1O naamanu le alii e pule i ‘au a le tupu o Suria, o le tagata aoga ia i lona alii, ma le ta‘ua lava, auā o ia na oo mai ai le manuia mai ia Ieova i Suria; o ia foi o le toa malosi, a o le lepela ia.
2Na o atu ‘au a Suria, na latou au mai foi mai le nuu o Isaraelu le tasi teine itiiti o le taua, ua fai ma auauna a le avā a Naamanu.
3Ua fai atu ia i lona matai tamaitai, Se anoa! A na iai lo‘u alii i le perofeta o i Samaria, po ua faateaina e ia lona lepela.
4Ona alu atu ai lea o le tasi, ua tala atu i lona alii, ua faapea atu, Sa faapea ma faapea upu a le teine mai le nuu o Isaraelu.
5Ona fai mai ai lea o le tupu o Suria, Sau ia, ina e alu, ou te avatu se tusi i le tupu o Isaraelu. Ona alu ai lea o ia, ua ave e ia taleni ario e sefulu, ma sekeli auro e ono gaafe, atoa ma ofu e sefulu.
6Ua avatu e ia le tusi i le tupu o Isaraelu, ua faapea le tusi, A oo atu lena tusi ia te oe e te silafia ai ua ou auina atu ia te oe o la‘u auauna o Naamanu, ina ia e faatea ia te ia lona lepela.
7Ua faitau e le tupu o Isaraelu le tusi, ona saei lea e ia ona ofu, ua faapea ane, O a‘u ea o le Atua e fasi oti ma faaola, ua auina mai ai e lena tagata ia te au e faatea se tagata i lona lepela? Ina manatunatu ia, ma ia outou iloa, ua saili e ia se mea e faalani ai se taua ia te au.
8A ua lagona e Elisaia le tagata o le Atua ua saei e le tupu o Isaraelu ona ofu, ona ave lea o le feau ia te ia, ua faapea atu, Se a ea le mea ua e saei ai ou ofu? Ia sau lava ia ia te au, ona iloa ai lea e ia o loo ia Isaraelu le perofeta.
9Ona sau ai lea o Naamanu ma ana solofanua ma lona nofoa faataavalevale, ua tu mai i le faitotoa o le fale o Elisaia.
10Ona auina atu lea e Elisaia o le auauna ia te ia, ua faapea atu, Ina alu ia, ina taele faafitu i Ioritana, ona toe foi mai ai lea o lou tino tuai ia te oe, ona e mamā ai lea.
11Ona ita lava lea o Naamanu, ma alu ese, ua faapea ane, Faauta, na ou faapea, e sau lava ia i fafo, ma tu mai, ma valaau i le suafa o Ieova lona Atua, ma tālo lona lima i le mea ua i ai le ma‘i e faatea ai i le lepela.
12E le sili ea ona lelei o Apana ma Farapa, o vaitafe ia o Tamaseko, i vai uma o Isaraelu? Ou te le taele ai ea, ma ou mamā ai? Ona liliu ai lea o ia, ua alu ma le ita tele?
13A ua faalatalata ane ana auauna, ua fai ane ia te ia, ua faapea ane, Sena e, ana fai atu e le perofeta se mea tele ia te oe, e te le faia ea? A o lenei, e te le faia ea ina ua ia fai atu ia te oe, E te taele, e te mamā ai?
14Ona alu ifo ai lea o ia, ua fufui faafitu i Ioritana, e tusa ma le upu a le tagata o le Atua, ona foi mai ai lea o lona tino tuai pei o le tino o le tama itiiti, ua mamā foi ia.
15Ona foi mai ai lea o ia i le tagata o le Atua, o ia ma i latou uma sa ia te ia, ua sau, ua tu mai i ona luma, ua faapea mai, Faauta mai, ua ou iloa nei e leai se atua i le lalolagi uma, ua na o i Isaraelu lava; o lenei foi, ia e talia se mea alofa a lau auauna.
16A ua fai atu ia, O loo soifua Ieova, o le ou te tu a‘u nei i ona luma, ou te le talia se mea. Ona tauanau mai lea o ia ia te ia ia na talia; a ua le mafai lava o ia.
17Ona fai mai ai lea o Naamanu, E le foaiina mai ea i lau auauna ni avega a eleele a ni falata se lua? Auā e le toe faia e lau auauna se taulaga mu po o se isi taulaga i atua ese, na o Ieova lava.
18A ia faamagalo mai e Ieova i lau auauna i lenei mea, pe a alu lo‘u alii i le fale o Rimoni e ifo ai, e totoo foi o ia i lo‘u lima, ou te ifo foi a‘u i le fale o Rimoni, pe a ou ifo i le fale o Rimoni, ia faamagalo e Ieova i lau auauna i lena mea.
19Ona fai atu ai lea o ia ia te ia, Ina maliu ia oe ma le manuia. Ona alu ai lea o ia, e lei faamamao foi.
20Ona faapea lea o Kiasi le auauna a Elisaia le tagata o le Atua, Faauta, ua tu‘itu‘i e lo‘u alii mea a lena Suria o Naamanu i lona le talia le mea ua na au mai; o loo soifua Ieova, ou te tuliloa ia te ia, ou te maua ai se mea ia te ia.
21Ona tuliloa lea o Kiasi ia Naamanu. Ua iloa mai foi e Naamanu o ia ua momo‘e atu ia te ia, ona alu ifo lea o ia i le nofoa faataavalevale e faafetaiai ia te ia, ua faapea mai, Pe se a le feau e te sau ai?
22Ona fai atu lea o ia, Ou te sau; ua auina mai a‘u e lo‘u alii e fai atu, Faauta, ua o mai nei lava ia te au o taulelea e toalua, o soo o le au perofeta, mai le mauga o Efaraima, se‘i avane mo i laua o le taleni ario e tasi, atoa ma ofu e lua.
23Ona fai mai lea o Naamanu, Ina usitai mai ia, ia e ave taleni e lua. Ua ia finau mai foi ia te ia, ua fafao taleni ario e lua i taga e lua, atoa ma ofu e lua, ua tuu atu i ana auauna e toalua, ua la avea, ua muamua i ona luma.
24Ua oo foi i le mauga, ona avea lea e ia o mea sa ia te i laua, ua tuu i le fale, ua na faafoi atu ia tagata, ona o ai lea o i laua.
25A ua ulufale atu o ia, ua tuu i luma o lona alii. Ona fai mai lea o Elisaia ia te ia, Kiasi e, na e ifea ea? Ona tali atu lea o ia, E lei alu lava lau auauna i se mea lava.
26Ona fai mai ai lea o ia ia te ia, Lua te lei o ea ma lo‘u loto, ina ua toe foi mai le tagata nai lona nofoa faataavalevale e faafetaiai ia te oe? O ona po nei ea e talia ai ario, ma talia ai ofu, ma toolive, ma tovine, ma mamoe, ma povi, ma auauna tane, ma auauna fafine?
27O le mea lea o le a pipii atu ai ia te oe ma au fanau le lepela o Naamanu i ‘au tupulaga. Ona alu ese ai lea o ia i ona luma, ua lepelā lava pei o le kiona.
Who We AreWhat We EelieveWhat We Do
2025 by iamachristian.org,Inc All rights reserved.
