ESOTO 30 - Samoan Old Version Bible

O LE MATAUPU XXX.O le fata e mu ai mea manogi; o le taulaga a Isaraelu.

1E te faia foi le fata faitaulaga, o le fata e mu ai mea manogi; e te faia i le laau o le setima.

2O le kupita e tasi lona umi, ma le kupita e tasi lona lau, e fai faatāfafa, o kupita e lua lona maualuga; e fai ona nifo i lea lava mea.

3E te ufiufi foi ia i le auro lelei, o lona ufi, ma ona itu e soo ai, ma ona nifo; e te fai ai foi le pale auro e faataaliolio ai.

4E te faia ona mama auro e lua, i lalo o lona pale, i ona tuli fata, i ona itu e lua e te faia; e fai ma mea e sulu ai amo e amo a‘i.

5E te faia foi o ia amo i le laau o le setima, e te ufiufitia i le auro;

6e te tuuina ai i luma o le ie puipui, o loo i luma i le atolaau o le tulafono, i luma o le nofoa o le alofa, o i luga o le atolaau o le tulafono, o le mea lea ta te fetaiai ai ma oe.

7E faamu foi e Arona i ona luga o mea manogi i taeao uma lava, pe a teuteu e ia o lamepa, ia faamu ai le mea manogi.

8Pe a tŭtŭ foi e Arona o lamepa i le afiafi, ia faamu ai e ia o mea manogi; o le mea manogi i luma o Ieova e le aunoa i o outou tupulaga amuli.

9Aua tou te faamu ai mea manogi ese, po o taulaga mu, po o taulaga i mea e ‘ai; aua foi tou te sasaa i ai ni taulaga i mea e inu.

10E faia foi e Arona i luga o nifo o le fata o le togiola i le toto o taulaga mo le agasala e togiola a‘i, ia taitasi i tausaga; e faia e ia o le togiola i o outou tupulaga amuli, ia taitasi i tausaga; e sili ona paia lea mea ia Ieova.

11Ua fetalai mai foi Ieova ia Mose, ua faapea mai.

12A ē faitau i le fanauga a Isaraelu, e faatatau i e ua tatau ona faitauina, ia latou taitasi ma au mai o latou togiola ia Ieova, pe a faitauina i latou, ne‘i oo se mala ia te i latou pe a faitauina i latou.

13O lenei le mea latou te taitasi ma au mai, o e ua faitaulia, o le vaeluaga o le sekeli, o le sekeli lea o le malumalu; (e luafulu o kire o le sekeli lea;) o le vaeluaga o le sekeli o le taulaga lea ia Ieova.

14E taitoatasi uma o e faitaulia, e afua mai i e ua luafulu o latou tausaga, atoa ma e ua matutua ai, e avatu e i latou o le taulaga ia Ieova.

15Aua le faatele e le tagata mauoa; aua foi le faaitiitia e le tagata mativa, na o le vaeluaga o le sekeli lava, pe a latou avatu le taulaga ia Ieova, e fai mo outou togiola.

16Ia e ave foi tupe e togiola a‘i le fanauga a Isaraelu, ma ia e aumaia e fai a‘i sauniga i le fale fetafai o le faapotopotoga; ina ia faia i le fanauga a Isaraelu ma faamanatuga i luma o Ieova, e fai a‘i o outou togiola.

17Ua fetalai mai foi Ieova ia Mose, ua faapea mai.

18E te faia le tanoa ‘apa memea, ma lona tulaga i le ‘apa memea, e mulumulu ai; e te tuuina foi i le va o le fale fetafai o le faapotopotoga ma le fata faitaulaga;

19e te sasaa i ai le vai; e mulumulu ai Arona ma ona atalii o latou lima atoa ma o latou vae.

20A latou o i le fale fetafai o le faapotopotoga ia latou mulumulu i le vai, ne‘i latou oti; pe a latou faalatalata foi i le fata faitaulaga, latou te auauna ai e susunu ai le taulaga e fai i le afi ia Ieova.

21Ia latou mulumulu foi o latou lima ma o latou vae, ne‘i latou oti; e fai foi ma tulafono e faavavau ia i latou, o ia ma lana fanau i o latou tupulaga amuli.

22Ua fetalai mai foi Ieova ia Mose, ua faapea mai,

23O oe foi ia e ave mea manogi e sili ona lelei, o le muro lelei e lima selau o sekeli, o le kinamoni manogi foi o le vaeluaga o lea mea, e lua selau ma le limagafulu o sekeli ia; o le kani manogi foi e lua selau ma le limagafulu o sekeli;

24o le kesia foi e lima selau o sekeli, e tusa ma le sekeli o le malumalu; e tasi foi le sinu o le uu olive.

25E te fai ai foi o le uu paia e faauu a‘i, o le uu palu fefiloi i le faiva o le fai mea manogi, e fai ma uu paia e faauu a‘i.

26E te faauu ai le fale fetafai o le faapotopotoga, ma le atolaau o le tulafono;

27o le laoai foi ma ana mea uma; o le tuuga lamepa foi ma ana mea; ma le fata e mu ai mea manogi;

28ma le fata e fai ai taulaga mu ma ana mea uma; ma le tanoa ma lona tulaga.

29E te faapaiaina ia mea, ina ia fai ma mea e sili ona paia; o mea uma lava e papai ane i ai, e paia lava ia.

30Ia e faauu foi ia Arona ma ona atalii, ma ia e faapaiaina i latou, ina ia latou faia le faiva o ositaulaga ia te au.

31E te tautala atu foi i le fanauga a Isaraelu, ia faapea atu, E fai lenei mea ma uu e paia ia te au e faauu a‘i, e oo i o outou tupulaga amuli.

32Aua ne‘i liligiina i tino o tagata; aua foi ne‘i outou faia se mea faapea, e tusa ma lenei mea, e paia lea mea, e paia pea lava ia te outou.

33O se na te palu fefiloi se uu faapea, pe faauuina ai se tagata ese, ia vavaeeseina lava ia i lona nuu.

34Ua fetalai mai Ieova ia Mose, Ia e ave ni mea manogi, o le pulu natafa, ma le sekeleta, ma le pulu kalipana, o mea manogi lelei, ma le pulu lipano lelei; ia tutusa uma lava ia mea.

35E te fai ai le mea manogi, o le mea palu fefiloi i le faiva o le fai mea manogi, e faamasimaina, e lelei, e paia.

36E te matuā tu‘ininii foi nai isi mea, ma tuuina atu ai i luma o le atolaau o le tulafono, i le fale fetafai o le faapotopotoga, i le mea ta te fetaiai ai ma oe; ia sili ona paia lea mea ia te outou.

37O le mea manogi foi e te faia, aua lava le faia se mea faapea mā outou; e paia lava lea mea ia te oe mo Ieova;

38o se na te faia se mea faapea e sogisogi i ai, ia vavaeeseina lava ia i lona nuu.