1A outou vaevaeina le laueleele i le vili e fai ma tofi, tou te avatua se taulaga ia Ieova, o le mea paia mai le laueleele; o lona umi e lua sefulu o afe ma afe e lima o u, o lona umi lea, o lona lautele foi e sefulu afe. E paia foi lea i ona itu uma e soo ai.
2E i ai i lea mea se fasi fanua mo le malumalu, tailima selau o u i ona itu, e gatasitasi ona itu e fa; e lima sefulu foi o kupita e fai mona tuāfanua e faataaliolio ai.
3O lenei fua foi e te fuatia mai ai se mea, o lona umi e lua sefulu afe ma afe e lima, a o le lautele e sefulu afe; e i ai le malumalu, o le mea e sili ona paia.
4E fai lenei tofi paia o le laueleele mo le au ositaulaga, o e auauna i le malumalu, o e faalatalata atu e auauna ia Ieova; e fai foi ma mea e tutū ai o latou fale, o le mea paia foi e tu ai le malumalu.
5O le lua sefulu o afe ma afe e lima o lona umi, ma le sefulu afe o lona lautele, e fai lea mo sa Levī, o e auauna i le fale, e fai ma tofi e fai ai potu e lua sefulu.
6Tou te tuu ane foi le tofi o le aai e lima gaafe lona lautele, e lua sefulu afe ma afe e lima lona umi, e faafesagai ma le taulaga o le tofi paia, e fai foi lea mo le aiga uma o Isaraelu.
7E i ai foi se tofi mo le alii sili i le tasi itu, ma le isi itu o le taulaga o le tofi paia ma le tofi o le aai i luma o le taulaga o le tofi paia i luma foi o le tofi o le aai, e pau mai i le itu i sisifo, e pau mai foi i le itu i sasae; o lona umi foi e faafeagai lea ma le tasi tofi, e pau mai i le tuaoi i sisifo, e pau mai i le tuaoi i sasae.
8E fai lona tofi i le laueleele o Isaraelu; e le toe faasaua foi a‘u alii i lo‘u nuu; o le laueleele foi latou te tuuina atu i le aiga o Isaraelu, e faatatau i o latou itu aiga.
9Ua faapea ona fetalai mai o le Alii o Ieova, Soia, outou alii o Isaraelu e; ina tuu ia le faasaua ma le faasaunoa, a ia fai amio tatau ma amiotonu; soia tou te tulia o‘u tagata, o loo o fetalai mai ai le Alii o Ieova.
10Ia ia te outou le fua faatautau e tatau, ma le efa e tatau, ma le paita e tatau.
11O le efa ma le paita e tasi lo laua fua, ina ia i ai somera e sefulu i le paita, ia i ai foi efa e sefulu i le somera; e faatatauina lona fua i le somera.
12O le sekeli e lua sefulu o kire ia; e lua sefulu o sekeli, e lua sefulu ma le lima o sekeli, e tasi le sefulu ma le lima o sekeli, e fai ia mo outou mina.
13O le taulaga lenei tou te avatua; o vaega e ono o le efa ai le somera o saito, ma vaega e ono o le efa ai le somera o karite.
14O le tulafono foi i le suāuu, o le paita o suāuu tou te avatua vaega e sefulu o le paita ai le kori, o le somera e i ai paita e sefulu; auā o le sefulu o paita o le somera lea.
15O se tamai mamoe e tasi mai le lafu mai le lua o selau mai taaga lelei o Isaraelu, e fai ia ma taulaga i mea e ‘ai, ma taulaga mu, ma taulaga faafetai, e fai foi ma togiola mo i latou, o loo fetalai mai ai le Alii o Ieova.
16O tagata uma o le nuu, latou te faia lenei taulaga faatasi i le alii sili o Isaraelu.
17E a le alii sili ona avatu o taulaga mu, ma taulaga i mea e ‘ai, ma taulaga i mea e inu i tausamiga, ma masina faatoa vaaia, ma sapati, ma tausamiga uma o le aiga o Isaraelu; na te saunia le taulaga mo le agasala, ma le taulaga i mea e ‘ai, ma le taulaga mu, ma taulaga faafetai, e fai ai se togiola mo le aiga o Isaraelu.
18Ua faapea ona fetalai mai o le Alii o Ieova, O le uluai masina, o le aso muamua o le masina, e te ave ai se povi poa taanoa e sao ona lelei, e te faamamāina ai le malumalu;
19e ave foi e le ositaulaga nisi toto o le taulaga mo le agasala, ma avane ai i pou o le fale, ma tulimanu e fa o le tafatafa faasili o le fata faitaulaga, ma pou o le faitotoa o le lotoā tuloto.
20E faapea ona e faia i le aso fitu o le masina mo le tagata e sese, atoa ma le ua valea; e faapea ona outou fai ai se togiola mo le fale.
21O le masina muamua, o lona aso e sefulu ma le fa o le masina, tou te fai ai le paseka, o le tausamiga e fitu ona aso; tou te aai ai areto e le faafefeteina.
22E saunia e le alii sili i lea aso mo ia, ma tagata uma o le nuu o se povi poa e fai ma taulaga mo le agasala.
23O aso e fitu o le tausamiga na te sauni ai se taulaga mu ia Ieova, o povi poa ma mamoe poa e sao ona lelei, ia taifitu i aso i aso lava e fitu; ma se tamai ‘oti i lea aso ma lea aso e fai ma taulaga mo le agasala.
24Na te saunia foi le taulaga i mea e ‘ai, o le efa e tasi i le povi poa, o le efa foi i le ‘oti poa, ma le sinu o suāuu i le efa.
25O le masina e fitu, o lona aso e sefulu ma le lima o le masina, na te faia e tusa ma ia mea, i le tausamiga i aso e fitu, e tusa ma le taulaga mo le agasala, e tusa foi ma le taulaga mu, e tusa ma le taulaga i mea e ‘ai, e tusa foi ma le suāuu.
Who We AreWhat We EelieveWhat We Do
2025 by iamachristian.org,Inc All rights reserved.
