1Ua oo mai foi le afioga a Ieova ia te au, ua faapea mai,
2O oe na le atalii o le tagata, o loo faapea ona fetalai mai o le Alii o Ieova i le laueleele o Isaraelu, O le iuga, ua oo mai lava le iuga i pito nuu e fa o le nuu.
3Ua oo nei lava ia te oe le iuga, ou te faaoo atu foi ia te oe lo‘u ita, ma ou faamasino ia te oe e tusa ma au amio, ou te taui atu foi ia te oe i au mea e inosia uma.
4Ou te le faasaoina lava oe, ou te le faapelepeleina foi oe; a e peitai a‘u, ou te taui atu ia te oe i au amio, ma au mea e inosia e i totonu ia te oe; ona outou iloa ai lea o a‘u lava o Ieova.
5Ua faapea ona fetalai mai o le Alii o Ieova, O le mea leaga, o le mea leaga tasi, faauta, ua oo mai.
6O le iuga ua oo mai, ua oo mai lava le iuga; o loo ala ia na moe, ua faasaga ia te oe; faauta, ua oo mai.
7Ua oo mai le taeao ia te oe o lē nofo i le nuu; ua oo mai ona po, ua taunuu mai le aso e atuatuvale ai, a e le o le taalili mai o mauga.
8O lenei, ua latalata ona ou sasaa atu o lo‘u tiga i luga ia te oe, ma faaiu atu lo‘u ita ia te oe; ou te faamasino ia te oe e tusa ma au amio, ma ou taui atu ia te oe o au mea uma e inosia.
9Ou te le faasaoina, ou te le faapelepeleina; ou te taui atu ia te oe e tusa ma au amio, ma au mea e inosia e i totonu ia te oe; ona iloa ai lea e outou o a‘u o Ieova o le taia oe.
10Faauta, i le aso, faauta, ua oo mai; ua alu atu le taeao; ua fuga mai le tootoo, ua tupuolaola le faamaualuga.
11Ua tulai le saua, ua fai ma tootoo o le amio leaga; e leai so latou e toe, po o so le vao tagata o i latou, po o so latou lava; e leai foi se auega ona o i latou.
12Ua oo mai ona po, ua latalata mai lava le aso; aua le olioli lē faatau mai, aua foi le faanoanoa lē faatau atu; auā o le ita ua i luga o le vao tagata uma o i latou.
13Auā e ui ina ola pea i latou, e le toe foi le na faatau atu i le mea na faatauina; auā ua faasaga le faaaliga i lona vao tagata uma, e le toe foi ia; e leai foi se na te faamalosi ia te ia i lana lava amio leaga.
14Ua latou ilia le pu ia sauniuni mea uma; a e leai se alu atu i le taua; auā ua i ai lo‘u ita i luga o lona vao tagata uma.
15O loo i tuāpa le pelu, o loo i totonu le faamai a le oge; o le ua i le vao e oti i le pelu, o le ua i le aai e fano ia i le oge ma le faamai.
16A o e sao, e sao lava i latou, e i ai foi i latou i mauga e pei o lupe i vanu, e taitoatasi o i latou uma ma oi ona o lana amio leaga.
17E vaivai lima uma, e liu suāvai foi tulivae uma.
18E lavalava i latou i ie latalata, e ufitia i latou i le mata‘u, e mā o latou mata uma, e selemamāina foi o latou ulu uma.
19E lafoai e i latou a latou ario i fafo, ma a latou auro e fai ma mea leaga ia; o a latou ario ma a latou auro e le mafai ai ona laveaiina o i latou i le aso o le ita o Ieova; e le malilie ai i latou, e le maoona ai foi o latou manava; auā ua fai a latou amio leaga ma mea e tausuai ai.
20O le matagofie foi o a latou teuga ua latou faia lea ma mea e faamaualuluga a‘i; ua latou fai ai foi tupua o a latou mea e inosia ma a latou mea leaga; o le mea lea ua ou fai ai ia mea ma mea leaga ia te i latou.
21Ou te tuuina atu ai foi i lima o tagata ese ia vetea, ma tagata amio leaga o le lalolagi ia faoa, ma latou solia lava.
22Ou te liliu ese ia te i latou; ona latou solia lea o la‘u mea lilo; auā e ulu ane i ai tagata saua, ma latou solia.
23Ina fai ia o se maea uamea; auā ua tumu le nuu i amio e tatau i ai le oti, ua tumu foi le aai i le saua.
24O le mea lea ou te au mai ai e ua sili ona leaga i nuu ese e fai mo latou o latou fale; ou te faaiuina foi le faamaualuga o e malolosi; e solia foi a latou mea paia.
25O loo sau le malaia; e sailiili e i latou le filemu, a e leai.
26E fetaulai malaia, e fetaulai tala, ona saili lea e i latou i le perofeta se mea na te faaalia mai; a e mavae le tulafono nai le ositaulaga, ma le pule nai toeaina.
27E faanoanoa le tupu, e ofu le alii sili i le fememeai, e gatete lima o tagata o le nuu; ou te taui atu ia te i latou e tusa ma a latou amio, ma ou faamasino ia te i latou e tusa ma a latou amioga; latou te iloa ai o a‘u lava o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
