1Seia ou pese atu i la‘u pele, o le pese i la‘u pele i lana tovine. Sa i la‘u pele le tovine i le mauga lafulemu lava.
2Na ia matuā eli ai, ma aoao ai maa, na ia totō ai foi le vine Soreka; na ia fai foi le ‘olo i ona totonu, na ia foaina ai le tuugāuaina; ona faatalitali ai lea o ia, ia fua mai ni vine, a ua fua mai ai vine leaga.
3O lenei, o outou o e nonofo i Ierusalema, atoa ma tagata o Iuta, ina faamasino mai ia ia te au ma la‘u tovine.
4Se a ea se mea e toe faia i la‘u tovine ou te lei faia? Se a foi le mea ua fua mai ai vine leaga, a ua ou faatalitali ia fua mai ai vine lelei?
5O lenei, ou te faailoa atu ia te outou le mea ou te faia i la‘u tivine, ou te aveeseina lona āi, ona ‘aina ai lava lea, ou te sŏloia lona aupa, ona solia lava lea.
6Ou te faatafunaina ia, e le salaina, e le teuteua; a e tutupu ai laau tuitui ma laau talatala; ou te fai atu foi i ao, aua ne‘i totō i ai ni ua.
7Auā o le tovine a Ieova o ‘au, o le aiga o Isaraelu lea, o tagata o Iuta foi, o lona faatoaga lea na ia fiafia i ai; na ia faatalitali i le faamasinoga, faauta foi, o le fasi tagata; na ia faatalitali i le amiotonu, faauta foi, o le uio.
8Oi talofa ia te i latou o e faaopoopo mai lea fale ma lea fale, o e faasosoo ane lea fanua ma lea fanua, ua le toe ai se mea, ua na o outou lava e nonofo i totonu o le nuu.
9Ua fetalai mai i o‘u taliga e Ieova o ‘au, E moni, e faatafunaina fale e tele, o fale tetele ma le lelei, e leai sē nofo ai.
10Auā e sefulu ekere o le tovine e fua mai ai le paita e tasi, o le somera o saito foi, e fua mai ai le efa.
11Oi talofa ia te i latou o e ala usu e matuā saili ‘ava, ma ua nonofo pea ua oo i le po, seia faavalemalolosi ai i latou i le uaina.
12O loo i ai i a latou faigaai o le kitara, ma le napeli, ma le topa, o le fagufagu foi, atoa ma le uaina; a ua latou le mafaufau i le galuega a Ieova, ua latou le vāai foi i mea ua faia e ona aao.
13O le mea lea ua ave ai lo‘u nuu faatagataotaua, ina ua valelea i latou; o latou alii foi ua oge i latou, ma le toatele o le nuu ua lailoa i le fia inu.
14O le mea lea ua faalauteleina ai seoli o ia e ia, ua matuā faamaga tele lava lona gutu, ua o ifo ai o latou alii, ma le toatele o le nuu, o le vao tagata foi ua pisapisao ai, atoa ma le ua mitamita ia te ia.
15Ua lafotuina le tagata nuu, ua faamaulaloina le alii, ua faamaulaloina foi mata o e faamaualuluga.
16A o Ieova o ‘au e viia o ia ona o le faamasinoga, o le Atua paia foi e ta‘upaiaina o ia ona o le amiotonu.
17E aai faasa‘oloto tamai mamoe; o mea gaogao foi a e pepeti e ‘aina ia e tagata ese.
18Oi talofa ia te i latou o e toso le amio leaga i maea o le pepelo, ua toso foi le agasala peiseai i maea o le fata faataavalevale;
19o e faapea mai, Ia faataalise o ia, ia faavave mai e ia lana galuega ina ia matou vaavaai i ai; ia faalatalata mai le pule a le Paia o Isaraelu, ma ia oo mai lava, se‘i matou iloa.
20Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie.
21Oi talofa i e ua popoto i o latou lava manatu, ma e ua fai ma tagata mafaufau i o latou lava taofi.
22Oi talofa i e malolosi e inu uaina, o e fai ma tagata totoa foi e palu ai le ‘ava.
23O e ta‘uamiotonuina le pagota ona o le taui, a e aveeseina le amiotonu a e amiotonu.
24O lenei, faapei ona ‘aina o tagutugutu saito i le mumū o le afi, e pei ona pauu foi le mutia magumagu ua mu, e faapea foi ona pala o latou aa, e pusa ae foi lo latou fuga e pei o le efuefu; auā ua latou lafoai le tulafono a Ieova o ‘au, ua latou ‘ino‘ino foi i le afioga a le Paia o Isaraelu.
25O le mea lea ua tele ai le toasa o Ieova i lona nuu, ma ua faaloaloa ai lona aao i luga ia te i latou, ma ua fasia i latou, ua gatete ai mauga; o latou tino oti foi ua pei o otaota i le moa o le ala. E ui lava i na mea uma, a e lei liliu ese lona toasa, a e faaloaloa pea lona aao.
26E sii i luga foi e ia le tagavai i nuu ese o mamao, na te mapumapu atu foi ia te i latou i tuluiga o le lalolagi; faauta foi, latou te faataalise ona vave o mai.
27E leai so latou e vaivai, e leai foi se tasi e tautevateva; e le tulemomoe i latou, latou te le momoe lava; e le tatalaina fusi o latou sulugatiti, e le motusia foi nonoa o latou seevae.
28E maamaai a latou u fanafana, e lolou foi a latou aufana uma; e faatusaina atigivae o a latou solofanua i alā, o a latou mea taavavale foi e pei o le asiosio.
29O lo latou tagi e pei o le leona fafine, latou te tagi pei o leona taanoa; latou te tagi ma pupue manu, latou te avea ai lava, e leai foi se na te laveaiina.
30O lea aso latou te u ai ia te i latou, e pei o le u o le sami; a vaai foi se tasi i le laueleele, faauta, o le pouliuli e puapuagatia ai, ua faapouliuligia foi le malamalama i ona ao.
Who We AreWhat We EelieveWhat We Do
2025 by iamachristian.org,Inc All rights reserved.
