1Ona ave ai lea e le nuu uma o Iuta ia Usia i le sefulu ma le ono o ona tausaga, ma ua tofia o ia e fai ma tupu e sui a‘i lona tamā o Amasia.
2Ua ia faia Elata, ma na toe tuuina mai ai ia Iuta, ina ua taoto le tupu faatasi ma ona tamā.
3E sefulu ma le ono o tausaga o Usia, ina ua fai o ia ma tupu, ua fai foi o ia ma tupu i tausaga e limagafulu ma le lua i Ierusalema. O Iekalia foi le igoa o lona tinā, o le Ierusalema ia.
4Ua ia faia le amiotonu i luma o Ieova, e tusa ma mea uma na faia e lona tamā o Amasia.
5Ua ia saili atu i le Atua i ona po o Sakaria o le sa poto i faaaliga mai le Atua; o aso foi na ia saili atu ai ia Ieova sa faamanuia o ia e le Atua.
6Ua alu atu foi o ia ua tau ma Filisitia, ma sŏloia le pa o Kata, ma le pa o Iapene, ma le pa o Asetota, ma ua faia e ia o aai i Asetota ma Filisitia.
7Ua fesoasoani mai foi le Atua ia te ia e tau ma Filisitia, ma tagata o Arapi o e nonofo i Kuro-paala, ma tagata o Maona.
8Ua aumaia foi e tagata o Amoni o taulaga ia Usia; ua avea foi lona logo e oo atu i le ala e ui ai i Aikupito; auā na ia matuā faamalosi lava.
9Ua faia e Usia ‘olo i Ierusalema i luga o le faitotoa o le tulimanu, ma luga o le faitotoa o le vanu, ma luga o le tulimanu o le pa, ua na faia ia malolosi.
10Ua faia foi e ia o ‘olo i le vao, ma ua eli vaieli e tele; auā sa ia te ia o lafu manu e tele i le nuu maulalo, ma le eleele laugatasi; o tagata galuefanua foi, ma tagata galuevine i mauga ma Karamelu; auā sa fiafia o ia i galuega i le fanua.
11Sa ia Usia o ‘au, o tagata tau o e na o atu i fuai ‘au e tau ai taua, e tusa ma le faitau aofai o i latou e Ieielu le tusiupu, ma Maaseia le faipule, e i le pule foi a Hanania, o le tasi alii ave ‘au a le tupu.
12O le faitau aofai o matai sili, o toa malolosi, e lua afe ma le ono o selau.
13Ua latou pule i ‘au tau e tolu selau o afe ma le fitu o afe ma le lima o selau, o e taulia taua ma le loto tetele, e fesoasoani i le tupu e tau ma e ita mai.
14Ua saunia foi e Usia mo ia ‘au uma o talita, ma tao; ma pulou tau, ma ofu tau uamea, ma aufana, ma maa o maata.
15Ua faia e ia i Ierusalema o mea e fana a‘i, ua mafaufauina e tagata popoto i galuega, ma tuu ai i luga o ‘olo, ma luga o tulimanu o le pa, e fana a‘i u ma maa tetele. Ua oo atu lona logo i mea mamao; auā e maeu le fesoasoani ia te ia, ua oo ina malosi lava o ia.
16Ua malosi o ia, ona faamaualugaina lea o lona loto, e iu ai i lona malaia; auā ua ia agasala atu ia Ieova, lona Atua, ua alu atu i le malumalu o Ieova e faamu ai mea manogi i luga o le fata e faamu ai mea manogi.
17Ona mulimuli atu lea ia te ia o Asaraia le faitaulaga, atoa ma faitaulaga a Ieova e toavalugafulu faatasi ma ia, o tagata loto tetele;
18Ona latou tetee lea ia Usia le tupu, ua latou faapea atu ai, Usia e, e te le aia ona faamu o mea manogi ia Ieova, a o le au faitaulaga o le fanauga a Arona, ua faapaiaina i latou e faamu ai mea manogi; maliu ese ia oe i le malumalu; auā ua e agasala lava; e le oo ai ia te oe se mamalu mai ia Ieova le Atua.
19Ona ita ai lea o Usia, sa i lona lima le ipu e mu ai mea manogi; o loo ita o ia i le au faitaulaga, ona tupu loa lea o le lepela i lona muaulu i luma o le au faitaulaga i le fale o Ieova, i tafatafa o le fata e mu ai mea manogi.
20Ua vaavaai atu ia te ia o Asaraia le faitaulaga sili, ma le au faitaulaga uma, faauta foi, ua i ai ia te ia le lepela i lona muaulu, ona latou tuli atu ai lea ia te ia ai lea mea; o ia foi ua faataalise ona alu i fafo, auā ua taia o ia e Ieova.
21Sa lepela Usia le tupu ua oo i le aso na oti ai, ma ua faleesea o ia, ina ua lepela; auā ua faateaeseina o ia i le fale o Ieova. O Iotama foi lona atalii na pule i le aiga o le tupu, o faamasino e ia o tagata o le nuu.
22O toe o mea na faia e Usia, o mea muamua ma mea mulimuli, ua tusia e Isaia le perofeta o le atalii o Amota.
23Ua taoto Usia faatasi ma ona tamā, ma latou tanumia o ia faatasi ma ona tamā i le fanua e tanu ai ua i tupu; auā ua faapea a latou, O ia o le lepela. Ona soloai ane ai lea o Iotama lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
