IEREMIA, 14 - Samoan Old Version Bible

O LE MATAUPU XIV.O le oge tele i Iuta, ma le talosaga a Ieremia ia Ieova.

1O le afioga a Ieova na oo mai ia Ieremia ona o le la mala.

2Ua faanoanoa Iuta, ma ua faavaivai ona faitotoa; ua faavauvau i latou ua punou i le eleele, ma ua alu ae le alaga o Ierusalema.

3Ua aauina atu e o latou alii o latou tagata i le vai; ua latou o atu i vaieli, ua le maua ni vai; ua latou toe foi mai ma a latou ipu e le iio; ua mamā i latou ma masiasi, ua latou ufiufi foi i o latou ulu.

4Ua mamā i latou o e gālue fanua, ua ufiufi i o latou ulu ona o le laueleele ua mavaevae, auā ua leai se ua i le nuu.

5O le aila lava ua fanau ia i le vao, ma ua tuua lana tama, auā ua leai se vao mua.

6O asini foi o le vao ua tutū i mauga tula, na latou sogisogi i le matagi e pei o luko; ua avea o latou mata, auā e leai ni vao iti.

7Ieova e, e ui lava ina ua molimau a matou agasala ia te i matou, ia e faia lava ona o lou suafa; auā ua tele lo matou liliu ese; ua matou agasala ia te oe.

8Le faamoemoega o Isaraelu e, o lē faaola ia te ia i ona po o le puapuaga, se a le mea ua avea ai oe e pei o le tagata ese i le nuu, e pei o le tagata alu malaga foi ua afe ane e moe i le po?

9Se a le mea ua avea ai oe e pei o le tagata ua segia lona mauli, e pei o le toa e le mafaia ona faaola? a o oe, Ieova e, ua e ia te i matou lava, ua ta‘ua i matou i lou suafa; aua e te tuua i matou.

10O loo faapea ona fetalai mai o Ieova i lenei nuu, Ua fia feoai naua i latou, ua latou le taofia o latou vae, o le mea lea e le fiafia ai Ieova ia te i latou; e manatua nei e ia o a latou amio leaga, ma tauia a latou agasala.

11Ona faapea mai ai lea o Ieova ia te au, Aua le tatalo mo lenei nuu ina ia lelei ai i latou.

12E ui ina latou anapopogi, ou te le faalogo i lo latou alaga; e ui ina latou osia taulaga mu ma taulaga i mea e ‘ai, ou te le talia; a ou te faaumatia i latou i le pelu, ma le oge, ma le faamai.

13Ona ou faapea atu ai lea, Aue! le Alii e Ieova, faauta, ua fai mai perofeta ia te i latou, Tou te le iloa e pelu, e le oo foi le oge ia te outou, a ou te tuuina atu ia te outou le manuia faamaoni i lenei mea.

14Ona fetalai mai lea o Ieova ia te au, O loo vavalo mai perofeta i mea pepelo i lo‘u igoa; ua ou le aauina atu i latou, ma ou le poloai atu ia te i latou, ma a‘u le tautala atu ia te i latou; ua latou vavalo ia te outou le faaaliga pepelo, ma le faataulāitu, ma le mea faatauvaa, ma le pepelo o latou loto.

15O le mea lea o loo faapea ona fetalai mai ai o Ieova i perofeta ua vavalo i lo‘u igoa, a o a‘u ua ou le aauina atu i latou; a ua latou fai ane, E le oo mai le pelu ma le oge i lenei nuu; o le pelu ma le oge e faaumatia ai ia lava perofeta.

16A o le nuu ua latou vavalo i ai, e lafoaiina i latou i ala o Ierusalema ona o le oge ma le pelu; e leai se na te tanua i latou, o i latou, atoa ma a latou avā, ma o latou atalii, ma o latou afafine; ou te sasaaina atu foi a latou amio leaga i luga ia te i latou.

17O le upu nei e te fai atu ai ia te i latou, Ia tafe ifo loimata i o‘u mata i le po atoa ma le ao, aua le mapu; auā ua tu‘imomoia le tama teine taupou a lo‘u nuu i le tu‘imomomo e tele, o le manua e matuā leaga lava.

18Afai ou te alu atu i le vao, faauta foi, o e ua fāsia i le pelu; a e afai ou te alu i le aai, faauta foi, o e ua vaivai i le oge; auā o perofeta atoa ma faitaulaga, ua latou feoai i le nuu ua latou le iloa.

19Ua e matuā lafoaiina ea Iuta? Ua inosia ea Siona i lou finagalo? Se a le mea ua e sasaina ai i matou, ua leai foi se togafiti e malolo ai i matou? Na matou faatalitali i le manuia, a e leai se lelei na maua; na faatalitali foi i ona po e faamaloloina ai, faauta foi, o le mata‘u.

20Ieova e, ua matou iloa la matou amio leaga, ma le amioletonu a o matou tamā; auā ua matou agasala ia te oe.

21Aua e te ‘ino‘ino mai ia te i matou, auā o lou suafa; aua e te faainosia le nofoālii o lou mamalu; ia e manatua, aua le tatalaina la tatou feagaiga ma oe.

22Pe ai se tasi o mea faatauvaa o i nuu ese e mafaia ona faatotōina ifo o le ua? pe mafaia ea e le lagi ona tuuina mai o timuga? E le o oe ea lea, Ieova e, lo matou Atua? O le mea lea matou te faatalitali ai ia te oe; auā o oe lava ua e faia ia mea uma.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help