1Le au uso e, ou te faailoa atu ia te outou le tala lelei na ou folafolaina atu ia te outou, na outou talia foi, o loo tumau i ai foi outou,
2ua ola ai foi outou; pe afai tou te taofi mau i le mataupu na folafolaina e a‘u ia te outou; pe afai ua outou le talia fua.
3Auā na ou tuuina atu ia te outou mea muamua o mea foi ia na ou maua foi e a‘u; na maliu Keriso ma sui o a tatou agasala, pei ona tusia;
4na tanu foi o ia, ma toe tu mai i le aso tolu, pei o upu ua i Tusi.
5Na iloa foi o ia e Kefa, ona iloa lea e le toasefulu ma le toalua.
6Ona toe iloa lea o ia e le au uso e lima selau ma ona tupu ina ua faatasi; o le toatele foi o ia latou o ola mai, ua oo i ona po nei; a o isi ua momoe.
7Ona toe iloa lea o ia e Iakopo, ona iloa lea e le au aposetolo uma.
8E mulimuli lava ona iloa o ia e a‘u nei, e peiseai se tama fanau le au.
9Auā o a‘u o le aupito itiiti o le au aposetolo; e le aoga ona ta‘ua o a‘u o le aposetolo, auā na ou saua atu i le ekalesia a le Atua.
10A o le alofa tunoa o le Atua ua ou faapenei ai a‘u; o lona alofa tunoa foi o ia te au, e le faaleaogaina lea, a ua sili la‘u galuega i a latou uma; a e peitai e le o a‘u, a o le alofa tunoa o le Atua ua ia te au.
11O lenei, po o a‘u, po o i latou, e faapea ona matou tala‘iina atu, sa faapea foi ona outou talitonu.
12Afai foi ua tala‘iina Keriso ua ia toe tu mai nai e ua oti, pe faapefea ona fai mai o isi o outou, e leai se toe tu mai o e ua oti?
13A e afai e leai se toe tu mai o e ua oti, po ua le toe faatuina mai Keriso;
14afai foi ua le toe faatuina mai Keriso, po ua faaleaoga la matou tala‘i, ua faaleaoga foi lo outou faatuatua.
15Ua avea foi i matou ma molimau pepelo i a le Atua; auā ua molimau i matou i le Atua, na ia toe faatuina mai Keriso, o le na le toe faatuina e ia, pe afai e moi e le toe tutū mai e ua oti.
16Auā afai e le toe tutū mai e ua oti, po ua le toe faatuina ma Keriso.
17Afai foi ua le toe faatuina Keriso, ua faaleaoga lo outou faatuatua, ua nofo sala pea outou;
18i le ma lea foi, ua fano e ua momoe ia Keriso.
19Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.
20A o lenei, ua toe faatuina mai Keriso i e ua oti, ua avea ma faapolopolo o e ua momoe.
21Auā ua oo mai le oti talu le tagata, ua oo mai foi le toe tutū o e ua oti talu le tagata.
22Auā faapei ona oti uma ia Atamu, e faapea foi ona faaolaina uma ia Keriso.
23A e peitai e taitoatasi ma lona lava tofi; o le faapolopolo o Keriso lea, mulimuli ane o e o ia Keriso e toe tutū i lona afio mai.
24Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi.
25Auā e tatau ona pule o ia, seia tuuina e ia ona fili uma lava i lalo o ona vae.
26O le toe fili e faaumatia, o le oti lea;
27auā, Ua tuuina e ia o mea uma i lalo o ona vae; a e peitai ina ua fai mai, Ua tuuina i lalo mea uma ia te ia, ua iloa tino ai, ua vavae atu le na ia tuuina i lalo o mea uma ia te ia.
28Pe a uma foi ona tuuina i lalo ia te ia o mea uma, ona tuuina i lalo foi lea o le Alo lava i le na tuuina i lalo ia te ia o mea uma, ina ia pule aoao le Atua i le aoao o mea.
29A faapea, pe faapefea e ua papatisoina ma sui o e ua oti? Afai e moni, e le toe tutū e ua oti, ona o le a ea ua papatisoina ai i latou ma sui o e ua oti?
30Se a foi e pagatia ai i matou i itu aso uma lava?
31Ou te augani i le mitamita ua ia te au ona o outou ia Keriso Iesu lo tatou Alii, ou te oti i aso fai soo.
32Se a ea se aoga ia te au ona ua ou tau ma manu feai i Efeso, pei o le tu a tagata, pe afai e le toe tutū e ua oti? ina tatou aai ma inu, auā o a taeao tatou te oti ai.
33Aua ne‘i faaseseina outou, O le feoai ma e amio leaga e leaga ai amio lelei.
34Ina ala mai ia i le amiotonu, a e aua ne‘i agasala; auā ua pouliuli nisi i la le Atua; ou te faapea atu ia te outou e faamā ia te outou.
35A e fai mai se tasi, Pe faapefea ona toe tutū mai o e ua oti? se a foi le uiga o le tino latou te o mai ai?
36O oe na le valea; o le mea e luluina e oe e le ola lea pe afai e le pala.
37O le mea foi e te lulu, ua e le luluina le tino e tupu ai; a o le fua lava, atonu se saito, po o se tasi o ia mea.
38A e avane i ai le tino e le Atua, pei ona finagalo i ai o ia; o fua foi taitasi ma lona lava tino.
39Ua le tino e tasi tino uma lava; a e ese le tino o tagata, ese le tino o manu, ese le tino o i‘a, ese le tino o manu felelei.
40E i ai foi tino faalelagi ma tino faalelalolagi; a e ese le matagofie o le faalelagi, ese lo le faalelalolagi.
41E ese le pupula o le la, ese foi le pupula o le masina, ese foi le pupula o fetu; auā ua ese le pupula o le tasi fetu i lo le tasi fetu.
42E faapea foi le toe tutū mai o e ua oti; eluluina ma le pala, e toe faatuina mai ma le le pala;
43e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi;
44e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga.
45E faapea foi ona tusia, Na faia Atamu le uluai tagata ma tagata ola; a o le Atamu mulimuli, o le Agaga faaola o ia.
46A e peitai e le muamua le faaleagaga, a o le faaletino; ona mulimuli ai lea o le faaleagaga.
47E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi.
48Pei o lē faaleeleele, e faapea lava o e faaleeleele; pei o lē faalelagi, e faapea lava o e faalelagi.
49Faapei ona foliga o i tatou i lē faaleeleele, e faapea lava ona foliga o i tatou i lē faalelagi.
50Le au uso e, o la‘u upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale.
51Faauta mai, ou te ta‘u atu ia te outou le mea lilo; e le momoe i tatou uma, a e liua i tatou uma,
52e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou.
53Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava.
54Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia. Ua faaumatia le oti i le manumalo.
55Le oti e, o fea o i ai lou tui? Le tuugamau e, o fea o i ai lou mauumalo?
56O le tui o le oti, o le agasala lea, o le malosi foi o le agasala o le tulafono lea;
57a e faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso.
58O lenei, o‘u uso pele e, ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa ina ua outou iloa e le se mea faaleaoga lo outou tautiga i le Alii.
Who We AreWhat We EelieveWhat We Do
2025 by iamachristian.org,Inc All rights reserved.
