1Alu ifo ia, ina e nofo i le efuefu, o oe le taupou le tama teine a Papelonia, ina nofo i le eleele, e leai se nofoālii, o oe le tama teine a Kaletaia; auā e le toe ta‘ua oe, O le ua tino văivai ma le faapelepeleina.
2Tago ia i maaolo ma e olo falaoa; suesue lou ie ufimata, agini ae ia le ofu laei, faaaliali lou vae, asa atu i vaitafe.
3E faaalia lou tino, e vaaia foi lou mā; ou te taui ma sui, ou te le mafai ona ia tu mai se tagata.
4O le na faatauina i tatou, o Ieova o ‘au lona suafa, o le Paia o Isaraelu.
5Nofo faalologo ia, ma e alu i le pouliuli, o oe le tama teine a Kaletaia; auā e le toe ta‘ua oe, O le tamaitai e pule i malo.
6Na a‘u tiga i lo‘u nuu, na ou faatagaina lo‘u tofi; na ou tuuina atu i latou i lou lima, na e le alofa lava ia i latou, na e matuā faamamafaina lau amo i luga o toeaina.
7Na e fai ane foi, E fai a‘u ma tamaitai e faavavau; o lea na e le mafaufau ai i nei mea, ua e le manatua le iuga o ia mea.
8O lenei, faalogo mai ia i lenei mea, o oe le sa‘oloto i mea a le tino, o lē nofo faatalanoa, o lē fai ifo i lou lava loto, Ua na o a‘u, a e leai lava se tasi; ou te le nofo o le fafine ua oti lana tane, ou te le iloa ona āufanaua.
9E oo mai lava ia te oe nei mea e lua, e faafuasei i le aso e tasi, o le āufanaua ma le oti o lau tane; e ui lava i le tele o au togafiti faataulāitu, ma le malosi o au ‘apere e matuā oo mai lava ia te oe.
10Ua e faatuatua foi i lou leaga; ua e fai ane, E leai se iloa mai a‘u; o lou poto ma lou malamalama, o mea lava ia ua faaliliueseina ai oe; ua e faapea ifo foi i lou lava loto, Ua na o a‘u lava, a e leai se tasi.
11O le mea lea e oo mai ai le leaga ia te oe, e te le iloa ona gafoa o lona ata; e paū i ou luga le malaia e te le mafai ai sona togiola; e oo mai foi ia te oe le faatafunaina e faafuasei; e te le iloa.
12Ia e finau i au ‘apere ma le tele o au togafiti faataulāitu, ua e lailoa ai talu ina e itiiti; ai lava ua aoga ia te oe, ai lava e te faamatau mai ai.
13Ua tigaina oe i le tele o au filifiliga; se‘i tutū mai o e vaevaea le lagi, o e vaavaai i fetu, o e iite i ona po o le masina faatoa vaaia, ma latou faaolaina oe i mea o le a oo ia te oe.
14Faauta, e avea i latou e pei o tagutugutu o saito; e susunuina i latou i le afi; e le laveaiina i latou e i latou ai le malosi o le mumū o le afi; e leai se malala ola e mumulu ai, po o se afi e nofo atu ai i ona luma.
15E faapea lava ia te oe o i latou ua e lailoa ai; o e ua faatau ma oe talu ina e teine itiiti; e taitasi ma alu i lona lava ala; e leai se na te faaola ia te oe.
Who We AreWhat We EelieveWhat We Do
2025 by iamachristian.org,Inc All rights reserved.
