LEVITIKO 14 - Samoan Old Version Bible

O LE MATAUPU XIV.O mea e faia e le tagata lepela ua faamamāina.

1Ua fetalai mai Ieova ia Mose, ua faapea mai,

2O lenei le tulafono i le lepela i le aso o lona faamamāina, E aumaia o ia i le faitaulaga;

3ona alu atu ai lea o le faitaulaga i tua o le toagālauapi; e matamata atu ai le faitaulaga, faauta foi, ua malolo le ila lepela i le tagata lepela;

4ona fai atu ai lea e le faitaulaga ia aumaia mo le tagata o le a faamamāina nai manu ola e lua ua mamā, atoa ma le laau o le arasi, ma le ie mūmū, ma le isopo;

5ona fai atu ai lea o le faitaulaga ia fasi le tasi manu i se ipu omea i luga o le vaipuna;

6a o le manu ola, na te avatu ai ma le laau o le arasi, ma le ie mūmū, ma le isopo, ma fufui ai atoa ma le manu ola i le toto o le manu na fasia i luga o le vaipuna;

7na te sausauina atu ai faafitu o ia o le a faamamāina i le lepela, ona ia ta‘umamāina ai lea o ia, na te tuu atu foi le manu ola e alu i le vao.

8O ia foi o le a faamamāina na te taia ona ofu, ma tafi ona fulufulu uma lava, ma taele i le vai ina ia mamā ai o ia; e mulimuli ane ona alu ane ai lea o ia i le toagālauapi, a e nofo i fafo o lona fale ie i aso e fitu;

9a oo i le aso fitu, ona tafi ai lea o lona lauulu uma, ma lana ‘ava, ma ona laumata, o ona fulufulu uma lava na te tafiina ai, ma ta ona ofu, ma taele lona tino i le vai, ona mamā ai lea o ia.

10A oo foi i le aso valu, na te avatua ni tamai mamoe poa e lua e sao ona lelei, ma le tamai mamoe fafine e tasi, e tasi lona tausaga e sao ona lelei, ma omera e tolu o falaoa lelei ua palua ma le uu, e fai ma taulaga i mea e ‘ai, ma le loka e tasi o le suāuu.

11O le faitaulaga foi o lē faamamā ia te ia, na te tuu atu le tagata o le a faamamāina, atoa ma ia mea i luma o Ieova i le faitotoa o le fale fetafai o le faapotopotoga;

12ona ave ai lea e le faitaulaga se tamai mamoe poa e tasi, ma avatu ai e fai ma taulaga mo le sese, atoa ma le loka o suāuu, ma lulu ai e fai ma taulaga lulu i luma o Ieova;

13na te fasi foi le tamai mamoe i le mea na te fasi ai le taulaga mo le agasala ma le taulaga mu i le mea paia; auā e pei o le taulaga mo le agasala e faapea foi le taulaga mo le sese, e fai mo le faitaulaga; ua matuā paia lava lea mea.

14Ona ave ai lea e le faitaulaga nisi toto o le taulaga mo le sese, e tuu ai e le faitaulaga i le tumutumu o le taliga taumatau o le tagata o le a faamamāina, ma le lima matua o lona lima taumatau, ma le vae matua o lona vae taumatau;

15ona ave ai lea e le faitaulaga nisi mea ai le loka o le suāuu, ma liligi ai i le alofilima o le lima tauagavale o le faitaulaga;

16ona fufui ai lea e le faitaulaga o le tamatamai lima o lona lima taumatau i le suāuu o i lona alofilima tauagavale, ma sausau faafitu le suāuu i lona tamatamai lima i luma o Ieova;

17a o mea o totoe o le suāuu i lona alofilima, e tuuina atu ai lea e le faitaulaga i le tumutumu o le taliga taumatau o le tagata o le a faamamāina, ma le lima matua o lona lima taumatau, ma le vae matua o lona vae taumatau, i luga o le toto o le taulaga mo le sese;

18o mea foi o totoe o le suāuu i le alofilima o le faitaulaga, na te tuuina atu lea i le ulu o le tagata o le a faamamāina, ona faia lea le faitaulaga se togiola mo ia i luma o Ieova.

19E faia foi e le faitaulaga le taulaga mo le agasala, ma le togiola mo ia o le a faamamāina ai lona leaga; e mulimuli ane foi na te fasi le taulaga mu.

20E faia foi e le faitaulaga le taulaga mu, ma le taulaga i mea e ‘ai i le fatafaitaulaga, ona faia lea e le faitaulaga se togiola mo ia, ona mamā ai lea o ia.

21A e afai ua mativa o ia, e le maua ia mea; ona ave ai lea e ia se tamai mamoe poa e tasi e fai ma taulaga mo le sese ia luluina, e fai ai le togiola mo ia, ma le omera e tasi o le falaoa lelei e palua ma suauu, e fai ma taulaga i mea e ‘ai, atoa ma le loka o le suāuu.

22O le uluga manutagi foi, po o tamai lupe e lua fua, po o le fea na te maua; o le tasi e fai ma taulaga mo le agasala, a o le taulaga mu le tasi.

23Na te au mai ai foi ia mea i le faitaulaga i le aso valu mo lona faamamāina, i le faitotoa o le fale fetafai o le faapotopotoga i luma o Ieova.

24Ona avatu ai lea e le faitaulaga le tamai mamoe poa o le taulaga mo le sese, atoa ma le loka o le suāuu, e luluina foi ia mea e le faitaulaga o le taulaga lulu i luma o Ieova;

25na te fasi foi le tamai mamoe poa o le taulaga mo le sese, e ave foi e le faitaulaga nisi toto o le taulaga mo le sese, ma tuu ai i le tumutumu o le taliga taumatau o le tagata o le a faamamāina, ma le lima matua o lona lima taumatau, atoa ma le vae matua o lona vae taumatau;

26e liligiina foi e le faitaulaga nisi suāuu i le alofilima o le lima tauagavale o le faitaulaga;

27e sausauina foi e le faitaulaga i lona tamatamai lima taumatau nisi suāuu ua i lona alofilima tauagavale e faafitu ai i luma o Ieova.

28E tuuina atu foi e le faitaulaga nisi suāuu ua i lona lima i le tumutumu o le taliga taumatau o le tagata o le a faamamāina, ma le lima matua o lona lima taumatau, ma le vae matua o lona vae taumatau, i le mea o i ai le toto o le taulaga mo le sese;

29a o toe suāuu ua i le alofilima o le faitaulaga na te tuuina atu i le ulu o le tagata o le a faamamāina, e fai ma togiola mo ia i luma o Ieova.

30Na te avatua le tasi manutagi, po o le tasi tamai lupe o le fea ua na maua;

31po o le fea o ia mea ua na maua, o le tasi e fai ma taulaga mo le agasala, ma le tasi e fai ma taulaga mu, atoa ma le taulaga i mea e ‘ai; e fai ai e le faitaulaga le togiola i luma o Ieova mo ia o le a faamamāina.

32O le tulafono lea ia te ia ua i ai le ila lepela, e le mafai ia te ia ona maua o mea e tatau ma lona faamamāina.

33Ua fetalai mai foi Ieova ia Mose ma Arona, ua faapea mai,

34A outou oo atu i le nuu o Kanana ou te avatua ia te outou e fai mo outou, ma ou tuuina atu le ila lepela i se fale o le nuu ua fai mo outou;

35ona alu ane ai lea o ia e ona le fale, ma ta‘u atu i le faitaulaga, ia faapea atu, O lo‘u vaai ua peiseai se ila ua i le fale.

36Ona fai atu ai lea o le faitaulaga, latou te la‘u ese mea o i le fale, a o lei ulufale ai le faitaulaga e matamata i le ila, ina ne‘i leaga mea uma o i le fale; e mulimuli ane ona ulu atu ai lea o le faitaulaga e matamata i le fale;

37ona matamata ai lea o ia i le ila, faauta foi, ua i ai lava le ila i pa o le fale, o mea omoomo faasamasama, po o faamūmū, ua peiseai ua omo ifo i le pa;

38ona ulufafo ai lea o le faitaulaga i le fale i le faitotoa o le fale, ma pupuni le fale i aso e fitu.

39Ona toe foi ai lea o le faitaulaga i le aso fitu e matamata ai; faauta foi, ua sosolo le ila i le pa o le fale;

40ona fai atu lea o le faitaulaga, latou te ave ese maa ua i ai le ila, ma lafo i tua o le aai i se mea leaga;

41e fai atu foi o ia, ia valusia le fale i totonu ia soo, ia latou sasaa foi le eleele na latou valusia i tua o le aai i se mea leaga.

42Ia latou avatu foi nisi maa e sui a‘i ia maa, ia avatu ai foi nisi panisina e vali a‘i le fale.

43Afai foi e toe tupu le ila, ma tupu mai i le fale, ina ua uma ona aveeseina o maa, ina ua uma ona valusia o le fale, ua uma foi uma valia;

44ona ulufale atu ai lea o le faitaulaga e matamata atu ai, faauta foi, ua sosolo le ila i le fale, o le lepela aati lea i le fale; ua leaga ia.

45Ona lepeti ai lea e ia o le fale, o ona maa, ma ona laau, atoa ma panisina uma o le fale, na te aveesea foi i tua o le aai i se mea mea leaga.

46O sē ulu atu i lea fale i ona aso uma o punitia ai, e leaga ai o ia seia oo i le afiafi.

47O sē taoto foi i le fale, na te ta ona ofu, o sē ‘ai foi i le fale, na te ta ona ofu.

48A e afai e ulufale atu le faitaulaga, ma matamata ai, faauta foi, ua le sosolo le ila i le fale, ina ua uma ona valia o le fale; ona ta‘umamāina ai lea o le fale e le faitaulaga, auā ua mavae le ila.

49Ona ave ai lea e ia manu e lua, ma le laau le arasi, ma le ie mūmū, ma le isopo e faamamā a‘i le fale.

50Ona fasi ai lea e ia le tasi manu i se ipu omea i luga o le vaipuna;

51ona tago ai lea o ia i le laau o le arasi, ma le isopo, ma le ie mūmū, ma le manu ola, ma fufui ai i le toto o le manu ua fasia, i le ma le vaipuna, ona sausau faafitu ai lea i le fale.

52Na te faamamāina foi le fale i le toto o le manu, ma le vaipuna, ma le manu ola, ma le laau o le arasi, ma le isopo, atoa ma le ie mūmū;

53ona tuu atu lea e ia o le manu ola i tua o le aai i le vao, e fai ai le togiola mo le fale, ona mamā ai lea.

54O le tulafono lea i ila lepela uma lava,

55atoa ma ma‘i pa‘upa‘ua, i le ma le lepela o i le ofu, po o le fale,

56ma le ma‘i fulafula, ma le mea faapa‘upa‘u,

57ma le lupe o i le tino; e a‘oa‘o mai ai ona leaga, ma ona mamā; o le tulafono lea i le lepela.