1O le sefulu ma le valu o tausaga o Iosefatu le tupu o Iuta na fai ai Ioramo le atalii o Aapo ma tupu o Isaraelu i Samaria. E sefulu ma le lua tausaga na fai ai o ia ma tupu.
2Ua ia faia foi le amio leaga i luma o Ieova, a e lei ausia le amio a lona tamā ma lona tinā, auā na ia ave ese le tupua o Paala na faia e lona tamā.
3A ua pipii pea o ia i agasala a Ierepoamo le atalii o Nepata o le na faatupu le agasala ia Isaraelu, na ia le liliu ese ai lava.
4O Mesa foi le tapu o Moapi e tele lona lafu, na ia avatu foi i le tupu o Isaraelu o tamai mamoe e selau afe, atoa ma mamoe poa e selau afe, atoa ma o latou fulufulu.
5A ua mavae ona oti o Aapo, ona foua lea e le tupu o Moapi o le tupu o Isaraelu.
6O ona po foi ia na alu atu ai le tupu o Ioramo nai Samaria, ma na faitau ia Isaraelu uma.
7Ua alu foi lana feau ia Iosefatu le tupu o Iuta, ua faapea atu, Ua foua a‘u e le tupu o Moapi, pe ta te o ea ma a‘u e tau ma Moapi? Ona fai mai lea o ia, Ta te o ae lava, o a‘u e pei o oe, o lo‘u nuu e pei o lou nuu, o a‘u solofanua e pei o au solofanua.
8Ona fai atu lea o ia, O le fea ala tatou te o ae ai? Ona tali mai lea o ia, o le ala e ui i le vao o Etoma.
9Ona latou o ai lea, o le tupu o Isaraelu, ma le tupu o Iuta, atoa ma le tupu o Etoma. Ua po fitu o latou o faataamilo ai i le ala; ona leai lea o se vai e inu ai ‘au, atoa ma manu ua ia te i latou.
10Ona fai atu lea o le tupu o Isaraelu, Oi talofa! Ua faapotopoto e Ieova nei tupu e toatolu e tuuina atu i latou i lima o Moapi.
11A ua fai mai Iosefatu, E le o iinei ea se perofeta a Ieova, tatou te fesili ai ia Ieova? Ona tali atu ai lea o le tasi auauna a le tupu o Isaraelu, ua faapea atu, O loo iinei Elisaia le atalii o Safata, na na liligi le vai i lima o Elia.
12Ona fai mai ai lea o Iosefatu, O loo ia te ia le afioga a Ieova. Ona o ifo lea ia te ia o le tupu o Isaraelu, ma Iosefatu, atoa ma le tupu o Etoma.
13A ua fai mai Elisaia i le tupu o Isaraelu, O le a lau na ia te au nei? Ina maliu atu ia oe i perofeta a lou tamā, ma perofeta a lou tinā. Ona fai atu lea o le tupu o Isaraelu ia te ia, Aua, auā ua faapotopoto e Ieova nei tupu e toatolu e tuuina atu ai i latou i lima o Moapi.
14Ona fai mai ai lea o Elisaia, O loo soifua Ieova o ‘au, ou te tu atu a‘u nei i ona luma, ana le se anoa le afioga a Iosefatu le tupu o Iuta ou te ee i ai, po ua ou le tepa atu ia te oe, pe vaai atu ia te oe.
15A o lenei, ia au mai ia te au se tagata ta laaupese. Ua na ta le laaupese, ona i ai lea i ona luga le aao o Ieova.
16Ona fai atu ai lea o ia, O loo faapea ona fetalai mai o Ieova, Ia outou fai ni utu, ia soosoo utu le vanu nei.
17Auā o loo faapea ona fetalai mai o Ieova, Tou te le iloa atu se matagi, tou te le iloa atu foi se ua; a e tumu le vanu nei i vai, tou te feinu ai, o outou, ma o outou lafu, atoa ma a outou manu.
18A e itiiti lea mea ia Ieova, a e tuuina mai foi e ia o Moapi i o outou lima.
19Tou te fāsia foi aai uma e nofo ‘olo, atoa ma aai silisili uma, tou te tatuuina foi laau lelei uma, tou te tanumia foi vaipuna uma, tou te faaleaga foi fāsi fanua lelei uma i maa.
20Ua oo i le taeao, ina o fai o le taulaga, faauta, ua tafe mai le vai i le ala o Etoma, ua tumu ai le nuu i le vai.
21Ua lagona e Moapi uma ua o ae tupu e tau ma i latou, ona latou faapotopoto ai lea o i latou uma o e faatoa lavā tau ma e matutua ai, ua latou tutū i le tuaoi.
22Ua latou tulai mai i le taeao lava; ua alu ae foi le la i le vai, ona iloa ai lea e Moapi o le vai i o latou luma ua mūmū pei o le toto.
23Ua latou faapea ane, O le toto lena; ua fasia lava ia tupu, ua fefasiai i latou. O lenei, Moapi e, tatou o ia e vete.
24Ua latou oo i le toagālauapi a Isaraelu, ona tutū ai lea o Isaraelu i luga, ua fasi ia Moapi, ona latou sosola lea i te i latou; a ua latou fasi pea ia Moapi, ua oo i lo latou nuu.
25Ua latou lepetia aai, ua taitasi foi ma lafo e tagata uma lana maa i fanua lelei uma, ua tutumu ai, ua latou tatanu vaipuna uma, ua tatuuina foi laau lelei uma; a ua totoe o maa o Kiriaresa, a e peitai ua faataamilo i ai le ‘au a maata, ma faatauga i ai.
26Ua iloa e le tupu o Moapi ua faiaina o ia i le taua, ona ave lea e ia o tagata e fai pelu e toafitu selau, ina ia sofai atu i le tupu o Etoma; a ua latou le mafaia.
27Ona tago ai lea e ia i lona atalii ulumatua, na fai e sui ai o ia i le nofoaiga, ua fai a‘i le taulaga mu i luga o le pa. Sa tele foi le ita ia Isaraelu. Ona latou tuua lea o ia, a e foi atu i lo latou nuu.
Who We AreWhat We EelieveWhat We Do
2025 by iamachristian.org,Inc All rights reserved.
