1U a ou faalogo atu i e na le fesili mai; ua maua a‘u e i latou na le saili mai ia te au; na ou fai atu i le nuu na le igoa i latou i lo‘u igoa, Faauta, o a‘u lenei!
2Ua ou faaloaloa atu o‘u lima i aso uma i le nuu finau vale, o e savavali i le ala e le lelei, e tusa ma o latou lava manatu;
3o le nuu e faaonoono mai pea lava ia te au i o‘u luma, o loo latou fai taulaga i faatoaga, ma latou faamu mea manogi i luga o maaomea;
4ua latou nonofo i tuugamau, ua atoa le po o i ai i latou i mea lilo; ua latou aai i tufaaga o puaa; o le sua foi o mea leaga ua i a latou ipu ia;
5o e fai ane, Alu ese oe; aua e te faalatalata mai ia te au, auā e sili ona paia o a‘u ia te oe. O i latou ia o le asu i lo‘u isu; o le afi e mu i aso uma.
6Faauta, ua tusia le upu i o‘u luma; ou te le faalologo, a e peitai ou te taui atu, ou te taui atu lava i o latou fatafata,
7o a outou amio leaga, faatasi ma le amio leaga a o outou tamā, ua fetalai mai ai Ieova, o i latou e na faamuina mea manogi i luga o mauga, ma latou faifaia a‘u i luga o mea maualuluga; ou te fuatia atu foi a latou amioga anamua i o latou fatafata.
8O loo faapea ona fetalai mai o Ieova, E pei ona maua o le suāvine i le fuifui vine, ona latou fai ane lea, Aua le faamaumauina, auā o loo i ai le manuia; e faapea ona ou faia ona o a‘u auauna, e le faamaumauina i latou uma.
9Ou te faatupuina foi le fanau ia Iakopo, mai ia Iuta foi le na te fai mona o‘u mauga; o e na filifilia e a‘u latou te fai ia mo latou; o a‘u auauna foi latou te nonofo ai.
10E faia Sarona ma lotoā o lafu mamoe, ma le vanu o Akori e faia lea ma mea e taooto ai lafu manu, mo lo‘u nuu e na saili mai ia te au.
11A o outou o e lafoai ia Ieova, ma faagalogalo i lo‘u mauga paia; o e laulau le ‘ai mo Kato, ma faatumu le taulaga i mea e inu mo Meni,
12ou te faitauina atu outou mo le pelu, tou te punonou uma lava ia fasia; auā na ou valaau, a ua outou le tali mai; na ou fai atu, a ua outou le faalogo mai; ua outou faia foi le mea ua leaga ia te au, ma outou filifilia le mea ou te le fiafia i ai;
13o le mea lea, o loo faapea ona fetalai mai ai o le Alii o Ieova, Faauta mai, e aai a‘u auauna, a o outou tou te fia aai; faauta, e feinu a‘u auauna, a o outou tou te fia inu; faauta, e olioli a‘u auauna, a o outou tou te mamā;
14faauta, e alalaga a‘u auauna ona o le loto fiafia, a o outou tou te faataio ona o le loto tiga, ma outou uio ona o le loto momomo.
15E tuu foi o outou igoa e fai a‘i fetuu a e ua filifilia e a‘u; e fasiotia foi outou e le Alii o Ieova; a e faaigoa e ia o ana auauna i se tasi igoa.
16O lē faamanuia o ia e ia i le nuu na te faamanuia o ia ia te ia i le Atua e faamaoni; ma le na te tauto i le nuu e tauto o ia i le Atua e faamaoni; auā ua galo muai puapuaga, auā foi ua lilo ia mea ia te au.
17Auā faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto.
18A e peitai ia outou olioli ma fiafia e faavavau i le mea ou te faia; auā faauta, ou te faia Ierusalema ma faafiafia, ou te faia foi lona nuu ma faaolioli.
19Ou te fiafia foi i Ierusalema, ma a‘u olioli i lo‘u nuu; e le toe lagona ai le leo o sē tagi, ma le leo o sē alaga.
20E le toe i ai i lea mea le tama meamea, po o le toeaina ua le atoatoa ona aso; auā e oti le taulealea ua selau ona tausaga; a o le ua agasala ua selau ona tausaga, e fetuuina o ia.
21Latou te faia fale, ma latou mau ai; latou te totō tovine, ma latou aai i o latou fua.
22Latou te le fai fale ina ia mau ai nisi; latou te le totō ina ia ‘ai ai nisi; auā e pei o aso o le laau aso o lo‘u nuu; e uma lava i e ua filifilia e a‘u o mea na faia e o latou lima.
23Latou te le galulue fua, latou te fananau, a e le tupu ai le atuatuvale; auā o le fanau ua faamanuia e Ieova i latou, atoa ma i latou e tutupu mai ia te i latou.
24A o lei valaau lava i latou, ou te tali atu; a o tautala mai i latou, ou te faalogo atu lava.
25E aai faatasi le luko ma le tamai mamoe, e ‘aina ‘au o saito e le leona e pei o le povi; a o le gata e fai mana mea e ‘ai le efuefu; latou te le faia se mea leaga, latou te le faaumatia foi se mea i lo‘u mauga paia uma lava, ua fetalai mai ai Ieova.
Who We AreWhat We EelieveWhat We Do
2025 by iamachristian.org,Inc All rights reserved.
