1Ua uma atu ana upu ia Saulo, ona pii mau lea o le loto o Ionatana i le loto o Tavita, ua alofa Ionatana ia te ia, pei ona alofa o ia ia te ia lava.
2Ua ave e Saulo ia te ia i lea aso, ua ia le mafai lava ina ia toe foi i le aiga o lona tamā.
3Ua osi e Ionatana le feagaiga ma Tavita, auā ua alofa ia te ia, pei ona alofa o ia ia te ia lava.
4Ua to ese foi e Ionatana lona ofu talaloa nai ia te ia, ua foai atu ai ia Tavita, ma lona ofu tino, atoa ma lana pelu, ma lana aufana, atoa ma lona fusi.
5Ua alu atu Tavita i mea uma ua auina ai o ia e Saulo, ua faautauta i lana amio; ua tofia foi o ia e Saulo e pule i ‘au; ua fiafia ia te ia le nuu uma, atoa ma auauna a Saulo.
6Ua o mai i latou ina ua foi mai Tavita nai le fasiga o le Filisitia, ona o atu ai lea o fafine mai aai uma o Isaraelu ua pepese, ma sisiva, e faafetaiai i le tupu o Saulo, ma topa, ma le olioli, ma ‘apa tagitagi.
7Ua lagi fetaliai fafine i a latou siva, ua fai ane, Ua fasia e Saulo aua toaafe, a o Tavita ana sefulu o afe.
8Ua ita tele ai Saulo, ua leaga ia te ia ia upu; ua fai ane, Ua latou tuu atu ia Tavita o sefulu o afe, a o a‘u ua tuu mai ia te au na o afe; ua toe lava ona ave ia te ia o le malo.
9Na afua mai i lea lava aso ona lamalama o Saulo ia Tavita.
10Ua oo i le taeao, ona osofia ai lea o Saulo e le agaga leaga mai le Atua, ua perofeta ane ai o ia i lona fale; a o Tavita, na ta e ia i le kitara i lona lima, pei ona fai i lea aso ma lea aso; sa i ai le tao i le lima o Saulo.
11Ua velo le tao e Saulo, ua fai ane, Ou te fasi ia Tavita ia tuilua ma le pa o le fale; a ua ‘alo faalua Tavita i ona luma.
12Ua mata‘u Saulo ia Tavita, auā sa ia te ia Ieova, a ua te‘a ma Saulo.
13Ona auina atu ai lea o ia e Saulo ia alu ese ia te ia, ma na tofia o ia e fai ma alii o le toaafe; ua alu atu o ia ma toe sau i luma o le nuu.
14Sa faautauta foi Tavita i lana amio uma; sa ia te ia foi o Ieova.
15Ua vaai Saulo ua matuā faautauta o ia, ona fefe ai lea o ia ia te ia.
16A ua alolofa Isaraelu uma atoa ma Iuta ia Tavita, auā na alu atu o ia ma toe sau i o latou luma.
17Ua fai mai Saulo ia Tavita, Faauta, o lo‘u afafine matua, o Merapa, ou te avatu o ia ia te oe e fai mau avā, tau lava ina ia e fitafita mo a‘u, e tau ai i taua o Ieova; auā ua faapea Saulo, Aua ne‘i oo lo‘u lima ia te ia, a ia oo i ai lima o Filisitia.
18Ua fai atu Tavita ia Saulo, O ai ea a‘u nei? O le a foi lo‘u ola, ma le aiga o lo‘u tamā i Isaraelu, ina ia ou fai avā i le afafine o le tupu?
19Ua oo i ona po a avane ai Merapa le afafine o Saulo ia Tavita, a ua avatu o ia ia Atarielu le Meola e fai mana avā.
20Ua manamea Mekala le afafine o Saulo ia Tavita; ua ta‘u atu ai ia Saulo, ua tatau lava lea mea ia te ia.
21Ua fai ane Saulo, Ou te avatu o ia ia te ia e fai ma mailei ia te ia, ia oo ai lima o Filisitia ia te ia. Ua fai mai Saulo ia Tavita, O le tasi o i laua tā te aiga ai i le asō.
22Ua fai atu Saulo i ana auauna, latou te tautala lemu atu ia Tavita, o loo faapea, Faauta, a loo fiafia le tupu ia te oe, ua alolofa foi ana auauna uma ia te oe; o lenei, ia e fai avā i le afafine o le tupu.
23Ua tautala atu auauna a Saulo i nei upu i taliga o Tavita; ona fai mai lea o Tavita, O se mea faatavaa ea i lo outou manatu ona fai avā i le afafine o le tupu, o a‘u foi o le tagata mativa ma le faatauvaa?
24Ona ta‘u atu ai lea o auauna a Saulo ia te ia, ua faapea, O upu faapenei ua fai mai ai Tavita.
25Ua fai mai Saulo, Ia faapea ona outou fai atu ia Tavita, E le manao le tupu i se faatau, na o muāpa‘u o Filisitia e selau, ina ia taui atu i fili o le tupu; a o le manatu o Saulo ia oti ai Tavita i lima o Filisitia.
26Ua ta‘u mai ana auauna i nei upu ia Tavita; ona tatau lava lea o le upu ia Tavita, ia fai avā o ia i le afafine o le tupu. Ua le atoa foi ona aso;
27ona tulai lea o Tavita, ua alu atu o ia atoa ma ona tagata; ua fasia tagata o Filisitia e lua selau, ua au mai e Tavita o latou muāpa‘u, ua faaatoa mai i le tupu ina ia fai avā o ia i le afafine o le tupu. Ona au mai lea e Saulo o lona afafine o Mekala ia te ia e fai mana avā.
28Ua vaai Saulo, ma ua iloa, ua i ai Ieova ia Tavita; o Mekala foi le afafine o Saulo ua fiafia o ia ia te ia.
29Ua atili ai ona toe fefe o Saulo ia Tavita; ua fai Tavita ma fili o Saulo i aso uma.
30Na o atu alii o Filisitia; o aso uma na o atu ai i latou, ua sili le faautauta o Tavita i auauna uma a Saulo. Ua matuā viia lona igoa.
Who We AreWhat We EelieveWhat We Do
2025 by iamachristian.org,Inc All rights reserved.
