ISAIA, 8 - Samoan Old Version Bible

O LE MATAUPU VIII.O faatafunaina o Isaraelu ma Suria.

1Ua fetalai mai Ieova ia te au, Ia e tago i se papatusi lautele, ma ia e tusi ai i le tofi a le tagata, O Maelisala-asa-pasa;

2ona ou aami lea o molimau faamaoni, o Ulia le ositaulaga, ma Sakaria le atalii o Iperekia.

3Ona ou alu ane lea i le perofeta fafine, ona to ai lea o ia, ua fanau mai foi lana tama tane; ona fetalai mai ai lea o Ieova ia te au, Ia e faaigoa ia te ia o Maelisala-asa-pasa.

4Auā a o lei oo ina iloa e le tama ona valaau, Lo‘u tamā e, ma Lo‘u tinā e, e avea le oloa o Tamaseko, e vetea foi Samaria i luma o le tupu o Asuria.

5Ua toe fetalai mai Ieova ia te au, ua faapea mai,

6Ona ua teena e lenei nuu o le vai o Seloa ua tafe lemu, ma ua fiafia ia Resina ma le atalii o Remalia;

7o le mea lea, faauta, e au mai ai e le Alii i luga ia te i latou o le vai o le vaitafe, e malosi ma le tele lava, o le tupu o Asuria lea, ma lona mamalu uma; e alu ae ia i ona alāvai uma, e lofia foi ona auvai uma.

8E tafe atu ia i Iuta, e oso ai, e lofia foi, e oo ae lava i ua; o le faloina foi o ona apaau e tumu ai le lautele o lou nuu, Emanuelu e!

9O outou nuu e, faatasi ia outou, a e lepetia outou; faalogologo mai ia outou mea mamao uma o le lalolagi e; e fufusi ia outou ia te outou, a e lepetia outou; ina fufusi ia outou ia te outou, a e lepetia outou.

10Taupulepule ia outou, a e faaleaogaina; ina fai atu ia i se upu, a e le faatumauina; auā o loo ia te i matou le Atua.

11Auā ua faapea ona fetalai mai o Ieova ia te au ma le lima malosi, ua ia vavao mai foi ia te au, aua ou te savali i le ala o lenei nuu, ua faapea mai,

12Aua tou te fai atu, O le fouvale, i mea uma e ta‘ua o le fouvale e lenei nuu; aua foi tou te fefefe i mea latou te fefefe ai, aua foi tou te matatau.

13A o Ieova o ‘au, ia paia o ia ia te outou, o ia lava tou te fefefe ai, o ia foi tou te matatau ai.

14E fai foi o ia ma malumalu; a e fai ma maa e tausuai ai, ma papa e tautevateva ai i aiga uma e lua o Isaraelu; e fai ma mailei ma matasele i e o nonofo i Ierusalema.

15E toatele foi o i latou e tautevateva, ma latou pauū, e gaugau i latou, ma maileia, e puea foi i latou.

16Fusifusi ia le mau, faamaufaailoga ia le tulafono mā o‘u soo.

17Ou te faatalitali ia Ieova, o le ua ‘alo ona fofoga i le aiga o Iakopo, ou te faamoemoe foi ia te ia.

18Faauta, o a‘u nei ma la‘u fanau, o e ua foaiina mai ia te au e Ieova, e fai ma faailoga ma mea e ofo ai ia Isaraelu, mai ia Ieova o ‘au, o le afio i le mauga o Siona.

19A latou fai atu foi ia te outou, Saili atu ia i aitu vavalo, ma taulāitu o e leo iī, ma e ua memu, ia outou tali atu, A le saili atu ea le nuu i lo latou Atua?

20Ina saili ia i le tulafono ma le mau; afai latou te le tautala e tusa ma ia upu, ua leai lava se malamalama ia te i latou.

21Latou te ui atu foi i le nuu o puapuagatia ma matelaina; a matelaina foi e ita ai lava i latou, ona latou fetuu ai lea i lo latou tupu ma lo latou Atua, ma vāai i luga;

22e vāai i latou i le laueleele, faauta foi, o le puapuaga ma le pouliuli, o le pouliuli e atuatuvale ai; e tulia foi i latou i le pogisa.