FAATAOTO, 17 - Samoan Old Version Bible

O LE MATAUPU XVII.

1E lelei si fāsi mea e ‘ai ua magumagu, a o i ai le filemu; a e leaga le fale ua tumu i manu ua fasia, a o i ai le misa.

2E pule le auauna poto i le atalii na te faatupu le mā; e fai lona veaga o le tofi faatasi ma le au uso.

3E fai le ipu e tunu ai le ario, ma le ogaumu e tunu ai le auro; a o Ieova, na te tofotofoina loto.

4O lē fai mea leaga, ua uai atu ona taliga i laugutu leaga; o le tala pepelo e faalogo o ia i le laulaufaiva upu paaa.

5O le ua tauemu i le tagata mativa, e faifaia e ia Le na faia o ia; o le ua fiafia i le mala, e le faasaoina o ia.

6O le pale o toeaina, o fanau a latou fanau ia; o le faamatagofie o le fanau, o latou tamā ia.

7E le ono i laugutu o le vale ona tautala i mea e sili ona lelei; a e matuā le ono laugutu pepelo i le alii.

8O le mea alofa, o le maa matagofie lea i le ua i ai; o mea uma e faasaga i ai, e manuia ai.

9O le ua ufiufi le soliga o le tulafono, na te sailia le alofa; a o le ua toe ta‘u le mea, na te faateaeseina uo.

10E sili ona ogoogo o le aoaiga i le tagata mafaufau, i ta e selau i le vale.

11Ua na o le leaga e sailia e le ua fouvale; a e auina atu ia te ia le auauna saua.

12Ia fetaiai ma le tagata se urosa ua avea lana toloai; a e aua le fetaiai ma le vale i lona valea.

13O le na te taui atu le lelei le leaga, e le te‘a le leaga i lona aiga.

14O le amataga o le finauga, o le tuuina atu lea o le vai; o le mea lea ina tuu ai ia le misa, manū ua le tupu tele.

15O le na te ta‘uamiotonu atu i le ua amio leaga, ma le ua faasala i le ua amiotonu, e faatau inosia i laua e Ieova.

16E i ai i se a le taui i le lima o le vale e maua ai e ia le poto, a ua leai sona loto i ai?

17E alofa le uo i aso uma lava; a e fanau le uso mo le aso vale.

18O le tagata ua leai sona mafaufau, ua fetagofi o laua lima ma le tasi; ua fai o ia ma moni i luma o lana uo.

19O le ua manao i le soliga o le tulafono, ua manao lea i le misa; o le ua faamaualugaina lona faitotoa, ua saili o ia le malaia.

20O le ua i ai le loto faapiopio, e le maua e ia se lelei; ma le ua faa‘ole‘ole lona laulaufaiva, e paū ia i le leaga.

21O le na te fanaua le vale, e fai lea mona faanoanoaga; e leai foi se fiafia i le tamā o le ulavale.

22O le loto fiafia, e fai ma vailaau aoga lea; a o le loto faanoanoa e mamago ai ivi.

23E talia e le tagata amio leaga le mea alofa nai le fatafata, ina ia faaliliu ese e ia ala o le faamasinoga.

24O loo i ai i le tagata mafaufau le poto; a o mata o le vale, ua i le tuluiga o le lalolagi ia.

25O le atalii valea o le faatiga loto lea i lona tamā; o le faaonoono foi i le na fanau mai o ia.

26E le lelei ona faasala i le ua amiotonu; e le lelei foi ona fasi i alii ona o le amio sa‘o.

27O le ua i ai le poto, e taofia e ia ana upu; o le ua agamalu foi, o le tagata faautauta lea.

28O le vale lava, a faalologo o ia, fa tagata, o ia ua poto; o le ua pupuni ona laugutu, fa tagata, o le tagata mafaufau ia.