1Ua mavae atu teisi o Tavita i le tumutumu o le mauga, faauta foi, ua fetaiai ma ia o Sipa le auauna a Mefiposeta, ma asini e lua ua faanofoaina, ua faaee i o la luga o areto e lua lau, ma fuifui vine mamago e selau, ma mati mamago e potoi selau, ma le fagu pa‘u o uaina.
2Ua fetalai atu le tupu ia Sipa, O a ea au mea nei? Ua tali mai Sipa, O asini ia mo le aiga o le tupu e tietie ai; a o areto ma mati mamago e aai ai taulelea, ma le uaina e inu ai e ua lailoa i le vao.
3Ona fetalai atu lea o le tupu, Po o fea o i ai le atalii o lou alii? Ua fai mai Sipa i le tupu, Faauta, o loo nofo o ia i Ierusalema, auā ua faapea o ia, o le asō e faafoisia mai ai ia te au e le aiga o Isaraelu le malo o lo‘u tamā.
4Ona fai atu lea o le tupu ia Sipa, Faauta, e ia te oe mea uma a Mefiposeta. Ua fai mai Sipa, Ou te ifo lava ia te oe, ia alofagia a‘u e oe lo‘u alii le tupu.
5Ona oo atu lea o le tupu o Tavita i Pauri; faauta foi, ua alu ane ai le tagata o le aiga o Saulo, o Semi lona igoa, le atalii o Kira, o loo alu ane ma fetuu fano.
6Ua ia fetogi foi i maa ia Tavita, atoa ma auauna uma a le tupu o Tavita; a o le nuu uma, atoa ma e fitafita uma sa i lona itu taumatau ma lona itu tauagavale.
7Ua faapea ona fai mai o Semi i lona fetuu, Alu atu, ina alu atu ia oe le tagata ua totolima, le tagata ulavale;
8ua taui atu e Ieova ia te oe le toto uma o le aiga o Saulo, na fai oe ma tupu e sui a‘i o ia; ua tuu atu foi e Ieova le malo i le pule a Apisaloma lou atalii; faauta foi, ua tua ia te oe lou lava leaga, auā o le tagata totolima lava oe.
9Ona fai mai lea o Apisai le tama a Seruia i le tupu, O le a le mea e fetuu mai ai lena ulī mate i lo‘u alii le tupu? Se‘i ou alu atu, ou te ‘otieseina lona ulu.
10Ua fai atu le tupu, O le a ea la oulua na ia te au, o oulua le fanau a Seruia? Ia fetuu pea ia, auā ua fetalai Ieova ia te ia, Ina fetuu ia ia Tavita; o ai ea se na te fai atu ai, Se a le mea ua e faapea ai?
11Ua fai atu foi Tavita ia Apisai ma ana auauna uma, Faauta, o lo‘u atalii, o lo‘u lava gaau, o loo saili o ia ia oti a‘u; a le sili ona faapea i se a o lenei sa Peniaminā? Ia tuu ai pea ia te ia, ma ia fetuu pea, auā ua fetalai mai ai Ieova ia te ia.
12Atonu e silasila mai Ieova i lo‘u puapuaga, ma faafoi mai ia te au e Ieova le manuia e sui a‘i lana fetuu i lenei aso.
13Ona o atu lea o Tavita ma ona tagata i le ala, ua o gatasi foi ma ia o Semi i le itu o le mauga, ua fetuu fano o ia, ma togi atu maa ia te ia, ma faaeleelea o ia i efu.
14Ona oo atu lea o le tupu ma le nuu uma sa ia te ia, o loo lailoa, ona mapu lea o i latou i lea mea.
15A o Apisaloma ma le nuu uma o tagata Isaraelu ua oo i latou i Ierusalema, atoa ma Aitofele faatasi ma ia.
16Ua oo atu foi Usai le Araki le uo a Tavita ia Apisaloma; ona fai atu ai lea o Usai ia Apisaloma, Ia soifua le tupu! ia soifua le tupu!
17Ona fai mai lea o Apisaloma ia Usai, O lou alofa ea lenei i lau uo? o le a le mea na lua le o atu ai ma lau uo?
18A ua fai atu Usai ia Apisaloma, E leai lava; auā o le ua filifilia e Ieova, ma lenei nuu, ma tagata uma o Isaraelu, ou te i ai a‘u, ma ou nofo ai ia te ia;
19i le ma lea foi, o ai ea ou te auauna i ai? E le o lona alo ea? E pei ona ou auauna i lou tamā, e faapea lava ona ou auauna ia te oe.
20Ona fai ane lea o Apisaloma ia Aitofele, Ina filifili ia outou, pe se a se mea tatou te faia.
21Ua fai atu Aitofele ia Apisaloma, Alu ane ia oe i palake a lou tamā, ua tuua e ia e leoleo i le fale; ona lagona lea e Isaraelu uma, ua inosia oe e lou tamā; ona malolosi ai lea o i latou uma e ‘au ia te oe.
22Ona latou to ai lea o le fale ie mo Apisaloma i luga o le fale; ona alu ane lea o Apisaloma i palake a lona tamā i luma o Isaraelu uma.
23O le pule a Aitofele na ia pule ai i ia ona aso, ua peiseai na fesili se tasi i le afioga a le Atua; sa faapea le pule uma a Aitofele ia Tavita atoa ma Apisaloma.
Who We AreWhat We EelieveWhat We Do
2025 by iamachristian.org,Inc All rights reserved.
