1O upu nei o le feagaiga sa fetalai mai ai Ieova ia Mose ia faia ma le fanauga a Isaraelu i le nuu o Moapi, a e ese le feagaiga sa osia e ia ma i latou i Horepa.
2Ua valaau atu foi Mose ia Isaraelu uma, ua faapea atu ia te i latou, Ua outou vaaia mea uma lava na faia e Ieova i o outou luma i le nuu o Aikupito ia Farao, ma ana auauna uma, atoa ma lona nuu uma;
3o tofotofoga tetele na vaai i ai ou mata; o ia faailoga ma vavega tetele;
4a ua le foaiina mai e Ieova ia te outou le loto e lagona, ma mata e vaai, ma taliga e faalogo, ua oo mai i le aso nei.
5Na ou ta‘ita‘iina foi outou i le vao i tausaga e fagafulu; ua le pala o outou ofu na outou ofu ai, ua le pala foi o outou seevae i o outou vae.
6E lei aai outou i le areto, e lei inu foi outou i le uaina po o le ‘ava; ina ia outou iloa, o a‘u o Ieova lo outou Atua.
7Na outou o mai foi i lenei mea, ona o mai lea o Sekono le tupu o Hesepona, ma Oko le tupu o Vasana, e faafetaiai ia te i tatou e tau ai le taua, ona tatou fafasi lea ia te i laua;
8na tatou faoa foi o laua laueleele ma foai atu ai e fai ma tofi o sa Reupenā, ma sa Katō, ma le tasi vaega o le itu aiga o sa Manasē.
9O lenei, ia outou tausi i upu o lenei feagaiga, ma ia outou faia, ina ia manuia ai outou i mea uma lava tou te faia.
10Ua outou tutū uma lava i le aso nei i luma o Ieova lo outou Atua; o alii sili o outou, o outou itu aiga, o outou toeaina foi, ma o outou faipule, o tagata uma o Isaraelu;
11o outou tama iti, ma a outou avā, ma le tagata ese o ia te oe i lau toagālauapi, o le na te fai au fafie atoa ma le na te utufia mai ou vai;
12ina ia e faia le feagaiga ma Ieova lou Atua, ma lana tautoga, o loo fai e Ieova lou Atua ma oe i le aso nei;
13ina ia faatumauina oe e ia i le aso nei e fai ma nuu mona, ia fai foi o ia mou Atua; e pei ona fetalai mai ai o ia ia te oe, e pei ona tauto ai foi o ia i ou tamā, o Aperaamo, ma Isaako, ma Iakopo.
14E le gata foi ia te outou lenei feagaiga ma lenei tautoga ou te faia;
15a e atoa ma e o tutū iinei faatasi ma i tatou i le aso nei i luma o Ieova lo tatou Atua, atoa ma i latou e le o faatasi iinei ma i tatou i le aso nei;
16(auā ua outou iloa lo tatou nonofo i le nuu o Aikupito, ma lo tatou ui mai i nuu na outou ui mai ai;
17na outou iloa foi a latou mea e inosia, ma a latou tupua, o laau ma maa, o ario ma auro, sa ia te i latou;)
18ne‘i i ai ia te outou se tane, po o se faine, po o se aiga, po o se itu aiga, e liliu ese lona loto i le aso nei, ia Ieova lo tatou Atua, ma alu ai e auauna i atua ese o na nuu; ne‘i i ai ia te outou se aa e tupu mai ai mea oona ma laena;
19a oo foi ina faalogo o ia i upu o lenei faafanoga, ona faaamuia lea o ia e ia i lona loto, e faapea ifo, E ui lava ina ou savali i le vaogata o lo‘u loto, ma ou faaopoopo i le fia inu, o le inu ia onā, a e filemu lava a‘u;
20e le finagalo Ieova e faamagalo ia te ia, a e pusa mai le toasa o Ieova ma lona fuā i lea tagata; e faaee foi ia te ia o mala uma lava ua tusia i lenei tusi; e sōloia foi e Ieova lona igoa ai le lalolagi.
21E vavae ese foi Ieova ia te ia i itu aiga uma lava o Isaraelu ia leaga, e tusa ma mala uma o le feagaiga ua tusia i le tusi o lenei tulafono;
22o le tupulaga foi amuli o a outou fanau o e tutupu pe a mavae atu outou, ma le tagata ese e sau mai le nuu mamao, e fai mai i latou, pe a vaai i latou i mala o lena nuu, ma ma‘i foi e mamai ai tagata ia Ieova;
23o le teio ma le masima, e mu ai le laueleele uma; e le ma totōina, e le fua mai, e le tutupu ai ni vao iti, e pei o le faaumatia o Sotoma ma Komoro, o Atama ma Sepoima, sa faaumatia e Ieova i lona toatamai ma lona toasa;
24e faapea ane lava o nuu uma, Se a le mea ua faapea ai ona fai e Ieova i lena nuu? Se a le mea ua aasa tele ai lenei toasa?
25Ona latou tali mai ai lea, Auā ua lafoaiina e i latou le feagaiga ma Ieova o le Atua o latou tamā, sa osia e ia ma i latou ina o aumaia i latou e ia mai le nuu o Aikupito;
26auā na latou o ma auauna i atua ese, ma latou ifo i ai; o atua na le iloa e i latou, e lei avatu foi se mea mā latou;
27na tupu foi le toasa o Ieova i lena nuu, ina ia faaoo i ai o mala uma ua tusia i lenei tusi;
28na liaiina foi i latou e Ieova nai lo latou laueleele i lona toatamai, ma lona maemaea, ma lona toasa e matuā tele, na ia tiai foi ia te i latou i le tasi nuu e pei, ona fai i le aso nei.
29O ia Ieova lo tatou Atua mea lilo; a o mea ua faailoa mai o ia te i tatou ia ma a tatou fanau e faavavau, ina ia faia e i tatou o upu uma o lenei tulafono.
Who We AreWhat We EelieveWhat We Do
2025 by iamachristian.org,Inc All rights reserved.
