1Ona tali atu ai lea o Iopu ia Ieova, ua faapea atu,
2Ua ou iloa e te mafaia mea uma, e le mafai foi ona vaoia se mea e te finagalo i ai.
3O ai ea lenei ua na faapouliuligia lau pule ma le le iloa? Auā ua ou tautala atu ma lo‘u le mafaufau, o mea ua sili ona faigata ia te au, na ou le iloa lava.
4Ia e faafofoga mai, o a‘u ou te tautala atu ai; ou te fesili atu ia te oe, a ia e faailoa mai ia te au.
5Sa ou faalogo ia te oe i le faalogo o o‘u taliga; a o lenei, ua vaai atu o‘u mata ia te oe;
6o le mea lea ua ou ‘ino‘ino ai ia te au, ua ou salamo foi i le efuefu ma le lefulefu.
7Ua mavae ona fetalai mai e Ieova o ia upu ia Iopu, ona faapea ane lea o Ieova ia Elifasa le Timanu, Ua tupu lo‘u ita ia te oe, ma au uo e toalua; ina ua outou le tautalatala ma le tonu ia te au, e faapei o la‘u auauna o Iopu.
8O le mea lea ia outou ave ai povi poa taanoa e fitu, ma mamoe poa e fitu, ma outou o ane i la‘u auauna o Iopu; ia outou fai a‘i le taulaga mu mo outou; ona tatalo lea la‘u auauna o Iopu mo outou; auā ou te talia o ia; ina ne‘i ou taui atu ia te outou lo outou valea, auā ua outou le tautalatala ma le tonu ia te au, e faapei o la‘u auauna o Iopu.
9Ona o ane ai lea o Elifasa le Timanu, ma Pilitati le Sua, ma Sofara le Naama, ma latou faia e tusa ma mea na fetalai ane ai Ieova ia te i latou. Ua talia foi Iopu e Ieova.
10Ua uma ona tatalo Iopu mo ana uo, ona faaae ai lea e Ieova o lana tafeaga. Ua toe au mai foi e Ieova o mea ia Iopu ua faateleina, ua lua mea i mea uma na muai ia te ia.
11Ona o mai lea ia te ia ona uso uma, ma ona tuafafine uma, ma i latou uma sa muai masani ma ia; ua latou aai foi faatasi ma ia o mea e ai i lona fale; ua latou faamafanafana foi ia te ia, ma faamatalaloto ia te ia ona o mala uma na faaoo mai e Ieova ia te ia. Ua foai mai foi ia te ia e i latou taitoatasi le tupe e tasi, taitoatasi foi ma le mama auro e tasi.
12Ua sili foi ona faamanuia e Ieova o le gataaga o Iopu i lona amataga; auā sa ia te ia mamoe e sefulu afe ma afe e fa, ma kamela e ono afe, ma povi e lua afe, ma asini fafine e tasi le afe.
13Sa ia te ia foi atalii e toafitu, ma afafine e toatolu.
14Ua ia faaigoa foi le tasi o Iemaima, ma le igoa o lona lua o Kesia, ma le igoa o lona toatolu o Kerenapuka.
15E lei iloa foi i le nuu uma ni fafine lalelei e tusa ma afafine o Iopu. Ua avatu foi ia te i latou e lo latou tamā o tofi faatasi ma o latou tuagane.
16Ona ola pea lea o Iopu, ina ua mavae o ia mea, o tausaga e tasi le selau ma le fa o sefulu. Ua ia iloa foi ona atalii, ma atalii o ona atalii, e oo atu i tupulaga e fa.
17Ona oti lea o Iopu, ua toeaina, ma ua tuutulu‘i lona ola.
Who We AreWhat We EelieveWhat We Do
2025 by iamachristian.org,Inc All rights reserved.
