II KORINITO, 8 - Samoan Old Version Bible

O LE MATAUPU VIII.O le matamau o ekalesia i Maketonia.

1Le au uso e, matou te faailoa atu ia te outou le alofa tunoa o le Atua ua foaiina mai i ekalesia i Maketonia;

2auā na tofotofoteleina i latou i puapuaga ua atili ai lo latou olioli, atoa ma lo latou mativa matuā tele, ua sili ai le faulai o lo latou matamau.

3Auā ou te molimau, na latou loto fua i ai e tusa i a latou mea e sili foi i a latou mea.

4Ua matuā aioi mai ia te i matou ina ia talia e i matou le mea alofa, o le alofa fai tele lea e fesoasoani i le au paia.

5E le na o lea, pei ona matou faatuatua i ai, a ua muai tuuina atu i latou e i latou i le Alii, ma i matou foi i le finagalo o le Atua.

6Ua iu ina matou aioi atu ia Tito, e pei ona amataina e ia o lenei mea alofa, ia faapea foi ona faaiuina ai e ia ia te outou.

7O lenei, e pei ona faulai o mea uma ia te outou, o le faatuatua, ma le upu, ma le poto, ma le filigā uma, atoa ma lo outou alofa mai ia te i matou, ia faapea foi ona faulai ia te outou o lenei mea alofa.

8E le sa‘u upu poloai lenei ou te fai atu ai, a ona o le filigā o isi, e tofotofo foi pe moni lo outou alofa.

9Auā ua outou iloa le alofa tunoa o lo tatou Alii o Iesu Keriso, sa tamaoaiga ia, a ua faamativaina ona o outou, ina ia faatamaoaigaina outou i lona mativa.

10Ou te fai atu la‘u manatu ia te outou i lenei mea; auā e aoga lenei mea ia te outou o e na muai amataina e le na ona fai, a ua loto foi i ai talu le tausaga ua mavae.

11O lenei foi, ia outou faauma ona fai, faapei ona outou fiafia i le loto i ai, ia faapea foi ona outou faia i mea ua ia te outou.

12Auā afai ua i ai le loto fiafia, e talileleia lea, e tusa ma mea ua ia te ia, a e le tusa ma mea e le o ia te ia.

13Auā ou te le manao ina ia mapu nisi, a e lailoa outou;

14a e fai faatatau, ina ia fesoasoani lo outou tamaoaiga i lo latou matitiva i nei ona po, ma ia fesoasoani lo latou tamaoaiga i lo outou matitiva i se aso, ina ia fai faatatau; pei ona tusia,

15O le na i ai mea e tele, e leai sana mea ua toe; o le na i ai mea e itiiti, e leai se mea ua mativa ai o ia.

16Faafetai i le Atua, o le ua tuuina lea lava filigā i le loto o Tito ona o outou.

17Auā ua ia talia le aioi, a ua sili lona maelega, ua fua lava ia te ia lona alu atu ia te outou.

18Ua matou auina atu faatasi ma ia lo tatou uso ua viia i le tala lelei i ekalesia uma;

19e le na o lea, a ua filifilia foi o ia e ekalesia matou te o malaga ma ia e ave lenei mea alofa ua auauna i ai i matou, e iloa ai le viiga o le Alii lava, atoa ma lo outou loto fiafia;

20o loo faaeteete i matou i lenei mea, ne‘i ta‘uleagaina i matou e se tasi i lenei faulai o mea matou te auauna i ai;

21o loo sauniuni mea matagofie, e le na o luma o le Alii, a e atoa ma luma o tagata.

22Ua matou aau faatasi ma i laua lo matou uso, ua matou iloa soo lona filigā i mea e tele, a o lenei, ua atili ai ona filigā ona o lona faatuatua tele ia te outou.

23A fesili mai se tasi ia Tito, ua ma faatasi ma a‘u, ua ma fai galuega faatasi foi ia te outou; a fesili foi i o matou uso, o auauna i latou a ekalesia, e viia ai Keriso.

24O lenei, ia outou faaali atu ia te i latou, i luma foi o ekalesia, se faailoga o lo outou alofa, ma lo matou mitamita ona o outou.