1E luafulu ma le lima o tausaga o Iotama ina ua fai o ia ma tupu; ua fai foi o ia ma tupu i Ierusalema i tausaga e sefulu ma le ono. O le igoa foi o lona tinā o Ierusa o le afafine o Satoka.
2Ua faia e ia le amiotonu i luma o Ieova, e tusa ma mea uma na faia e Usia lona tamā; a ua le ulufale atu o ia i le malumalu o Ieova. Ua fai pea foi mea leaga e le nuu.
3Ua faia e ia le faitotoa aupito i luga o le fale o Ieova, ma ua faia foi galuega e tele i le pa o Ofele.
4Ua ia faia foi aai i mauga o Iuta, ua faia foi ‘olo ma fale leoleo i vao matua.
5Ua ia tau foi ma le tupu o le fanauga a Amoni, ma ua malo ia te i latou. Ona au mai lea ia te ia e le fanauga a Amoni i lea tausaga e selau taleni o ario, ma le sefulu o afe o kori o saito, ma le sefulu o afe o kori o karite. Sa faapea ona au mai ia te ia e le fanauga a Amoni i lona lua o tausaga, ma lona tolu.
6Sa faamalosia Iotama, auā na ia saunia ona ala i luma o Ieova lona Atua.
7O toe o mea na faia e Iotama, ma ona taua uma, ma ana amio, faauta, ua tusia i le tusi i tupu o Isaraelu ma Iuta.
8E luafulu ma le lima ona tausaga ina ua fai o ia ma tupu; o tausaga foi e sefulu ma le ono na fai ai o ia ma tupu i Ierusalema.
9Ona taoto lea o Iotama faatasi ma ona tamā, ma ua latou tanumia o ia le aai a Tavita. Ona soloai ane ai lea o Aasa lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
