1Ona alu ane lea o Iosefa ia Farao ma na ta‘u atu ia te ia, o loo faapea atu, Ua o mai mai le nuu o Kanana o lo‘u tamā, ma o‘u uso, ma a latou lafu mamoe, ma a latou povi, ma mea uma lava o loo ia i latou; faauta foi, o loo i le laueleele o Kosena i latou.
2Ua ave foi e ia ni ona uso o tagata e toalima, ma tuu atu i latou i luma o Farao.
3Ona fai mai lea o Farao i ona uso, Se a ea lo outou faiva? Ona tali atu lea o i latou ia Farao, O leoleo mamoe au nei auauna, o i matou nei atoa ma o matou tamā.
4Ua latou fai atu foi ia Farao, Ua matou o mai, matou te āumau i le nuu nei, auā ua leai ni mea e faga a‘i lafu mamoe a au auauna, ina ua velavela le oge i le nuu o Kanana; o lenei, pe te finagalo ia nonofo au auauna i le laueleele o Kosena.
5Ona fai mai lea o Farao ia Iosefa, o loo faapea mai, Ua o mai ia te oe lou tamā ma ou uso;
6o loo i ou luma lava le laueleele o Aikupito; ia e tuuina atu lou tamā ma ou uso e nonofo i le fanua e sili ona lelei; ia nonofo i latou i le laueleele o Kosenai afai foi ua e iloa ni o latou ua malolosi, ia fai i latou ma leoleo sili i a‘u manu.
7Ona au mai lea e Iosefa o lona tamā o Iakopo ma ua tuu atu ia te ia i luma o Farao; ona faamanuia lea e Iakopo ia Farao.
8Ona fai mai lea o Farao ia Iakopo, E fia ea tausaga o lou olaga?
9Ona fai atu lea o Iakopo ia Farao, O tausaga ua ou āumau ai, o tausaga ia e tasi le selau ma le tolugafulu; ua itiiti ma ua leaga tausaga o lo‘u nei olaga, e lei oo i tausaga o olaga o o‘u tamā i o latou aso na latou āumau ai.
10Ona faamanuia lea e Iakopo ia Farao, ona alu ese lea o ia i luma o Farao.
11Ona tuu atu lea e Iosefa le nuu e mau ai lona tamā ma ona uso, ma na avatu ai e fai mo latou i le nuu o Aikupito i le fanua ua sili ona lelei, o le nuu o Ramese; faapei ona poloai i ai o Farao.
12Ua fagaina foi e Iosefa lona tamā, ma ona uso, ma le aiga atoa uma o lona tamā i le mea e ‘ai ua oo lava i o latou tama iti.
13Sa leai foi sina mea e ‘ai i le nuu atoa, auā ua matuā velavela le oge, ua lailoa foi le nuu o Aikupito ma le nuu o Kanana ona o le oge.
14Ona faapotopotoina lea e Iosefa o tupe uma lava na maua i le nuu o Aikupito ma le nuu o Kanana mo le saito na faatauina e i latou; ua ave foi e Iosefa o tupe i le fale o Farao.
15Ua uma foi tupe i le nuu o Aikupito ma le nuu o Kanana, ona o ane lea o Aikupito uma ia Iosefa, ua faapea mai, Ia e au mai ia te i matou ni mea e ‘ai. Ai lava a matou oti i ou luma, auā ua uma tupe.
16Ona fai atu lea o Iosefa, Ina au mai ia a outou manu, ou te faatauina a outou manu i mea e ‘ai mā outou, pe afai ua uma tupe.
17Ona latou avane lea a latou manu ia Iosefa; ona avatu lea e Iosefa ia te i latou o mea e ‘ai e faatau a‘i solofanua, ma lafu mamoe, ma lafu povi, atoa ma asini; na ia fagaina foi i latou i lea tausaga o le totogi lea o a latou lafu uma.
18Ua mavae foi lea tausaga, ona o ane lea o i latou ia te ia i lona lua o tausaga, ma latou fai mai ia te ia, Matou te le nanā i lo matou alii, ua uma tupe; o i lo matou alii foi a matou lafu manu; ua le toe lava sina mea ia i matou i luma o lo matou alii, ua na o matou tino ma o matou fanua.
19Ai lava a matou oti i ou luma, o i matou lava, a e tuufua lo matou fanua. Ia e faatauina atu i matou ma lo matou fanua i mea e ‘ai, ona fai lea o i matou ma auauna a Farao, o i matou ma lo matou fanua; ma ia e foaiina mai ni mea e toto ina ia ola i matou, ne‘i oti i matou a e le āina le fanua.
20Ona faatauina lea e Iosefa le fanua uma lava o Aikupito mo Farao; auā na faatauina atu e Aikupito e taitoatasi ma lona fanua; auā sa manumalo le oge ia i latou; i le ua avea le fanua mo Farao.
21O le nuu foi na aumaia i latou e ia i aai, e gata mai i le tasi tuaoi o Aikupito e oo atu lava i le tasi tuaoi.
22Na o fanua o le au ositaulaga, e lei faatauina e ia; auā sa i ai i ositaulaga o le vaega o mea e ‘ai mai ia Farao; na latou aai foi i o latou vaega o mea e ‘ai na foaiina atu ia i latou e Farao; o le mea lea latou te lei faatauina ai o latou fanua.
23Ona fai atu lea o Iosefa i le nuu, Faauta, ua ou faatauina mai outou i le asō atoa ma outou fanua ma Farao; faauta, o le saito lenei ma outou, tou te luluina i le fanua.
24A oo ina tupu, tou te avatua ia Farao o lona vaega e lima; a o vaega e fa ua totoe e a outou lava ia, e fai ma saito e lulu ma mea e ‘ai mā outou, atoa ma i latou ua i o outou aiga, ma mea e ‘ai ma a outou fanau.
25Ona latou tali mai lea, Ua e faaola mai lava ia te i matou; ia alofagia i matou e lo matou alii, e fai foi i matou ma auauna a Farao.
26Ua fai ai foi lea e Iosefa ma tulafono i le nuu o Aikupito ua oo mai lava i ona po nei, ia avatu ia Farao le vaega e lima; na o le fanua lava o ositaulaga ua le faia lea mo Farao.
27Ona nofo lea o sa Isaraelū i le nuu o Aikupito i le laueleele o Kosena, ma latou fai fanua ai; ua uluola foi i latou, ua faatoateleina lava.
28Sa nofo Iakopo i le nuu o Aikupito i tausaga e sefulu ma le fitu o aso foi o ona tausaga uma na ola ai Iakopo, ua tasi le selau ma le fagafulu ma tausaga e fitu.
29Ua tāu lata mai foi aso e maliu ai Isaraelu, ona aami lea e ia o lona atalii o Iosefa, ua faapea atu ia te ia, Afai ua alofagia a‘u e oe, ia e sulu mai lou lima i lalo o lo‘u aloivae, ma ia e alofa mai, ma faamaoni mai ia te au, aua lava e te tanu ia te au i Aikupito;
30a ou te taoto faatasi ma o‘u tamā, ia e avae a‘u ai Aikupito, ma e tanu ia te au i lo latou tuugamau. Ona tali mai lea o ia ia te ia, Ou te faia lava e pei ona e fai mai ai.
31Ona fai atu ai lea o ia, Ia e tauto mai ia te au; ona tauto ai lea o ia ia te ia; ona ifo ai lea o Isaraelu i le ulu o le moega.
Who We AreWhat We EelieveWhat We Do
2025 by iamachristian.org,Inc All rights reserved.
