1Ua fetalai mai foi Ieova ia Mose, ua faapea mai,
2Ia e fai atu i le fanauga a Isaraelu, ia faapea atu ia te i latou, Pe a outou oo atu i le nuu tou te mau ai, ou te foaiina atu ai ia te outou,
3ma outou fia fai se taulaga e fai i le afi ia Ieova, o le taulaga mu, po o se taulaga e faataunuu ai se mea ua tauto ai, po o se taulaga ua outou loto ina fai, po o se taulaga i a outou tausamiga, e fai ma mea manogi lelei ia Ieova, mai le lafu povi po o le lafu momoe;
4ona avatu ai lea e le ua fai lana taulaga ia Ieova o le taulaga i mea e ‘ai o le omera e tasi o falaoa lelei ua palua ma lona vaega e fa o le sinu o le suāuu.
5O lona vaega e fa foi o le sinu o le uaina e fai ma taulaga i mea e inu, e te saunia e faatasi ma le taulaga mu, po o le isi taulaga e faatatau i le tamai mamoe e tasi.
6A o le taulaga i mea e ‘ai mo le mamoe poa, e te faia lea i omera e lua o falaoa lelei ua palua ma lona vaega e tolu o le sinu o le suāuu.
7O le uaina foi e fai ma taulaga i mea e inu, o lona vaega e tolu o le sinu e te avatu ai, e fai ma mea manogi lelei ia Ieova.
8A e afai o le povi poa e te fai a‘i le taulaga mu, po o se isi taulaga e faataunuu ai le mea na tauto ai, po o le taulaga faafetai ia Ieova,
9ona au mai ai lea e ia faatasi ma le povi poa o le taulaga i mea e ‘ai, o omera e tolu o falaoa lelei ua palua ma le vaeluagalemu o le sinu o le suāuu.
10E te au mai ai foi o le vaeluagalemu o le sinu o le uaina e fai ma taulaga i mea e inu; o le taulaga e fai i le afi lea, o le mea manogi lelei ia Ieova.
11E faapea lava ona faia i le povi e tasi, po o le mamoe poa e tasi, po o le tamai mamoe, po o le tamai ‘oti.
12E tusa lava ma le faitau o taulaga tou te faia, e faapea lava ona outou faia i lea ma lea, ia faatatau ma lo latou faitau.
13E faapea ona faia ia mea e tagata o le nuu, pe a faia taulaga e fai i le afi, o le mea manogi lelei ia Ieova.
14Afai foi e āumau ia te outou se tagata ese, po o se tasi e ia te outou i a outou augātupulaga, e fia fai e ia se taulaga e fai i le afi, o le mea manogi lelei ia Ieova; e pei ona faia e outou e faapea lava ona faia e ia.
15E tasi le tulafono ia te outou o le faapotopotoga atoa ma le tagata ese ua āumau ia te outou, o le tulafono e faavavau i a outou augātupulaga; e pei o outou e faapea lava le tagata ese i luma o Ieova.
16E tasi lava le tulafono, e tasi lava le tu ia te outou atoa ma le tagata ese o loo āumau ia te outou.
17Ua fetalai mai foi Ieova ia Mose, ua faapea mai,
18Ia e fai atu i le fanauga a Isaraelu, ia faapea atu ia te i latou, Pe a outou oo i le nuu ou te faaoo i ai outou,
19pe a outou aai i mea e ‘ai o i le nuu, ona outou au mai ai lea o le taulaga sii ia Ieova.
20Ia outou au mai se potoi e tasi ai la outou lua‘i palugāfalaoa e fai ma taulaga sii, e pei o le taulaga sii ai le mea e soli ai saito, e faapea ona outou aumaia.
21Tou te ave lava ia Ieova le taulaga sii ai la outou lua‘i palugāfalaoa i a outou augātupulaga.
22Afai foi e sese outou i le agasala, ma outou le faia ia poloaiga uma ua fetalaia mai e Ieova ia Mose,
23o mea uma ua poloai mai ai Ieova ia te outou ia Mose, e fua mai i le aso na poloai mai ai Ieova e oo lava i a outou tupulaga amuli;
24afai foi e faia se mea ma le sese, ma le le iloa e le faapotopotoga, ona saunia ai lea e le faapotopotoga uma lava o se povi poa taanoa e tasi e fai ma taulaga mu, o le mea manogi lelei ia Ieova, atoa ma lana taulaga i mea e ‘ai, ma lana taulaga i mea e inu e tusa ma le tu, o le ‘oti poa foi e tasi e fai ma taulaga mo le agasala.
25Ona fai ai lea e le ositaulaga o le togiola mo le faapotopotoga uma lava o le fanauga a Isaraelu, ona faamagaloina ai lea o i latou; auā o le sese, ua latou au mai foi la latou taulaga, o le taulaga e fai i le afi ia Ieova, o la latou taulaga foi mo le agasala i luma o Ieova ona o lo latou sese;
26ona faamagaloina ai lea o le faapotopotoga uma o le fanauga a Isaraelu, atoa foi ma le tagata ese ua āumau ia te i latou; auā na sese le nuu uma.
27Afai foi e sese i le agasala se tagata e toatasi, ona au mai ai lea e ia se ‘oti fafine e tasi lona tausaga, e fai ma taulaga mo le agasala.
28Ona fai ai lea e le ositaulaga le togiola mo le tagata o le na sese i le agasala, pe a sese i luma o Ieova, e togiolaina ai o ia, ona faamagaloina ai lea o ia.
29E tasi lava le tulafono ia te outou i le ua agasala i le sese, o le tagata moni o le fanauga a Isaraelu, atoa ma le tagata ese ua āumau ia te i latou.
30A o le tagata na te faia se mea ma le faamaualuga, po o se tagata moni o le nuu, po o se tagata ese, ua faifaia lava e ia o Ieova, ia vavaeeseina lea tagata i lona nuu.
31Auā ua inosia e ia le upu a Ieova, ua solia foi e ia lana poloaiga; e matuā vavaeeseina lava lea tagata, e ia te ia lava lana agasala.
32Sa i le vao le fanauga a Isaraelu, ua iloa e i latou o le tagata na fai seuseu i le aso sapati.
33O i latou foi na iloa o ia o fai seuseu, ua latou aumaia o ia ia Mose, ma Arona, ma le faapotopotoga uma lava.
34Ona latou tuuina atu ai lea o ia ia leoleoina, auā e lei iloga se mea e fai ia te ia.
35Ona fetalai mai ai lea o Ieova ia Mose, E matuā fasiotia le tagata, e fetogia o ia i maa e le faapotopotoga uma i tua o le toagālauapi.
36Ona ta‘ita‘iina lea o ia e le faapotopotoga uma i tua o le toagālauapi, ma latou fetogi ia te ia i maa, ona oti ai lea o ia, e pei ona poloai mai ai o Ieova ia Mose.
37Ua fetalai mai foi Ieova ia Mose, ua faapea mai,
38Ia e fai atu i le fanauga a Isaraelu, ia faapea atu ia te i latou, ia latou faia mo i latou o tuupao i pito o latou ofu i a latou augatupulaga, ia latou tuu foi le sii uliuli i luga o le tuupao i le tafatafa;
39e fai foi lea ia te outou ma tuupao, ina ia outou vaavaai i ai, ma ia outou manatunatu ai i poloaiga uma a Ieova, ma ia outou faia; ina ne‘i usiusitai outou i o outou loto ma o outou mata, auā o mea ia ua faasesesooina ai outou;
40ina ia outou manatua, ma ia outou faia a‘u poloaiga uma lava, ia paia foi outou mo lo outou Atua.
41O a‘u lava o Ieova o lo outou Atua, o le na aumaia outou ai le nuu o Aikupito, ina ia fai a‘u mo outou Atua; o a‘u lava o Ieova o lo outou Atua.
Who We AreWhat We EelieveWhat We Do
2025 by iamachristian.org,Inc All rights reserved.
