1Ua fetalai mai foi Ieova ia Mose, ua faapea mai,
2Ia e fai atu ia Arona, ia faapea atu ia te ia, Pe a e tūtu lamepa, ia mumū mai lamepa e fitu i luma o le tuugalamepa.
3Ona faapea lea ona faia e Arona; ua tūtū e ia lamepa i luma o le tuugalamepa, e pei ona poloai mai ai o Ieova ia Mose.
4Sa faia foi lenei tuugalamepa i le auro ua togitogi faamamanuina, o lona ‘au atoa ma ona fuga ua togitogi faamamanuina; e pei o le faatusa na faaali mai e Ieova ia Mose, ua faapea ona faia e ia o le tuugalamepa.
5Ua fetalai mai foi Ieova ia Mose, ua faapea mai,
6Ina au mai ia o sa Levī ai le fanauga a Isaraelu, ma e faamamā ia te i latou.
7O le mea foi lenei e te faia ia te i latou e faamamāina ai i latou; ia e sausau atu ia te i latou i le vai mo le agasala, ia latou tafi foi o latou tino uma i le tafi, ma ia latou ta o latou ofu, ma latou faamamā ia te i latou.
8Ona latou ave ai lea o le povi poa taanoa ma lana taulaga i mea e ai, o le falaoa lelei ua palua ma le uu, e te ave foi se isi povi poa taanoa e fai ma taulaga mo le agasala.
9Ona e faalatalata mai ai lea o sa Levī i luma o le fale fetafai o le faapotopotoga; e te faapotopotoina ai foi le faapotopotoga uma o le fanauga a Isaraelu;
10ona e faalatalata mai ai lea o sa Levī i luma o Ieova; e faaee foi e le fanauga a Isaraelu o latou lima i luga o sa Levī;
11e tuuina atu foi e Arona o sa Levī i luma o Ieova, o le taulaga lulu lea a le fanauga a Isaraelu, ina ia latou anauna i le galuega a Ieova.
12Ona faaee ai lea e sa Levī o latou lima i luga o ulu o povi poa taanoa; e te fai a‘i foi le tasi ma taulaga mo le agasala, ma le tasi e fai ma taulaga mu ia Ieova, e togiolaina ai sa Levī.
13E te tuuina foi sa Levī i luma o Arona ma luma o ona atalii, e te aveina atu foi i latou e fai ma taulaga lulu ia Ieova.
14Ia faapea ona e vavaeeseina o sa Levī i le fanauga a Isaraelu; e fai mo‘u o sa Levī.
15E mulimuli ane ona ulu atu ai lea o sa Levī e auauna i le fale fetafai o le faapotopotoga; e te faamamāina i latou ma e aveina atu i latou e fai ma taulaga lulu.
16Auā ua matuā foaiina lava i latou mo a‘u ai le fanauga a Isaraelu; ua ou fai lava i latou mo‘u e sui a‘i i latou uma o e muai fanau, o ulumatua uma ia a le fanauga a Isaraelu.
17Auā o ulumatua uma a le fanauga a Isaraelu o o‘u lava i latou, o tagata atoa ma manu; o le aso lava na ou fasioti ai ulumatua uma i le nuu o Aikupito na ou faasaina ai i latou mo‘u.
18Ua ou ave foi sa Levī e sui a‘i ulumatua uma lava a le fanauga a Isaraelu.
19Ua ou foaiina foi sa Levī, ua foaiina lava ia Arona ma ona atalii ai le fanauga a Isaraelu, ina ia auauna i latou i le galuega a le fanauga a Isaraelu i le fale fetafai o le faapotopotoga, latou te fai foi le togiola mo le fanauga a Isaraelu, ina ia leai se mala i le fanauga a Isaraelu pe a faalatalata atu le fanauga a Isaraelu i le malumalu.
20Ona fai ai lava lea e Mose, ma Arona, ma le faapotopotoga uma o le fanauga a Isaraelu i sa Levī e tusa ma mea uma na poloai mai ai Ieova ia Mose i sa Levī, ua faapea lava ona fai ia te i latou e le fanauga a Isaraelu.
21O sa Levī foi ua faamamāina i latou e i latou, ma latou ta o latou ofu; ua aveina atu i latou e Arona e fai ma taulaga lulu i luma o Ieova, ua faia foi e Arona le togiola mo i latou ina ia faamamaina i latou.
22E mulimuli ane ona ulu atu ai lea o sa Levī e auauna i a latou galuega i le fale fetafai o le faapotopotoga i luma o Arona ma luma o ona atalii; e pei ona poloai mai ai o Ieova ia Mose i sa Levī, ua faapea lava ona latou faia ia te i latou.
23Ua fetalai mai foi Ieova ia Mose, ua faapea mai,
24O le mea lenei ua i sa Levī; e afua mai i e ua luafulu ma le lima o latou tausaga atoa ma e ua matutua ai, latou te ulu atu ai e auauna i le galuega o le fale fetafai o le faapotopotoga;
25a limagafulu o latou tausaga, ona latou tuu ai lea ona auauna i le galuega, ma latou le toe auauna ai lava;
26a e latou te auauna faatasi mai o latu uso i le fale fetafai o le faapotopotoga, ina ia tausi i le tausiga, a e peitai latou te le auauna i le galuega. Ia faapea ona e faia i sa Levī i o latou faiva.
Who We AreWhat We EelieveWhat We Do
2025 by iamachristian.org,Inc All rights reserved.
