1Ua faalogo Sefatia le atalii o Matana, ma Ketalia le atalii o Pasura, ma Iukali le atalii o Selemia, ma Pasura le atalii o Malekia, i upu ua fai atu ai e Ieremia i le nuu uma, ua faapea atu,
2O loo faapea ona fetalai mai o Ieova. O lē nofo i le aai nei e oti ia i le pelu, ma le oge, ma le faamai; a o lē alu atu i tagata o Kaletaia e ola ia; e avea foi lona ola ma ana vete, e ola foi ia.
3O loo faapea ona fetalai mai o Ieova, E tuuina lava lenei aai i lima o le itu taua a le tupu o Papelonia, latou te aea ai.
4Ona fai atu ai lea o alii i le tupu, Ia fasioti lava lenei tagata; auā lava o ia lē faavaivaia lima o tagata tau o e totoe i lenei aai, ma lima o le nuu uma, i lona tautala atu ia te i latou e tusa ma ia upu; auā e le saili lenei tagata ia manuia lenei nuu, a ia malaia.
5Ona fai mai ai lea o Setekaia le tupu, Faauta, o loo i o outou lima o ia; auā e le mafai i le tupu se mea pe a le tatau ia te outou.
6Ona latou fetagofi ai lea ia Ieremia, ma tuuina atu o ia i le lua a Malekia le atalii o le tupu, sa i le lotoā o le fale puipui; ua latou tuutuu ifo ia Ieremia i maea. E leai foi se vai i le lua, na o palapala; ua goto foi Ieremia i le palapala.
7Ua faalogo Epetemeleka le tagata Aitiope, o le eunuka e i le fale o le tupu, ua tuuina ifo Ieremia i le lua, ua nofo foi le tupu i le faitotoa o Peniamina,
8ona alu atu ai lea o Epetemeleka ai le fale o le tupu, ua tautala atu i le tupu, ua faapea atu,
9Le alii e le tupu, ua amio leaga ia tagata i mea uma ua latou faia ia Ieremia le perofeta, o le ua latou tuuina ifo i le lua; e oti foi o ia i le mea ua i ai i le fia ‘ai; auā e leai ni areto o totoe i le aai.
10Ona fai atu ai lea o le tupu ia Epetemeleka le Aitiope, ua faapea atu, Tou te o ma oe tagata e toatolugafulu, ai le mea nei, ma aveina ae Ieremia le perofeta ai le lua, manū o lei oti o ia.
11Ona o ai lea o Epetemeleka ma ia tagata, ua latou o atu i le fale o le tupu i lalo o le mea e teu ai oloa, ma latou au mai mai lea mea ie pala masaesae ma ofu pala masaesae, ua latou tuuina ifo ia mea i maea ia Ieremia i le lua.
12Ua fai ane foi Epetemeleka le Aitiope ia Ieremia, Ia e tuu na ie pala masaesae ma ofu masaesae i lalo o ou aoao i maea. Ona faapea ai lea ona fai e Ieremia.
13Ona latou sisi ai lea ia Ieremia i maea, ma avae ia te ia ai le lua; ona nofo ai lea o Ieremia i le lotoā o le fale puipui.
14Ona feauina lea e Setekaia le tupu, ma na aami atu ia Ieremia le perofeta e sau ia te ia, i lona tolu o faitotoa i le fale o Ieova; ua fai atu foi le tupu ia Ieremia, Ou te fesili atu ia te oe i se mea; aua e te natia se mea ia te au.
15Ona fai mai ai lea o Ieremia ia Setekaia, Afai ou te ta‘uatua ia te oe, e te le fasiotia ea a‘u? afai foi ou te faatonuina atu ia te oe, e te le faalogo mai ia te au.
16Ona tauto faalilolilo ai lea o Setekaia le tupu ia Ieremia, ua faapea, O loo soifua Ieova, o le na faia i taua nei, ou te le fasiotia oe, ou te le tuuina atu foi oe i lima o ia tagata ua saili e fasiotia oe.
17Ona fai mai ai lea o Ieremia ia Setekaia, O loo faapea ona fetalai mai o Ieova, le Atua o ‘au, le Atua o Isaraelu, Afai e te matuā alu atu i alii mai le tupu o Papelonia, ona soifua ai lea o oe, e le faamuina foi lenei aai i le afi; a e soifua oe, atoa foi ma lou aiga.
18A e afai e te le alu atu i alii mai le tupu o Papelonia, ona tuuina atu ai lea o lenei aai i lima o Kaletaia, ma latou faamuina i le afi, o oe foi e te le sao i o latou lima.
19Ona fai atu ai lea o Setekaia le tupu ia Ieremia, Ou te fefe i tagata Iuta ua sosola atu i Kaletaia, ne‘i latou tuuina atu a‘u i o latou lima, ma latou faaleaga ia te au.
20A ua fai mai Ieremia, E le tuuina atu oe e i latou. Ia e faafofoga mai i le siufofoga o Ieova ou te fai atu ai ia te oe; ona manuia ai lea o oe, ma e soifua.
21A e afai e te le mafai ona maliu atu, o lenei le upu ua faailoa mai ai e Ieova ia te au;
22faauta foi, o fafine uma ua totoe i le fale o le tupu o Iuta, e ta‘ita‘iina i latou i alii mai le tupu o Papelonia, latou te fai ane foi, Na faaosoina oe e au uo, ua latou manumalo foi ia te oe; ua goto ou vae i le palapala, a ua tuumuli i latou.
23E aveina atu foi au avā uma ma au fanau ia Kaletaia; o oe foi e le sao oe i o latou lima, a e puea oe e le lima o le tupu o Papelonia; o oe foi e mu ai lenei aai i le afi.
24Ona fai atu ai lea o Setekaia ia Ieremia, Aua ne‘i iloa e se tasi o ia upu, ona e le oti ai lea.
25Pe afai foi e faalogo alii ua ta tautalatala ma oe, ma latou o ane ia te oe, ma fai ane ia te oe, Ina ta‘u mai ia ia te i matou o mea na e fai atu ai i le tupu, aua le natia ia te i matou, ona matou le fasioti ai lea ia te oe; pe se a foi le mea na fai mai ai le tupu ia te oe;
26ona e fai atu ai lea ia te i latou, Na a‘u fai la‘u faatoga i luma o le tupu, aua na te faafoisia a‘u i le fale o Ionatana, ne‘i ou oti i lea mea.
27Ona o mai ai lea o alii uma ia Ieremia, ma fesili mai ia te ia; ona ta‘u atu ai lea o ia ia te i latou, e tusa ma ia upu uma na fai mai ai le tupu. Ona latou o ese ai lea ia te ia ua le toe tautala; auā na le lagona se tasi le tautalaga.
28Ua nofo Ieremia i le lotoā o le fale puipui ua oo i le aso na aea ai Ierusalema; na i ai foi o ia ina ua aea Ierusalema.
Who We AreWhat We EelieveWhat We Do
2025 by iamachristian.org,Inc All rights reserved.
