1Ua faapotopotoina e Peniata le tupu o Suria o ana au uma; sa ia te ia o tupu e tolugafulu ma le lua, ma ‘au e tietie i solofanua, ma kariota; ua alu ae o ia, ma vagaia Samaria, ma tau ai le taua.
2Ua auina mai e ia le sāvali i le aai ia Aapo le tupu o Isaraelu,
3ua faapea mai ia te ia, O loo faapea ona fai mai o Peniata, O lau ario ma lau auro, o a‘u ia; o au avā foi, ma au fanau, o e ua sili ona lelei, o a‘u ia.
4Ona tali atu lea o le tupu o Isaraelu, ua faapea atu, Le alii e, le tupu, o a‘u nei, ma a‘u mea uma o au ia, e pei ona e fetalai mai ai.
5Ua toe foi mai le sāvali, ma latou fai mai, O loo faapea ona fetalai mai o Peniata, ua faapea mai, E ui lava ina alu atu la‘u feau ia te oe, ua faapea, Ia e au mai ma‘u au ario, ma au auro, ma au avā, ma au fanau;
6a o le itu la faapenei taeao, ou te aauina atu ai a‘u auauna ia te oe, ina ia latou suesue i lou fale, ma fale o au auauna; o mea uma foi ua e fiafia i ai, latou te tago i o latou lima, ma latou avea.
7Ona tala‘i lea e le tupu o Isaraelu o toeaina uma o le nuu, ma fai atu, Faauta mai ia, ma ia outou iloa, o loo sailiili lenei tagata i se mea leaga; auā na aauina mai e ia nisi ia te au e ave i a‘u avā, ma a‘u fanau, ma a‘u ario, ma a‘u auro; ua ou le faafiti atu foi ia te ia.
8Ona fai mai lea ia te ia o toeaina uma, ma le nuu uma, Aua e te faafofoga, pe usiusitai ia te ia.
9Ona fai atu lea o ia i le sāvali a Peniata, Ia outou faapea atu i lo‘u alii le tupu, O mea uma na e muai fetalai mai ai i lau auauna ou te faia; a o lenei mea ou te le mafaia. Ona ō lea o le sāvali, ma latou ave le upu ia te ia.
10Ona aauina mai lea nisi e Peniata ia te ia, ua ia fai mai, Ia faapea ona fai e atua ia te au, ma ia faaopoopo i ai, pe afai e lava le efuefu o Samaria ia tofu ai ma luutaga i le nuu uma o e mulimuli ia te au.
11Ona tali atu lea o le tupu o Isaraelu, ua faapea atu, Ina fai atu ia ia te ia, Aua le mitamita le ua fusi ia te ia i le ofu tau, e pei o le na te tatalaina.
12Ua faalogo Peniata i lena upu, a o feinu o ia ma tupu i fale apitaga; ona fai atu lea o ia i ana auauna, Ina totofi ia le taua. Ona latou tofia lea o le taua i le aai.
13Faauta, na sau le tasi perofeta ia Aapo le tupu o Isaraelu, ua fai mai, O loo faapea ona fetalai mai o Ieova, Ua e iloa atu ea lena vao tagata uma e toatele? Faauta, ou te tuuina atu i latou i lou lima i le aso nei; ona e iloa ai lea o a‘u o Ieova.
14Ona fai atu lea o Aapo, E faia ea e ai? Ona fai mai lea o ia, O loo faapea ona fetalai mai o Ieova, O taulelea o i alii e pule i itu. Ona fai atu lea o ia, O ai ea na te amataina le taua? Ona fai mai ai lea o ia, O oe lava.
15Ona faitau lea e ia o taulelea o i alii e pule i itu; e lua selau ma le tolu sefulu ma le toalua; e mulimuli ane ia te i latou na faitau e ia o le nuu uma, o le fanauga uma a Isaraelu e fitu gaafe.
16Ona o atu lea o i latou i le tutonu o le la. A o Peniata ma tupu, o tupu e toatolugafulu ma le toalua o e fesoasoani ia te ia, sa latou feinu ia onā i fale apitaga.
17Ua muamua atu taulelea o i alii e pule i itu. Ona aauina atu lea e Peniata nisi, ona latou ta‘u mai lea ia te ia, ua faapea mai, Ua o mai tagata mai Samaria.
18Ona fai atu lea o ia, Pe afai o le filemu ua latou o mai ai, ia outou pupue ola ia te i latou; pe afai foi o le taua ua latou o mai ai, ia outou pupue ola ia te i latou.
19Ua o atu i tua o le aai ia taulelea o i alii e pule i itu, ma ‘au na mulimuli ia te i latou.
20Ua latou taitasi ma fasioti i lana tagata; ona sosola lea o Suria; ua piituli Isaraelu ia te i latou. Ua sao Peniata le tupu o Suria i le solofanua, faatasi ma e tietie i solofanua.
21Ua alu atu le tupu o Isaraelu, ma fasia solofanua ma kariota; ua ia fasiotia foi Suria i le fasi tele.
22Ona sau lea o le perofeta i le tupu o Isaraelu, ua faapea atu ia te ia, Ina maliu atu ia oe, ma e faamalosi, ma e faautauta, ma ia e silafia mea e te faia; auā pe a toe oo i le tausaga, ona sau ai lea o le tupu o Suria e tau ma oe.
23Ua fai atu auauna a le tupu o Suria ia te ia, O atua o mauga o latou atua, o le mea lea na manumalo ai i latou ia te i tatou; a ia tatou tau ma i latou i se mea laugatasi, ai lava tatou te manumalo ai ia te i latou.
24Ia e faia lenei mea, ia e faateaina tupu taitasi i lona tofi, ma e tofia o e avea ‘au e sui a‘i i latou.
25Ia e faitauina foi mo oe o ‘au e tusa ma ‘au na faaumatia sa ia te oe; ia suia le solofanua i le solofanua, ma le kariota i le kariota; ona tatou tau ai lea ma i latou i se mea laugatasi, ai lava tatou te manumalo ai ia te i latou. Ua faalogo o ia i a latou upu, ma fai i ai.
26Ua toe oo i le tausaga, ona faitaulia lea e Peniata o Suria, ua alu ae i Afeka e tau ma Isaraelu.
27Ua faitaulia foi le fanauga a Isaraelu, ma ua latou sauniuni uma lava; ona latou o lea e faafetaiai ia te i latou. Ua to lauapi le fanauga a Isaraelu ua faafeagai ma i latou, e pei o lafu ‘oti itiiti e lua; a ua tumu le nuu ia Suria.
28Ona sau lea o le tagata o le Atua, ma fai mai i le tupu o Isaraelu, ua faapea mai, O loo faapea ona fetalai mai o Ieova, Ua faapea mai Suria, O le Atua o mauga Ieova, a e le o le Atua o vanu; o le mea lea ou te tuuina atu ai o lena vao tagata uma e toatele i lou lima; ona outou iloa lava lea, o a‘u lava o Ieova.
29E fitu po ua latou to lauapi e faafeagai ai. Ua oo i le aso fitu, ona latou tau ai lea o le taua; ona fasiotia lea e le fanauga a Isaraelu o Suria e selau afe o ‘au e savavali, i le aso e tasi.
30O e na totoe ua sosola i latou i Afeka, i le aai; ua solo i lalo le pa i luga o tagata e luafulu o afe ma afe e fitu o e na totoe. Ua sola Peniata, ua oo i le aai, i le afeafe tuloto.
31Ona fai atu lea o ana auauna ia te ia, Faauta mai ia, ua matou faalogo, o tupu o le aiga o Isaraelu, o tupu alolofa i latou; se‘i matou lavalava i ie talatala i o matou sulugātiti, ma maea i o matou ulu, matou te o atu foi i le tupu o Isaraelu; atonu na te faasoifua ia te oe.
32Ona latou fusi lea o ie talatala i o latou sulugātiti, ma maea i o latou ulu, ma latou o atu i le tupu o Isaraelu, ma latou fai atu, O loo fai mai lau auauna o Peniata, Se‘i e faaola mai ia te au. Ona fai mai lea o ia, Ua soifua pea ea ia? O lo‘u uso ia.
33Ua faanaunau atu le nuu i se upu mai ia te ia, ma latou vave taofi i ai; ona latou fai atu lea, O lou uso o Peniata. Ona fai mai lea o ia, Ina o ia, ma au mai ia te ia. Ona sau ai lea o Peniata; ua talia foi o ia e ia i lona kariota.
34Ona fai mai lea o Peniata ia te ia, O aai na faoa e lo‘u tamā nai lou tamā ou te toe avatua; e te fai foi ni ala i Tamaseko mo oe, e pei ona faia e lo‘u tamā i Samaria. Ona fai atu lea o Aapo, Ou te tuu atu ia te oe e alu ma la ta feagaiga nei. Ona la faia lea o le feagaiga ma ia; ona ia tuu atu lea ia te ia e alu.
35O le tasi soo o le au perofeta na fai atu o ia i le afioga a Ieova i le tasi tagata. Ia e ta mai ia te au. A ua le mafai le tagata ona ta ia te ia.
36Ona fai atu lea o ia ia te ia, Ua e le faalogo i le afioga a Ieova, faauta mai, o le mea lea a ē alu ese ia te au e oti ai oe i le leona. Ua alu ia nai ia te ia, ona maua lea o ia e le leona, ua oti ai o ia.
37Ua iloa foi e ia le tasi tagata, ona ia fai atu lea ia te ia, Se‘i e ta mai ia te au. Ona ta atu lea o le tagata ia te ia, o lana ta foi na manua ai o ia.
38Ona alu lea o le perofeta, ua tu atu i le tupu i le ala; ua ia faauigaeseina o ia e ia i le fusi i ona mata.
39Ua alu ane le tupu, ona valaau atu lea o ia i le tupu, ua faapea atu, Na alu ane lau auauna i totonu o le taua; faauta, ua liliu mai le tasi tagata, ma ia au mai ia te au le tagata, ua fai mai, Ia e leoleo i lenei tagata; afai lava e le iloa o ia, ona suia lea o lona ola i lou ola, pe e te aumaia le taleni o ario.
40Na faia e lau auauna ana feau i lea mea ma lea mea, ona leai lea o ia. Ona fai atu lea o le tupu o Isaraelu ia te ia, E faapea lau sala, o oe lava ua e faatonuina.
41Ona ave ese loa lea o le fusi ai ona mata; ona iloa lea e le tupu o Isaraelu, o so le au perofeta o ia.
42Ona fai atu lea o ia ia te ia, O loo faapea ona fetalai mai o Ieova, Ua e tuu atu e alu le tagata na tofia e a‘u ia oti, o le mea lea e suia ai lona ola i lou ola, ma lona nuu i lou nuu.
43Ona alu atu lea o le tupu o Isaraelu i lona fale ua tiga ma ita; ua oo ia i Samaria.
Who We AreWhat We EelieveWhat We Do
2025 by iamachristian.org,Inc All rights reserved.
