1Ona tatou liliu ane lea, ma tatou o ae i le ala i Vasana, ona latou o mai lea, o Oko le tupu o Vasana, o ia ma lona nuu uma lava e faafetaiai ia te i tatou e tau ai le taua i Eterei.
2A ua fetalai mai Ieova ia te au, Aua e te mata‘u ia te ia, auā ua ou tuuina atu i lou lima o ia, ma lona nuu uma, atoa ma lona laueleele; e te faia ia te ia e pei ona e faia ia Sekono le tupu o sa Amorī, o le sa nofo i Hesepona.
3Ona tuuina mai ai lea e Ieova lo tatou Atua i o tatou lima o Oko le tupu o Vasana, ma lona nuu uma lava, ona tatou fafasi ai lea ia te i latou, na le toe lava se toatasi ia te ia.
4Na tatou aea foi ona aai uma lava i ia ona po, e leai so latou aai na le aea e i tatou, o aai e onogafulu, o le itu uma o Arakopo na pule ai Oko i Vasana.
5O aai uma lava ia ua puipuia i pa maualuluga, o puipui ua fai ma faamau faalava; atoa ma faoa aai e tele lava.
6Ona tatou faaumatia lea i latou, e pei ona tatou faia ia Sekono le tupu o Hesepona, na tatou faaumatia o tane, o fafine, ma tama iti i aai uma lava.
7A o manu uma, ma oloa o aai, ua tatou vetea mā tatou.
8O ia ona aso foi na tatou faoa ai le laueleele nai lima o tupu e toalua o sa Amorī, ua i le itu mai o Ioritana, e afua mai i le alia o Arinona, ua oo atu lava i le mauga o Heremoni,
9(na igoa Heremoni e tagata o Saitonu, o Siriona, a ua igoa e sa Amorī, o Senira);
10o aai uma lava i le eleele laugatasi, ma Kiliata uma, ma Vasana uma ua oo atu i Saleka ma Eterei, o aai i nuu na pule ai Oko i Vasana.
11Auā ua na o Oko le tupu o Vasana, na toe i tagata maualuluga; faauta i lona moega, o le moega uamea, e le o loo i Rapa ea, o le aai o le fanauga a Amoni? E iva kupita o lona umi lea, e fa kupita o lona lautele lea, o le kupita o le tagata lea.
12O le nuu lea sa fai mo i tatou i ia ona po, e pau mai i Aroeru e lata ane i le alia o Arinona, ma le tasi itu o le mauga o Kiliata, ma ona aai ua ou foaiina atu i sa Reupenā, ma sa Katō.
13O le toe itu o Kiliata, ma Vasana uma, na pule ai Oko, ua ou foaiina atu ai i le vaega o le itu aiga o Manase; o le itu uma o Arakopo, o Vasana uma lava, sa ta‘ua o le nuu o tagata maualuluga.
14O Iairo le atalii o Manase ua na faoa le itu uma o Arakopo, ua oo atu i le tuaoi o Kasuri, ma Maaka, ua na faaigoaina ai i lona lava igoa, o Vasanahavota-Iairo, ua oo i nei ona po.
15Ua ou foaiina atu foi Kiliata ia Makiro;
16ua ou foaiina atu foi i sa Reupenā, ma sa Katō, e afua mai i Kiliata, ua oo atu i le alia o Arinona, o i totonu lava o le alia, ma le tuaoi; ua oo atu lava i le alia o Iapoka, o le tuaoi lea o le fanauga a Amoni.
17O le eleele laugatasi foi, ma Ioritana, ma ona itu, e afua mai i Kinereta, e pau mai i le sami o i le eleele laugatasi, o le sami oona lea i lalo o Asetotapeseka i le itu i sasae.
18O ia ona po na ou fai atu ai ia te outou, ua faapea atu, Ua foai mai ia te outou e Ieova lo outou Atua lenei nuu e fai mo outou; o outou uma o e malolosi, tou te o atu o sauni i le taua i luma o outou au uso le fanauga a Isaraelu.
19A o a outou avā, ma a outou tama iti, ma a outou manu, auā ua ou iloa ua tele a outou manu, ia latou nonofo i o outou aai ua ou avatua ia te outou;
20seia avatua e Ieova le mapusaga i o outou uso, e pei o outou na lava, seia fai foi mo i latou le nuu o i ona tala atu o Ioritana, ua foaiina atu ia te i latou e Ieova lo outou Atua; ona toe o mai ai lea o outou, e taitasi i lona tofi ua ou avatua ia te outou.
21O ia ona po na ou fai atu ai ia Iosua, ua faapea atu, Na e iloa atu i ou lava mata i mea uma lava na faia e Ieova lo outou Atua i na tupu e toalua, e faapea foi ona faia e Ieova i malo uma lava, o le a e alu atu i ai.
22Aua tou te matatau ia i latou, auā o Ieova lo outou Atua, o ia e tau mo outou.
23O ia ona po na ou aioi atu ai ia Ieova, ua faapea atu,
24Le Alii e, Ieova, ua e amataina ona faaalia mai i lau auauna o lou silisili ese ma lou aao malosi, auā o ai se Atua o i le lagi, po o le lalolagi na te mafaia ona fai o mea e pei ona e faia, e tusa foi ma lou malosi?
25Ou te aioi atu ia te oe se‘i ou alu atu ou te matamata ai i le nuu lelei o i tala atu o Ioritana, o lena mauga lelei, ma Lepanona.
26A ua toasa mai Ieova ia te au ona o outou, ma ua na le faafofoga mai ia te au, a ua fetalai mai Ieova ia te au, Soia, aua lava e te toe fai mai se upu ia te au i lea mea.
27Alu ae ia oe i le tumutumu o Peseka, ma e vaai i le itu i sisifo, ma le itu i matu, ma le itu i toga, ma le itu i sasae, ma ia e iloa ai i ou mata; auā e te le sopoia atu lena Ioritana.
28A ia e poloai atu ia Iosua, ma e faamafanafana, ma faamalosi ia te ia, auā o ia e alu atu lava i luma o le nuu nei, o ia na te tofia mo i latou le nuu e te vaaia.
29Ona tatou nonofo ai lea i le vanu e feagai ma Petepeoro.
Who We AreWhat We EelieveWhat We Do
2025 by iamachristian.org,Inc All rights reserved.
