1O le luafulu ma le fitu o tausaga o Ierepoamo le tupu o Isaraelu na fai ai ma tupu Asaraia le atalii o Amasia le tupu o Iuta.
2O le sefulu ma le ono o ona tausaga na fai ai o ia ma tupu, e limagafulu ma le lua o tausaga na fai ai o ia ma tupu i Ierusalema. O le igoa foi o lona tinā o Iekalia, o le Ierusalema ia.
3Na ia faia le amiotonu i luma o Ieova e tusa ma mea uma na faia e Amasia lona tamā.
4A ona lei aveeseina o mea maualuluga; na fai pea taulaga e le nuu, ma faamu mea manogi i mea maualuluga.
5Na taia foi le tupu e Ieova, ua avea ai ia ma lepela ua oo lava i le aso na ia oti ai; na faleesea foi o ia. A ua pule Iotama le atalii o le tupu i le aiga, ua na faamasino tagata o le nuu.
6O toe o mea na faia e Asaraia, ma mea uma na ia faia, e lei tusia ea i le tusi o tala i nofoaiga a tupu o Iuta?
7Ua taoto foi Asaraia faatasi ma ona tamā, ua latou tanu foi ia te ia faatasi ma ona tamā, i le aai o Tavita; ona soloai ane ai lea o lona atalii o Iotama e fai ma tupu.
8O le tolugafulu ma le valu o tausaga o Asaraia le tupu o Iuta na fai ma tupu Sakaria le atalii o Ierepoamo ia Isaraelu i masina e ono i Samaria.
9Na ia faia le amio leaga i luma o Ieova, faapei ona faia e ona tamā; na le te‘a ese lava ia i agasala a Ierepoamo le atalii o Nepata, o le na faatupu le agasala ia Isaraelu.
10Ua foua foi o ia e Saluma le atalii o Iapese, ua na fasi ia te ia i luma o le nuu, ua fasioti foi ia te ia; ona fai ai lea o ia ma tupu ua sui a‘i o ia.
11O toe o mea na faia e Sakaria, faauta, ua tusia i le tusi o tala i nofoaiga a tupu o Isaraelu.
12O le afioga lea a Ieova na tŭlei atu ia Ieu, ua faapea atu, E nonofo ou atalii i le nofoālii o Isaraelu e oo i le fa o augātagata. Na faapea lava ona taunuu.
13O le tolugafulu ma le iva o tausaga o Usia le tupu o Iuta na fai ai ma tupu Saluma le atalii o Iapese; o le masina atoa foi na fai ai o ia ma tupu i Samaria;
14auā na alu ae Manaema le atalii o Kati nai Tiresa, ua oo i Samaria, ua fasi ia Saluma le atalii o Iapese i Samaria, ua fasioti ia te ia, ona fai ai lea o ia ma tupu ua sui a‘i o ia.
15O toe o mea na faia e Saluma, atoa ma le fouga na ia fou ai, faauta, ua tusia i le tusi o tala i nofoaiga a tupu o Isaraelu.
16Ona fasi ai lea e Manaema o Tipesa, ma i latou uma sa i ai, ma ona nuu e amatai i Tiresa, auā na latou le tatala puipui ia te ia ua ia fasi ai; ua ia faatiau i fafine totō uma sa i ai.
17O le tolugafulu ma le iva o tausaga o Asaraia le tupu o Iuta na fai ai Manaema le atalii o Kati ma tupu o Isaraelu i tausaga e sefulu i Samaria.
18Na ia faia foi le amio leaga i luma o Ieova; o lona olaga uma e lei te‘a ese ai lava i agasala a Ierepoamo le atalii o Nepata, o le na faatupu le agasala ia Isaraelu.
19Na sii le taua e Pula le tupu o Asuria i le nuu; a ua avatu e Manaema o taleni ario e tasi le afe ia Pula, ina ia na fesoasoani ia te ia, ina ia uamau le malo ia te ia.
20Na togi tu foi e Manaema o tupe ia Isaraelu, i tagata sili uma e tamaoaiga, ina ia avatu ai i le tupu o Asuria, ia tofu ona tagata ma sekeli ario e limagafulu. Ona foi atu ai lea o le tupu o Asuria, ua le toe nofo ai i le nuu.
21O toe o mea na faia e Manaema, ma mea uma na ia faia, e lei tusia ea i le tusi o tala i nofoaiga a tupu o Isaraelu?
22Ua taoto foi Manaema faatasi ma ona tamā; ona soloai ane ai lea o Pekasia lona atalii e fai ma tupu.
23O le limagafulu o tausaga o Asaraia le tupu o Iuta na fai ai ma tupu Pekasia le atalii o Manaema ia Isaraelu i Samaria e lua tausaga.
24Na ia faia foi le amio leaga i luma o Ieova, na ia le te‘a ese lava i agasala a Ierepoamo le atalii o Nepata, o le na faatupu le agasala ia Isaraelu.
25A ua foua ia e Peka le atalii o Remalia o lana ave ‘au, ua ia fasioti foi ia te ia i Samaria i le ‘olo o i le fale o le tupu; o i latou, ma Arekopa, ma Arie, na ia te ia foi o tagata Kiliata e toalimagafulu; ua ia fasioti lava ia te ia, ona fai ai lea o ia ma tupu ua sui a‘i o ia.
26O toe o mea na faia e Pekasia, atoa ma mea uma na ia faia, faauta, ua tusia i le tusi o tala i nofoaiga a tupu o Isaraelu.
27O le limagafulu ma le lua o tausaga o Asaraia le tupu o Iuta na fai ai ma tupu Peka le atalii o Remalia ia Isaraelu i Samaria i tausaga e luafulu.
28Na ia faia foi le amio leaga i luma o Ieova, na ia le te‘a ese lava i agasala a Ierepoamo le atalii o Nepata, o le na faatupu le agasala ia Isaraelu.
29O le nofoaiga a Peka le tupu o Isaraelu na sau ai Tikila-pilesa le tupu o Asuria, ua na fao foi Iono, ma Apela Petemaaka, ma Ianoa, ma Katesa, ma Hasora, ma Kiliata, ma Kalilaia, o le nuu uma o Nafatali; ua na faatāfeaina i latou i Asuria.
30Ua foua foi Peka le atalii o Remalia e Hosea le atalii o Ele, ua na fasi ia te ia ua oti ai; ona fai ai lea o ia ma tupu ua sui a‘i o ia, i le luafulu o tausaga o Iotama le atalii o Usia.
31O toe o mea na faia e Peka, atoa ma mea uma na ia faia, faauta, ua tusia i le tusi o tala i nofoaiga a tupu o Isaraelu.
32O le lua o tausaga o Peka le atalii o Remalia, le tupu o Isaraelu, na fai ai ma tupu Iotama le atalii o Usia, le tupu o Iuta.
33O le luafulu ma le lima o ona tausaga na fai ai o ia ma tupu, e sefulu ma le ono foi tausaga na fai ai o ia ma tupu i Ierusalema. O le igoa foi o lona tinā o Ierusa le afafine o Satoka.
34Na ia faia foi le amiotonu i luma o Ieova; na ia faia e tusa ma mea uma na faia e Usia lona tamā.
35Na ona lei aveeseina mea maualuluga; na fai pea taulaga e le nuu, ma faamu mea manogi i mea maualuluga. Ua faia e ia le faitotoa aupito i luga o le fale o Ieova.
36O toe o mea na faia e Iotama, atoa ma mea uma na ia faia, e lei tusia ea i le tusi o tala i nofoaiga a tupu o Iuta?
37O ona po ia na amata ai e Ieova ona aauina mai o Resina le tupu o Suria, atoa ma Peka le atalii o Remalia e sii taua ia Iuta.
38Ua taoto foi Iotama faatasi ma ona tamā, ua tanumia foi faatasi ma ona tamā i le aai o Tavita lona tamā; ona soloai ane ai lea o Aasa lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
