1Ona soloai ane lea o Iosefatu lona atalii e fai ma tupu, ua faamalosia o ia e ia e tetee atu ia Isaraelu.
2Ua ia tofia foi ‘au i aai uma o Iuta ua nofo ‘olo ua ia tofia foi o leoleoga i le nuu o Iuta, ma aai o Efaraima na faoa e Asa lona tamā.
3Na i ai Ieova ia Iosefatu, auā ua ia savali i uluai ala o lona tamā o Tavita, na ia le saili atu ia Paala;
4a ua saili atu i le Atua o lona tamā, ma ua savali i ana poloaiga, a e lei pei o mea na faia e Isaraelu.
5Ona faatumauina ai lea e Ieova le malo i lona lima; ua au mai foi e Iuta uma o mea alofa ia Iosefatu; sa ia te ia le oloa ma le mamalu e tele.
6Ua faamalosia foi lona loto i ala o Ieova; ua aveeseina foi e ia o mea maualuluga ma tupua o Asaira i Iuta.
7O le tolu o tausaga o lana nofoaiga ua ia aauina atu ai alii ua ia te ia, o Peneaila, ma Opetaia, ma Sakaria, ma Natanielu, ma Mekaio, e a‘oa‘o atu i aai o Iuta.
8Ua faatasi ma i latou o sa Levī o Semaia, ma Netanaia, ma Sepatia, ma Asaelu, ma Semiramota, ma Ionatana, ma Atonia, ma Topaia, ma Topa-atonia, o sa Levī ia; ua faatasi foi ma i latou e Elisama ma Iorama, o faitaulaga.
9Ua latou a‘oa‘o atu i Iuta, sa ia te i latou foi le tusi o le tulafono a Ieova, ma ua latou faataamilo i aai uma o Iuta, ma ua a‘oa‘o atu i le nuu.
10Sa i ai le mata‘u ia Ieova i malo uma o nuu ua vagavagai ia Iuta, o le mea lea ua latou le sii mai ai se taua ai Iosefatu.
11Ua au mai ia Iosefatu e nisi Filisitia o mea alofa, ma ario o le taulaga; ua au mai foi ia te ia e tagata o Arapi o lafu, e fitu o afe ma le fitu o selau o mamoe poa, ma le fitu o afe ma le fitu o selau o ‘oti poa.
12Ua tuputupu tele ai lava le mamalu o Iosefatu; ma ua faia e ia i Iuta o ‘olo, ma aai e tuu ai oloa.
13Ua tele lava le galuega sa ia te ia i aai o iuta; sa i Ierusalema foi le ‘au tau, o toa malolosi.
14O le faitau lenei o i latou i aiga o latou tama; o e pule i ‘au e taitoaafe o sa Iutā; o Atana o le alii sili ia, ua ia te ia e tolu selau o afe o toa malolosi.
15E aupito ane ia te ia o Ioanana o le alii sili ia, ma ua ia te ia e lua selau o afe ma afe e valu sefulu o tagata.
16E aupito ane ia te ia o Amasia o le atalii o Sekari, o le ua ofo fua mai e tuuina atu o ia ia Ieova; ua ia te ia foi e lua selau o afe o toa malolosi.
17O lo sa Peniaminā foi, o Eliata, o le toa malosi, ua ia te ia foi o tagata e lua selau o afe ua i ai aufana ma talita.
18E aupito ane ia te ia o Iosapa, ua ia te ia foi o e o sauni i le taua e selau o afe ma afe e valu sefulu.
19Ua auauna i latou nei i le tupu, a e ese i latou na tofia e le tupu i aai nofo ‘olo i Iuta uma.
Who We AreWhat We EelieveWhat We Do
2025 by iamachristian.org,Inc All rights reserved.
