1Ona ala usu atu ai lea o Ierupaala, o Kitiona lava lea, ma le nuu uma na ia te ia, ua ia to lauapi e latalata ane i le vaipuna i Harota; sa i ai le itu taua a Mitiana i le itu atu i matu ia i latou, e latalata ane i le mauga o More i le vanu.
2Ua fetalai mai Ieova ia Kitiona, E toatele naua le nuu o loo ia te oe; ou te le tuuina atu Mitiana i o latou lima, ne‘i mitamita mai Isaraelu, i o‘u luma e faapea mai, O lo‘u lava lima ua ola ai a‘u.
3O lenei, ia e alaga atu lava i le nuu ia latou lagona, ia faapea atu, Ai se mata‘u ma gatete, ina liliu atu ia, ma foi atu nai le mauga o Kiliata. Ona foi atu ai lea o le nuu e luafulu o afe ma afe e lua, a ua totoe le sefulu o afe.
4Ona fetalai mai ai lea o Ieova ia Kitiona, E toatele pea le nuu; ia e aveina ifo i latou i le vai, ona ou tofotofoina ai lea o i latou mo oe i lea mea; o le ou te fai atu ai ia te oe, Lua te o ma lenei, ona oulua o ai lea ma ia; o le ou te fai atu ai foi ia te oe, Lua te le o ma lenei, ona le alu ai lea o ia.
5Ua aveina ifo e ia le nuu i le vai, ona fetalai mai ai lea o Ieova ia Kitiona, O i latou uma o e etoeto i o latou laulaufaiva i le vai, e pei ona etoeto o le ulī, e te tuuese atu ia te i latou; e faapea foi i latou uma o e tootuli e inu ai.
6Ua faitauina e ua tuu o latou lima i o latou gutu, ma etoeto ai le vai, ua tolu selau o ia tagata; a o le nuu uma ua totoe, ua latou tootuli e inu i le vai.
7Ona fetalai mai ai lea o Ieova ia Kitiona, O le tolu selau o tagata e na etoeto i le vai ou te faaola ai ia te outou, ma tuuina atu Mitiana i lou lima; a o le nuu uma ua totoe, ia taitasi ma alu i lona nuu.
8Ona ave ai lea e le nuu o mea e ‘ai i o latou lima, ma a latou pu; ona aauina atu ai lea e ia o Isaraelu uma ua totoe, ia taitasi ma alu i lona fale ie; a ua taofia e ia o ia tagata e tolu selau; o le itu taua foi a Mitiana ua i lalo i le vanu.
9O lea lava po ua fetalai mai ai Ieova ia te ia, Ina tulai atu ia, ma e alu ifo i le itu tauā; auā ua ou tuuina atu i latou i lou lima.
10A e afai e te fefe ona alu ifo, lua te o ifo i le itu tauā, oulua ma Fora lau auauna;
11e te faalogo i mea ua latou fetautalatalai ai; e mulimuli ane ona malosi ai lea oe e alu ifo ai i le itu taua. Ona o ifo ai lea o ia ma Fora lana auauna i ‘au a le itu taua e pito mai.
12Ua taooto i le vanu Mitiana, ma Amaleka, atoa ma tagata uma mai sasae, e pei o sē ina taa tele; e le mafaitaulia a latou kamela, o pei o le oneone i le matafaga ona tele.
13Ua oo atu Kitiona, faauta, o loo ta‘u atu e le tasi tagata o lana miti i le tasi, ua faapea atu, Faauta, ua fai la‘u miti; faauta foi, na taavalevale le tasi potoi karite i le itu taua a Mitiana, ua oo i le tasi fale ie, ua toia ai, ona paū ai lea, ua mafuli i lalo, ua taatia lava le fale ie.
14Ona tali mai ai lea o le tasi, E leai se isi mea lenei, ua na o le pelu a Kitiona le atalii o Ioasa, o le tagata o Isaraelu lea; ua tuuina atu e le Atua i lona lima o Mitiana ma le itu taua uma.
15Ua faalogo Kitiona i le tala o le miti ma lona faamatalaga, ona ifo ai lea o ia i le Atua. Ua toe foi atu i le itu taua a Isaraelu, ua ia faapea atu ai, Tutū mai ia, auā ua tuuina mai i o outou lima e Ieova o le itu taua a Mitiana.
16Ua ia vaea le tolu o selau i ‘au e tolu, ua ia avatu foi pu i lima o i latou uma, ma kate le ‘i‘i‘o, ma sulu i totonu o kate.
17Ua ia faapea atu ia i latou, Ia outou vaavaai mai ia te au, ma ia faaa‘oa‘o mai ai lava; faauta foi, a a‘u oo i le toagālauapi e pito mai, ona outou faia lava lea e pei ona ou faia.
18A matou ilia pu, o a‘u ma i latou uma o ia te au, outou foi tou te ilia pu ia soo lava le togālauapi uma, ma outou fai ane, O le pelu a Ieova ma Kitiona.
19Ona oo atu lea o Kitiona ma tagata e toaselau ua ia te ia i le togālauapi e pito mai, i le amataga o le leoleoga i le itu po vaeloto; ua latou faatoa laga matāmoe; ona latou ilia lava lea o pu, ma taei i kate i o latou lima.
20Ona ilia lea o pu e ‘au e tolu, ma latou taei i kate, ua ‘u‘u foi sulu i o latou lima tauagavale, o pu foi i o latou lima taumatau e ili ai; ona latou alalaga atu ai lea, O le pelu a Ieova ma Kitiona.
21Ua latou tutū e taitasi i le mea sa i ai e sio ai le togālauapi; ona taufetuli ai lea o le itu taua uma, ua alalaga, ua sosola lava.
22Ua ilia pu e le tolu selau, ona faaoo atu ai lea e Ieova o le pelu a le tasi i le tasi i le itu taua uma; ona sosola ai lea o le itu taua i Peteseta i Sererata, ua oo i le tuaoi o Apelemeola, e lata ane i Tapata.
23Ua faapotopotoina tagata o Isaraelu mai Nafatali, ma Asera, ma Manase uma lava, ona latou tuliloaina ai lea o Mitiana.
24Ua aauina atu foi e Kitiona o sāvali i le mauga uma o Efaraima, ua faapea atu, Ina faaifo ia, e pupuni ia Mitiana, ia muamua ia te i latou, ma ia outou maua ai le vai, e oo atu i Petepara ma Ioritana. Ona faapotopoto ai lea o tagata uma o Efaraima, ma latou maua le vai e oo atu i Petepara ma Ioritana.
25Ona latou maua ai lea o tamaalii o Mitiana e toalua, o Oreva ma Seeva; ua latou fasia foi Oreva i luga o le papa o Oreva, o Seeva foi ua latou fasia i le mea e soli ai vine o Seeva; ua latou tuliloa ia Mitiana. Ua latou avatu ulu o Oreva ma Seeva ia Kitiona i le la itu o Ioritana.
Who We AreWhat We EelieveWhat We Do
2025 by iamachristian.org,Inc All rights reserved.
