1Isaraelu e, aua e te fiafia ma le olioli, faapei o isi nuu; auā ua e alu ese i lou Atua e faitaaga ai; ua e fia fai taui i mea uma e sasa ai saito.
2E le fagaina i latou i le mea e sasa ai saito ma le soligāvine, e oge ai uaina fou.
3Latou te le nonofo i le nuu o Ieova, a e toe foi Efaraima i Aikupito, latou te aai mea leaga i Asuria.
4Latou te le fai taulaga ia Ieova i uaina, e le fiafia o ia ia te i latou; o a latou taulaga, e ia te i latou ia, peiseai o mea e ‘ai a e faanoanoa, o i latou uma e aai ai e leaga ai i latou; auā o la latou mea e ‘ai mā latou e le oo atu lea i le fale o Ieova.
5Se a se mea tou te faia i le aso e fai ai le tausamiga, ma le aso e fai ai le taulaga ia Ieova?
6Auā, faauta mai, ua o i latou ne‘i malaia; e faapotopotoina i latou e Aikupito, e tanumia i latou e Mafi; o mea matagofie o i ai o latou ario e vaoa ia i laau ogoogo; e i ai i o latou fale o laau talatala.
7Ua oo mai ona po e taui ai, ua oo mai ona po e totogi ai; e iloa e Isaraelu; ua valea le perofeta, ua valea lava le vaafaatau, ona o le tele o lau amio leaga, ma le ‘ino‘ino tele.
8O loo faatalitali Efaraima faatasi i lo‘u Atua; ua se mailei o e fāi manu le perofeta i ana amio uma; o le ‘ino‘ino i le fale o lona Atua.
9Ua matuā amio leaga i latou, faapei ona fai i ona po o Kipea; e manatua e ia a latou agasala, e taui atu i a latou amio leaga.
10Na ou maua Isaraelu, e pei o fuifui vine i le vao; na ou iloa o outou mātua e pei o uluai mati i le mati ina ua faatoa fua mai; a ua o i latou ia Paalapeoro, ua vavae atu i latou i le mea e masiasi ai; ua inosia i latou e tusa ma le mea ua latou naunau i ai.
11O Efaraima e lele ese lo latou mamalu faapei o le manu lele, ai le fanauga, ma le manava, ma le faatoa afuafua.
12E ui ina latou tausi a latou fanau, ou te aveeseina i latou i tagata; oi talofa lava ia te i latou, pe a a‘u alu ese ia te i latou.
13Ua totōina Efaraima i le mea matagofie, faapei ona ou iloa o Turo; a o Efaraima na te ta‘ita‘iina atu lana fanau i le fasioti tagata.
14Ieova e, ia e avatu ia te i latou; se a foi se mea e te avatua? Ia e avatu ia te i latou le manava fanau le au, ma susu e le susua.
15O loo i Kilikala lo latou leaga uma; auā na ou ‘ino‘ino ia te i latou i lea mea, ou te tulia i latou ai lo‘u fale ina ua leaga mea ua latou faia; ou te le toe alofa ia te i latou; o latou alii uma, o e fouvale i latou.
16Ua taia Efaraima, ua mago lo latou pogai; latou te le fua mai ni fua; afai foi latou te fananau, ou te fasiotia la latou fanau pele.
17E lafoaiina i latou e lo‘u Atua, auā ua latou le faalogo ia te ia; e taase i latou i nuu ese.
Who We AreWhat We EelieveWhat We Do
2025 by iamachristian.org,Inc All rights reserved.
