1Ona oo ai lea o le fanauga a Isaraelu, o le faapotopotoga uma, i le vao o Tisina, i le masina muamua; ona nonofo ai lea o le nuu i Katesa; ua oti ai foi Miriama, ma ua tanu ai i lea mea.
2E leai foi ni vai mo le faapotopotoga; ona latou faapotopoto mai ai lea e finau ia Mose ma Arona.
3Ona finau mai lea o le nuu ia Mose, ma latou fai mai ua faapea mai, E lelei pe ana matou oti ina ua oti o matou uso i luma o Ieova.
4Se a ea le mea ua oulua au mai ai le faapotopotoga a Ieova i lenei vao, ina ia oti ai o i matou, atoa foi ma a matou manu?
5Se a foi le mea na oulua aveina ae ai i matou nai Aikupito, e faaoo ia te i matou i lenei mea leaga? E le se mea o iai ni fua, po o mati, po o vine, po o rimoni; e leai foi ni vai e inu ai.
6Ona o ai lea o Mose ma Arona nai luma o le faapotopotoga i le faitotoa o le fale fetafai o le faapotopotoga; ona la faapauu faō ai lea; ona faaali mai ai lea o le pupula o Ieova ia te i laua.
7Ona fetalai mai lea o Ieova ia Mose, ua faapea mai,
8Ia e ave le tootoo, ma ia e aofai mai le faapotopotoga, o oe ma Arona lou uso, ma ia oulua tautala atu i le papa i o latou luma, ona foaiina mai ai lea e ia o lona vai; e te faatafe mai foi le vai ia te i latou ai le papa, e te faainua foi le faapotopotoga, atoa ma a latou manu.
9Ona ave ai lea e Mose o le tootoo ai luma o Ieova, e pei ona poloai mai ai o ia ia te ia.
10Ona aofai lea e Mose ma Arona o le faapotopotoga i luma o le papa, ona fai atu ai lea o ia ia te i latou, Ina faalogologo mai ia o outou e ua fouvale; ma te faatafeina mai ea le vai ai lenei papa mo outou?
11Ona sii ai lea e Mose o lona lima, ma ta faalua atu i le papa i lona tootoo; ona tafe tele mai ai lea o le vai, ona feinu ai lea o le faapotopotoga ma a latou manu.
12Ona fetalai mai ai lea o Ieova ia Mose ma Arona, Na oulua le faatuatua ia te au, ia faapaiaina ai a‘u i luma o le fanauga a Isaraelu, o le mea lava lea lua te le faaootia ai lenei faapotopotoga i le nuu ua ou foaiina ia te i latou.
13O le vai lenei o Meripa, auā na finau le fanauga a Isaraelu ia Ieova, na faapaiaina foi o ia i o latou luma.
14Ua tuu le savali e Mose ai Katesa i le tupu o Etoma e fai atu i ai, O loo faapea mai lou uso o Isaraelu, Ua e silafia le tiga uma lava ua oo ia te i matou.
15Na o ifo o matou tamā i Aikupito, e tele foi po na matou nonofo ai i Aikupito; a ua agaleaga mai Aikupito ia te i matou, atoa ma o matou tamā.
16Ona matou alalaga ai lea ia Ieova, na faafofogaina foi e ia o matou leo, na auina mai foi e ia le agelu, ma ua aumaia i matou ai Aikupito; faauta foi, o loo i Katesa i matou, o le aai lea e tupito lava i le tuaoi o lou nuu.
17Matou te aioi atu ia te oe, ia matou ui atu i lou nuu; matou te le ui ane i fanua, po o tovine, matou te le feinu foi i vaieli; o le ala tele o le tupu matou te ui atu ai; matou te le afe ane i le itu taumatau po o le itu tauagavale, seia matou tuanai atu le tuaoi o lou nuu.
18A ua tali mai Etoma ia te ia, E te le ui lava i lo‘u nuu, ne‘i ou alu atu e tetee ia te oe i le pelu.
19Ona fai atu ai lea o le fanauga a Isaraelu ia te ia, O le ala tele matou te ui atu ai; afai foi matou te feinu i ni ou vai, o a‘u nei ma a‘u manu, ona ou avatu ai lea o sona taui; e leai se tasi mea ou te faia, na ona ui atu lava o‘u vae.
20Ona tali mai ai lea o ia, E te le ui mai lava. Ona o atu ai lea o Etoma ma tagata e toatele e tetee ia te ia ma le lima malosi.
21Ua le mafai lava ia Etoma ona ui atu o Isaraelu i lona nuu; ona ‘alo ese ai lea o Isaraelu ia te ia.
22Ona o ese lea i Katesa o le fanauga a Isaraelu, o le faapotopotoga uma, ua oo atu i le mauga o Horo.
23Ua fetalai mai foi Ieova ia Mose ma Arona i le mauga o Horo, i le tuaoi o le nuu o Etoma, ua faapea mai,
24E faatasiina atu Arona i lona nuu; auā na te le oo atu lava i le nuu na ou foaiina atu i le fanauga a Isaraelu, auā ua oulua fouvale i la‘u upu, i le vai o Meripa.
25Ia e ave ia Arona ma Eleasaro lona atalii, ma ia outou o ae ma i laua i le mauga o Horo;
26i le e to ese ai ofu o Arona, ma faaofuina ai e Eleasaro lona atalii; ona faatasiina atu lea o Arona i lona nuu, e oti lava o ia i lea mea.
27Ona faia lava lea e Mose e pei ona poloai mai ai o Ieova; ua latou o ae i le mauga o Horo i luma o le faapotopotoga uma.
28Ona to ese ai lea e Mose o ofu o Arona, ma na faaofuina ai Eleasaro lona atalii; ona oti ai lea o Arona i lea mea i le tumutumu mauga; ona o ifo lea o Mose ma Eleasaro i le mauga.
29Ua iloa e le faapotopotoga uma ua oti Arona, ona fetagisi ai lea o le aiga uma lava o Isaraelu ona o Arona i aso e tolugafulu.
Who We AreWhat We EelieveWhat We Do
2025 by iamachristian.org,Inc All rights reserved.
