1Ua fai atu Elisaia i le fafine na faaolaina e ia lana tama tane, ua faapea atu, Tu ia i luga, ina outou o ma lou aiga, ia āumau i se mea e mafai ona e āumau ai; auā ua valaau e Ieova i le oge; e oo ai foi i le nuu i tausaga e fitu.
2Ona tulai ai lea o le fafine, ua fai a‘i le upu a le tagata o le Atua; ua latou o ma lona aiga, ua āumau i le nuu o Filisitia i tausaga e fitu.
3Ua mavae ia tausaga e fitu, ona foi mai ai lea o le fafine mai le nuu o Filisitia; ua alu atu e tagi i le tupu i lona fale ma lona fanua.
4Ua tautala le tupu ma Kiasi le auauna a le tagata o le Atua, ua faapea ane, Ina ta‘u mai ia ia te au o vavega uma na faia e Elisaia.
5O loo tala atu ia i le tupu i le tagata oti na na faaolaina, faauta foi, o le fafine e ana le tama na faaolaina e ia ua tagi mai i le tupu i lona fale ma lona fanua. Ona fai ane lea o Kiasi, Le alii e, le tupu, o le fafine lava lenei, o lana tama foi lenei na faaolaina e Elisaia.
6Ona fesili atu ai lea o le tupu i le fafine, ona tala mai ai lea o ia ia te ia. Ona tofia lea e le tupu o le tasi auauna sili, ua faapea atu, Ia toe avatu ia te ia ana mea uma, atoa ma mea uma na tutupu i le fanua talu le aso na tuua ai e ia le nuu, e oo i lenei lava aso.
7Ua alu atu Elisaia i Tamaseko, a o ma‘i Peniata le tupu o Suria, ona ta‘uina atu lea ia te ia, ua faapea atu, Ua sau le tagata o le Atua iinei.
8Ona fai atu ai lea o le tupu ia Asaeli, Ia e ave se mea alofa i lou lima, i le e alu, se‘i oo i le tagata o le Atua, ma fesili atu ai ia Ieova, ia faapea ane, Pe ou te malolo i lenei ma‘i?
9Ona alu ai lea o Asaeli e oo ia te ia, ua ave foi e ia le alofa i lona lima, o mea lelei uma i Tamaseko e fagafulu avega a kamela, ona sau ai lea o ia, ua tu mai i ona luma, ua faapea mai, Ua auna mai a‘u ia te oe e lou atalii o Peniata le tupu o Suria, o loo faapea mai, Pe ou te malolo i lenei ma‘i?
10Ona fai atu lea o Elisaia ia te ia, Alu ia, fai atu ia te ia, E mafai lava ona e toe soifua; a ua faaali mai e Ieova ia te au, o le a maliu lava ia.
11Ona pulatoa atu lava lea o ona mata, ua iu ina ma ai o ia; ona tagi ai lea o le tagata o le Atua.
12Ona fai mai ai lea o Asaeli, Le alii e, se a le mea e te tagi ai? Ona tali atu lea o ia, Auā ua ou iloa le leaga e te faia i le fanauga a Isaraelu; e te susunu i o latou ‘olo i le afi, e te fasi i o latou taulelea i le pelu, e te palasi i a latou tama meamea, e te faatiau i o latou fafine totō.
13Ona fai mai ai lea o Asaeli, O le a ea? Se ulī ea lau auauna e fai ai lena mea tele? Ona tali atu ai lea o Elisaia, Ua faaali mai e Ieova ia te au, o le a fai oe ma tupu o Suria.
14Ona alu ese ai lea o ia ia Elisaia, ua alu atu i lona alii; ona fai mai ai lea o ia ia te ia, Se a ea le upu a Elisaia ia te oe? Ona tali atu ai lea o ia, Na ia fai mai ia te au e te toe soifua lava oe.
15Ua oo i le taeao, ona tago lea o ia i le ie māfiafia, ua fufui i le vai, ona faapulou a‘i lea ona fofoga, ua oti ai. Ona soloai ane ai lea o Asaeli e fai ma tupu.
16O le lima o tausaga o Ioramo le atalii o Aapo le tupu o Isaraelu, a o fai Iosefatu ma tupu o Iuta, na fai ai Ioramo le atalii o Iosefatu ma tupu o Iuta.
17O le tolugafulu ma le lua o ona tausaga na fai ai o ia ma tupu; e valu foi tausaga na fai ai o ia ma tupu i Ierusalema.
18Na ia savali foi i le ala o tupu o Isaraelu, pei ona faia e le aiga o Aapo; auā o le afafine o Aapo na fai mana avā, ua fai foi e ia le amio leaga i luma o Ieova.
19A e lei finagalo Ieova ona faaumatia o Iuta, ona o lana auauna o Tavita, faapei ona fetalai mai o ia ia te ia, e tuuina mai le lamepa ia te ia ma ana fanau i aso uma.
20O lana nofoaiga na foua ai Iuta e Etoma, ua latou faanofo so latou lava tupu.
21Ona alu atu ai lea o Ioramo i Seira, ua ia te ia foi o kariota uma. Ona tulai lea o ia i le po, ua na fasi ia Etoma na sio ia te ia, atoa ma alii o kariota, ona sola ai lea o le nuu i o latou fale ie.
22A ua foua le pule a Iuta e Etoma, ua oo lava i ona po nei. O ia ona po foi na fou ai Lipena.
23O toe o mea na faia e Ioramo, atoa ma mea uma na faia e ia, e lei tusia ea i le tusi o tala i nofoaiga a tupu o Iuta?
24Ua taoto foi Ioramo faatasi ma ona tamā, ua tanumia foi faatasi ma ona tamā i le aai o Tavita. Ona soloai ane ai lea o Aasaia lona atalii e fai ma tupu.
25O le sefulu ma le lua o tausaga o Ioramo le atalii o Aapo le tupu o Isaraelu, na fai ai ma tupu o Aasaia le atalii o Ioramo le tupu o Iuta.
26Ua fai ma tupu Aasaia i le luafulu ma le lua o ona tausaga; e tasi foi le tausaga na fai ai o ia ma tupu i Ierusalema. O le igoa o lona tinā o Atalia, le afafine o Omeri le tupu o Isaraelu.
27Ua ia savali foi i le ala o le aiga o Aapo, ua na fai foi le amio leaga i luma o Ieova, pei o le aiga o Aapo; auā na aiga o ia ma sa Aapō.
28Ua la o ma Ioramo le atalii o Aapo i le taua ma Asaeli le tupu o Suria i Ramota-Kiliata, ona manua lea o Ioramo ia Suria.
29Ona foi ai lea o Iorama le tupu i Isereelu, ia fofo ai ona manua na manua ai ia Suria i Rama, ina ua tau o ia ma Asaeli le tupu o Suria. Ona alu ifo ai lea o Aasaia le atalii o Ioramo le tupu o Iuta e o‘oo‘o ia Ioramo le atalii o Aapo i Isereelu, auā ua manua ia.
Who We AreWhat We EelieveWhat We Do
2025 by iamachristian.org,Inc All rights reserved.
