I. NOFOAIGA A TUPU, 15 - Samoan Old Version Bible

O LE MATAUPU XV.O le amiga o le atolaau ai le fale o Opete-etoma i le aai a Tavita.

1Ua fai foi e Tavita fale mona i le aai o Tavita, ma ua saunia le mea mo le atolaau a le Atua, ua faia foi le fale ie mo le atolaau.

2Ona fai atu ai lea o Tavita, E le tatau ona ave e nisi le atolaau a le Atua ua na o sa Levī; auā ua filifilia i latou e Ieova e ave le atolaau a le Atua, ma auauna ia te ia e faavavau.

3Ona faapotopotoina lea e Tavita o Isaraelu uma i Ierusalema, e avae le atolaau a Ieova i le mea ua saunia e ia e tuu ai.

4Ua faapotopotoina foi e Tavita o le fanauga a Arona, ma sa Levī;

5o le fanauga a Koato; o Urielu le alii sili, atoa ma ona uso e toaselau ma le toaluafulu.

6O le fanauga a Merari; o Asaia le alii sili, atoa ma ona uso e toalua selau ma le toaluafulu.

7O le fanauga a Keresona; o Ioelu le alii sili, atoa ma ona uso e toaselau ma le toatolugafulu.

8O le fanauga a Elisafano; o Semaia le alii sili, atoa ma ona uso e toalua selau.

9O le fanauga a Heperona; o Elielu le alii sili, atoa ma ona uso e toavalu sefulu.

10O le fanauga a Usialu; o Aminatapu le alii sili, atoa ma ona uso e toaselau ma le toasefulu ma le toalua.

11Ua aami atu e Tavita o Satoka, ma Aviata o faitaulaga, ma sa Levī, ma Urielu, ma Asaia, ma Ioelu, ma Semaia, ma Elielu, ma Aminatapu,

12ua faapea atu ia te i latou, O outou o matai sili o sa Levī; ia faapaiaina outu ia te outou, atoa ma o outou uso, e au mai ai e outou le atolaau a Ieova, o le Atua o Isaraelu, i le mea ua saunia e a‘u e tuu ai.

13Auā na osofia i tatou e Ieova lo tatou Atua, ina ua le muai aumaia e outou; aua na tatou le sailiili ia te ia e tusa ma le tulafono.

14Ona faapaiaina lea o faitaulaga, ma sa Levī ia te i latou e avae ai le atolaau a Ieova le Atua o Isaraelu.

15Ua amo e le fanauga a sa Levī le atolaau a le Atua i ona amo i o latou ua, e pei ona poloai mai o Mose e tusa ma le afioga a Ieova.

16Ua fai atu Tavita i alii sili o sa Levī, ia latou tofi ni o latou uso e usua pese i laaupese, o napeli, ma kitara, ma sumepalo, e pepese ai ma le leo tele e fiafia ai.

17Ua tofia e sa Levī o Hemana le atalii o Ioelu, i le ma Asafo le atalii o Perekia ai ona uso; na tofia foi ai le fanauga a Merari o latou uso, o Etano le atalii o Kusaia.

18O latou uso foi e aupito ane ia te i latou, o Sakaria, o Pene, ma Iaasielu, ma Semiramota, ma Ikielu, ma Uni, o Eliapo, ma Penaia, ma Maaseia, ma Matitia, ma Elipeleu, ma Mikenau, ma Opete-etoma, ma Ieielu, o le au leoleo faitotoa.

19O le au usu pese lenei; o Hemana, o Asafo, ma Etano, na tofia i latou ma sumepalo ‘apa memea e faatagitagi ai.

20O Sakaria foi, ma Asielu, ma Semiramota, ma Ikielu, ma Uni, ma Eliapo, ma Maaseia, ma Penaia, na tofia i latou ma napeli i alemota;

21o Matitia, ma Elipeleu, ma Mikenau, ma Opete-etoma, ma Ieielu, ma Asesau, na i ai kitara i seminita, e ta‘ita‘i ai le pese.

22O Kinania foi le alii sili o sa Levī, o le usu pese ia, ua na a‘oa‘o i pese, auā ua poto ia.

23O Perekia foi, ma Elekana, o leoleo faitotoa i laua mo le atolaau.

24O Sepania, ma Iosefatu, ma Natanielu, ma Amesai, ma Sakaria, ma Penaia, ma Elisara, le au faitaulaga, e a latou e faasasau i pu i luma o le atolaau a le Atua. O Opete-etoma, ma Ikia, o leoleo faitotoa i laua mo le atolaau.

25Ua o atu Tavita, ma toeaina o Isaraelu, ma alii o taitoaafe, e au mai le atolaau o le feagaiga a Ieova ma le fiafia nai le fale o Opete-etoma.

26Na fesoasoani le Atua i sa Levī e na ave le atolaau o le feagaiga a Ieova; ona latou osia lea o le taulaga, o povi poa e fitu, ma mamoe poa e fitu.

27Ua ofu Tavita i le ofu ie vavae, o sa Levī uma foi o e na ave le atolaau, ma ē pepese, ma Kinania o le usu pese sili i ē pepese. Sa ofu Tavita i le efota ie vavae.

28Ua avae e Isaraelu uma le atolaau o le feagaiga a Ieova ma le alalaga, ma le leo o le foafoa, ma pu, ma sumepalo, ua ta foi napeli, ma kitara.

29Ua oo le atolaau o le feagaiga a Ieova i le aai a Tavita, ona vaai ifo lea o Mekala le afafine o Saulo i le faamalama, ua iloa atu le tupu o Tavita o saa ma siva, ona ‘ino‘ino lea o ia ia te ia i lona loto.