1O ona masina e tolu talu ona tuua e le fanauga a Isaraelu le nuu o Aikupito, o lea lava aso na latou oo ai i le vao o Sinai.
2Auā na latou o ese i Refiti, ma latou oo atu i le vao o Sinai; ona latou to lauapi lea i le vao, ua to lauapi ai Isaraelu i le laulata o le mauga.
3Ona alu ae lea o Mose i le Atua; ona valaau mai lea o Ieova ia te ia ai le mauga, ua faapea mai, E te fai atu i le aiga o Iakopo, ma e faaali atu i le fanauga a Isaraelu, ia faapea atu,
4Na outou vaai atu i mea na ou faia i Aikupito, na ou avae ia te outou i luga o apaau o aeto, na ou au mai foi ia te outou ia te au nei.
5O lenei foi, afai tou te matuā faalogo mai i lo‘u leo, ma tausiusi i la‘u feagaiga, ona fai lea outou ma oloa tāua mo‘u, e sili i nuu uma; auā o lo‘u lava le lalolagi uma.
6E fai foi outou ma malo o ositaulaga, ma nuu paia mo a‘u; o upu ia e te tautala atu ai i le fanauga a Isaraelu.
7Ona alu lea o Mose, ua ia aami atu toeaina o le nuu, ua ia tuuina atu foi i o latou luma o upu nei uma lava na fetalai mai ai Ieova.
8Ona tali faatasi mai lea o le nuu uma, Matou te faia lava mea uma ua fetalai mai ai Ieova; ona momoli atu lea e Mose o le upu a le nuu ia Ieova.
9Ona fetalai mai lea o Ieova ia Mose, Faauta, o le a a‘u alu atu ia te oe i le ao uliuli, ina ia lagona mai e le nuu pe a ou tautala atu ia te oe, ma ia latou talitonu pea lava ia te oe. Ua ta‘u atu foi e Mose o upu a le nuu ia Ieova.
10Ua fai mai foi Ieova ia Mose, Ina alu atu ia oe i le nuu, ma ia e faapaiaina i latou i le asō ma taeao, ma ia latou ta o latou ofu;
11ma ia latou nofo sauniuni i le aso i e luā; auā o le aso i e luā e alu ifo ai Ieova i luma o le nuu atoa uma i luga o le mauga o Sinai.
12E te faia foi le tuaoi mo le nuu, e faasiosioina ai, ma ia e fai atu, Ia outou, ne‘i tou o ae i le mauga, ne‘i outou papai atu foi i ona vae mauga; ai se papai atu i le mauga, e matuā oti lava ia.
13Aua ne‘i papai ia te ia se lima; a e fetogia lava o ia i maa, pe fanaia i le u, po o se manu po o se tagata, e le ola lava ia. Pe a faalevaleva le pu ona ili, i le o ae ai i latou i le mauga.
14Ona alu ifo lea o Mose nai le mauga i le nuu, ua ia faapaiaina foi le nuu, ua latou ta foi o latou ofu.
15Ua ia fai atu foi i le nuu, Ia outou nofo sauniuni i le aso i e luā; aua ne‘i outou o ane i a outou avā.
16Ona oo lea i le aso tolu i le taeao, ua i luga o le mauga o faititili, ma uila, ma le ao uliuli, o le leo foi o le pu ua matuā tele; ona gatete ai lea o le nuu uma lava sa i le togālauapi.
17Ona au mai lea e Mose o le nuu nai le togalauapi, latou te fetaiai ma le Atua; ona latou laulaututū ai lea i lalo o le mauga.
18O le mauga o Sinai foi ua pusa atoa uma; auā na afio ifo ai Ieova i le afi, ua alu ae foi ona asu pei o le asu o se umu; ua luluteleina lava le mauga atoa uma.
19O le leo o le pu ua alualu ona tele lava; ua tautala atu Mose, ona talia mai lea e le Atua ia te ia i le siufofoga.
20Ona afio ifo lea o Ieova i luga o le mauga o Sinai, i le tumutumu o le mauga; ua valaau foi Ieova ia Mose e alu ae i le tumutumu o le mauga, ona alu ae ai lea o Mose.
21Ona fetalai lea o Ieova ia Mose, Ina alu ia oe i lalo, fai atu lava i le nuu, ne‘i latou sofaia mai e maimoa ia Ieova, ona oti ai lea o i latou e toatele.
22O ositaulaga foi o e faalatalata ia Ieova, ia faapaiaina i latou e i latou, ne‘i osofai atu Ieova ia i latou.
23A ua tali atu Mose ia Ieova, E le mafai le nuu ona ae mai i le mauga o Sinai, auā o oe na e fetalai mai ia te i matou, ua faapea mai, Ia outou fai le tuaoi, ma ia tapu le mauga ia te outou.
24Ona fetalai lea o Ieova ia te ia, Ina alu ia i lalō, i le o mai ai oulua ma Arona faatasi ma oe; a o faitaulaga ma le nuu, aua ne‘i sofaia mai i latou e ae mai ia Ieova, ne‘i osofai atu o ia ia te i latou.
25Ona alu ifo lea o Mose i le nuu, ma na fai atu ai ia te i latou.
Who We AreWhat We EelieveWhat We Do
2025 by iamachristian.org,Inc All rights reserved.
