1Ua sauni atu pea foi e Iopu lana lauga, ua faapea atu,
2E! Ta fia faapei o masina ua mavae; e pei o aso na tausi mai ai le Atua ia te au;
3ina o pupula mai lona lamepa i luga ae o lo‘u ulu, ma ua ou mafaia ona savali i le pouliuli ona o lona malamalama;
4e pei ona i ai o a‘u i ona po o lo‘u malosi, ina o ma faauo ma le Atua i lo‘u fale ie;
5ina o faatasi ma a‘u Le e ona le malosi uma lava, ma ua vagaia a‘u e la‘u fanau;
6ina o mulumuluina o‘u vae i le suāsusu; na faapunaia mai foi e le papa tafe suāuu mo a‘u;
7ina ou ui ane i le aai i lo‘u alu atu i le faitotoa, ma ou sauni lo‘u nofoa i le malae.
8Na iloa mai a‘u e taulelea, ma latou ‘alo‘alo ese ai; na tulai foi toeaina, ua latou laulaututū.
9Na faalologo alii sili, ma tuu o latou lima i o latou fofoga.
10Na faalologo ai siufofoga o alii; na pipii ae foi o latou laulaufaiva i o latou gutu.
11Na faalogo mai taliga, ona faaamuia mai ai lea ia te au; na iloa mai e mata, ona vivii mai ai lea ia te au.
12Auā na ou laveaiina le ua puapuagaina, ina ua valaau mai o ia, ma le ua aumatuā, atoa ma le ua leai sona fesoasoani.
13Na oo mai ia te au le faamanū o le na fai a fano; o a‘u foi na pese fiafia ai le loto o le fafine ua oti lana tane.
14Na fai le amiotonu mo‘u ofu, ma ou ofu ai; na fai la‘u faamasinoga e peiseai o se ofu talaloa ma se pulou.
15Na fai a‘u ma mata o le tauaso, o vae o le pipili, o a‘u lea.
16Na fai a‘u ma tamā o e ua matitiva; na ou suesueina foi le finauga sa ou le iloa.
17Na ou gagauina gao o le amio leaga, ma ou seia i ona nifo le mea ua faoa.
18Na ou faapea foi, Ou te oti i lo‘u ofaga, e faateleina foi o‘u aso e pei o le oneone.
19Na sosolo atu o‘u aa i le vai, na sautia foi o‘u la i le po atoa.
20Sa fou lo‘u mamalu ia te au, ma la‘u aufana sa faafouina pea i lo‘u lima.
21Sa faalogologo mai tagata ia te au, ma faatalitali mai, sa latou le tautala ina ua fai la‘u pule.
22E lei toe fai mai i latou ina ua mavae atu la‘u upu; sa mālie lava la‘u lauga ia te i latou.
23Sa latou faatalitali mai ia te au e pei ona faatalitali i le ua; sa latou faamaga o latou gutu e pei ona faamaga i le uaga mulimuli.
24A ou ‘ata‘ata ia te i latou, latou te lei taofi i ai; latou te lei faateaina foi o‘u mata fiafia.
25Sa ou filifilia lo latou ala; sa ou nofo atu foi o le sili ia te i latou; ma ou nofo e pei o se tupu i ana ‘au, e faapei o le na te faamatalaloto i e o faanoanoa.
Who We AreWhat We EelieveWhat We Do
2025 by iamachristian.org,Inc All rights reserved.
