ISAIA, 55 - Samoan Old Version Bible

O LE MATAUPU LV.Ua valaauina tagata uma lava, latou te manuia i le Mesia.

1E! outou uma o e fia inu, o mai ia i le vai, atoa ma outou ua leai ni tupe, o mai ia, ina faatau ma aai; ia outou o mai lava, ma faatau le auina ma le suāsusu, a e leai se tupe, e leai foi se tau e faatau a‘i.

2Se a le mea tou te avatu ai a outou tupe i mea e le ni mea e ‘ai, ma avatu mea na tiga ai outou i mea e le maoona ai? Se‘i matuā faalogologo mai ia ia te au, ma outou aai i mea lelei, e fiafia foi o outou loto i mea lololo.

3Uai mai ia o outou taliga, ma outou o mai ia te au; faalogologo mai ia, e ola ai o outou agaga; ou te osia foi le feagaiga e faavavau ma outou, o mea alofa ia na folafolaina ia Tavita e faamaoni lava.

4Faauta, ua ou avatua o ia e fai ma molimau i le nuu, o le ta‘imua ma le pule i le nuu.

5Faauta, e te valaau i nuu ese sa e le iloa; o nuu ese foi sa latou le iloa oe, latou te taufetuli mai ia te oe, ona o Ieova lou Atua, ma le Paia o Isaraelu; auā ua ia ta‘uleleia oe.

6Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia;

7ia lafoai e le ua amio leaga lona ala, ma le tagata agasala ia lafoai e ia ona manatu; a ia foi mai ia Ieova, ona alofa mai lea o ia ia te ia; ia foi mai i lo tatou Atua, auā na te matuā faamagaloina.

8Auā o o‘u manatu e le o outou manatu, o o‘u ala e le o outou ala, ua fetalai mai ai Ieova.

9Auā e pei ona sili ona maualuga o le lagi i le lalolagi, ua faapea ona sili ona maualuga o o‘u ala i o outou ala, ma o‘u manatu e sili i o outou manatu.

10Auā e pei ona totō ifo o le ua ma le kiona mai le lagi, a e le toe foi atu i ai, a e peitai e faasūsūina ai le laueleele, ma fua mai ai ma totogo mai ai, e tupu mai ai saito i lē lulu saito ma mea e ‘ai i le ua ‘ai;

11e faapea foi la‘u upu e alu atu ai lo‘u gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.

12Auā tou te o atu ma le fiafia, e ta‘ita‘iina foi outou ma le manuia; o atu mauga ma mauga e leo tetele ma le alaga fiafia i o outou luma, e pāti lima foi laau uma o le vao.

13E tupu ae le perosi e sui a‘i le laau tuitui; e tupu ae le atasi e sui a‘i le ogogo; e fai foi ma igoa e viia ai Ieova, e fai foi ma faailoga e faavavau e le mavae atu lava.