1O le tasi tagata e aiga ma le tane a Naomi, o le tagata mauoa tele, o le aiga o Elimeleka, o Poasa lona igoa.
2Ua fai atu Ruta le Moapi ia Naomi, So‘u alu i se fanua, ma ao ai ni fua o le karite, o mulimuli i sē alofa mai ia te au. Ua fai mai o ia ia te ia, La‘u tama e, ina alu ia.
3Ua alu, ua oo i ai, ua ao karite i le fanua, o loo mulimuli i e selesele; ua soona alu i le fasi fanua o Poasa, o le aiga o Elimeleka.
4Faauta foi, ua sau Poasa mai Peteleema, ua fai mai i e selesele, Ia ia te outou Ieova! Ua latou fai atu foi ia te ia, Ia faamanuia oe e Ieova!
5Ua fai mai Poasa i le taulealea sa tofia e pule i e selesele, E o sa aī lea teine?
6Ua tali atu le taulealea sa tofia e pule i e selesele, ua faapea, O le teine Moapi lena, ua foi mai ma Naomi mai le nuu o Moapi;
7na fai mai o ia, So‘u ao, ma faaputu i le va o fusi karite, ma mulimuli atu i e ua selesele; ona alu ai lea, ua tumau ai talu le taeao ua oo i lenei itu la o loo mapu faaitiiti i le fale.
8Ua fai atu Poasa ia Ruta, E te le faalogo mai ea, lo‘u afafine e? Aua e te alu e ao i se tasi fanua ese, aua foi e te tuuna le mea nei, a ia e tumau iinei ma a‘u auauna fafine;
9e te vaai atu i le fanua latou te selesele ai, e te mulimuli atu ia te i latou; ua ou le poloai ea i taulelea, aua latou te agaleaga ia te oe? A ē fia inu, alu ia oe i vai ma inu ai i mea ua utu e taulelea.
10Ona faapaū fao ai lea o ia, ua ifo toele, ua fai atu ia te ia, Se a le mea ua e alofa mai ai ia te au, ma e silasila mai ai ia te au, o a‘u foi le tagata ese?
11Ua tali mai Poasa, ua fai mai ia te ia, Ua uma ona faaali mai ia te au mea uma ua e faia i le tinā o lau tane talu ina oti o lau tane; ma ua e tuulafoai i lou tamā, ma lou tinā, ma le nuu na fanau ai oe, a ua e sau i le nuu e te lei iloa anamua;
12ia totogi Ieova i lau galuega, ia tuuina mai ia te oe se taui tele mai ia Ieova le Atua o Isaraelu, ua e sau e faatuatua i lalo o ona apaau.
13Ua fai atu o ia, Ua alofaina a‘u e oe, le alii e, auā ua e faamafanafana mai ia te au, ma ua e tautala lelei i lau auauna fafine, o au foi, ou te le pei o se tasi o au auauna fafine.
14Ua fai mai Poasa ia te ia, A oo i le itu la e aai ai, e te faalatalata mai iinei, ma ‘ai ni areto, ma fufui āu mea e ‘ai i le vineta; ona nofo faatasi ai lea o ia ma e selesele, ua na avatu ia te ia le saito ua tunu, ua ia ‘ai ai, ua ma‘ona ua totoe.
15Ua tulai o ia e ao; ona fai atu lea o Poasa i ona taulelea, ua faapea, Ia ao lava e ia i va o fusi karite, a e aua le faamā ia te ia;
16ia to mai foi ni luutaga, ma tuu māna ina ia ao e ia, e aua le vavao atu ia te ia.
17Ua ao e ia i le fanua ua oo i le afiafi, ona sasa ai lea o mea na ia faaputuina, ua tusa ma le efa o karite.
18Ona sii ae ai lea e ia, ua alu i le aai, ua faaali atu i le tinā o lana tane le mea na faaputuina e ia; ua na avatu foi ia te ia le mea na totoe ina ua ma‘ona o ia.
19Ua fai mai le tinā o lana tane ia te ia, Po o fea na e ao ai mea i le asō? Po o fea na e galue ai? Ia manuia o ia na alofa mai ia te oe. Ona ta‘u atu ai lea i le tinā o lana tane o le tagata na ia galue i lona fanua, ma na fai atu, O le igoa o le tagata na ou galue ai i lona fanua i le asō, o Poasa.
20Ua fai mai Naomi i le avā a lana tama, Ia faamanuia o ia e Ieova, auā ua le uma lona alofa i e ola ma e ua oti. Ua fai mai foi Naomi ia te ia, Ua tatou aiga ma ia, o ia foi o so latou e i ai le tausi tama.
21Ua faapea atu foi Ruta le Moapi, Ua fai mai foi o ia ia te au, E te faatasi ma o‘u taulelea, seia latou faauma i o‘u seleselegāsaito uma lava.
22Ua fai mai Naomi ia Ruta le avā a lana tama, La‘u tama e, e lelei ina ia outou feoai ma ana auauna fafine, aua ne‘i latou iloa oe i se tasi fanua,
23Ua faatasi o ia ma auauna fafine a Poasa e ao mea; ua oo ina ua uma o le seleselegākarite ma le seleselegāsaito; ua la mau foi ma le tinā o lana tane.
Who We AreWhat We EelieveWhat We Do
2025 by iamachristian.org,Inc All rights reserved.
