1Ua foi mai le agelu na ma tautala, ua ia fafagu mai ia te au, e pei o le tagata ua fagua na moe.
2Ona fai mai lea o ia ia te au, O le a ea ua e vaaia? Ona ou fai atu lea, Ua ou iloa, faauta, o le lamepa ua auro atoatoa, ma lona tuugāsuāuu i ona luga, mona tuugālamepa e fitu i ona luga, ma ala e taifitu i tuugālamepa o loo i ona luga;
3ma olive e lua i ona tafatafa, o le tasi i le itu taumatau o le tuugāsuāuu, ma le tasi i lona itu tauagavale.
4Ua ou toe fai atu i le agelu na ma tautala, ua faapea atu, Le alii e, o a ea ia mea?
5Ona tali mai lea o le agelu na ma tautala, ua faapea mai ia te au, E te le iloa ea po o a mea nei? Ona ou fai atu lea, Le alii e, ou te le iloa.
6Ua tali mai o ia, ua fai mai ia te au, o loo faapea mai, O le afioga lenei a Ieova ia Serupapelu, o loo faapea mai, E le o le fitafita, e le o le malosi, a o lo‘u Agaga, ua fetalai mai ai Ieova o ‘au.
7O ai ea oe le mauga tele e? e faalaugatasia oe i luma o Serupapelu; na te aumaia foi le maa tulimanu aupitoaluga, o loo alalaga, Le alofa tunoa e! ia ia te ia le alofa tunoa.
8Ua oo mai foi ia te au le afioga a Ieova, o loo faapea mai,
9O lima o Serupapelu na faavaeina ai le fale nei, o ona lima foi e faauma a‘i; e te iloa ai foi, ua auina mai a‘u ia te outou e Ieova o ‘au.
10Auā po o ai ea ua ‘ino‘ino i le aso o mea iti? Latou te fiafia ina ua latou vaai i le fua faatautau i le lima o Serupapelu; o i latou nei e fitu, o fofoga o Ieova i latou, o fetaufetuliai i le lalolagi uma.
11Ua ou fai atu foi ia te ia, o loo faapea, O a ea na olive e lua i le itu taumatau o le lamepa, ma lona itu tauagavale?
12Ona ou fai atu faalua lea ia te ia, o loo faapea atu, O a ea magāolive e lua, o loo liligi mai ia te i laua lava le uu auro i ala auro e lua?
13Ona fai mai lea o ia ia te au, o loo faapea mai, E te le iloa ea po o a ia mea? Ona ou fai atu lea, Le alii e, ou te le iloa.
14Ona fai mai lea o ia. O tagata faauuina i laua nei, o loo tutū i luma o le Alii o le lalolagi uma.
Who We AreWhat We EelieveWhat We Do
2025 by iamachristian.org,Inc All rights reserved.
