia; ou te alofa foi ia te i latou, e pei ona alofa o le tagata i lona atalii ua auauna ia te ia.
18Ona outou toe iloa lea e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
