1Ua toeaina lava Aperaamo, ua tele ona tausaga; ua faamanuia foi Ieova ia Aperaamo i mea uma.
2Ona fai atu lea o Aperaamo i lana auauna o le toeaina o le aiga, sa pule i ana mea uma, Se‘i sulu mai ia lou lima i lalo o lo‘u aloivae;
3ma ia e tauto mai ia te au ia Ieova, o le Atua o le lagi, ma le Atua o le lalolagi, e te le au mai se avā a lo‘u atalii i fafine o Kanana, o le nuu ou te nofo ai nei.
4A ia e alu atu i lo‘u nuu ma lo‘u aiga, ma e au mai ai se avā mā lo‘u atalii o Isaako.
5Ona tali mai lea o le auauna ia te ia, Pe afai e le mafai le fafine ona ma o mai i le nuu nei, ma te matuā o atu ea ma lou atalii i le nuu na e sau ai?
6Ona fai atu lea o Aperaamo ia te ia, Ia oe, ne‘i e ave lava lo‘u atalii i lea mea.
7O Ieova, o le Atua o le lagi, o le na aumaia a‘u mai le aiga o lo‘u tamā, ma le nuu o lo‘u aiga, o le na fetalai mai foi ia te au, ma na tauto mai ia te au, na faapea mai, Ou te foaiina lenei lava nuu mo lau fanau; e auina atu e ia lava o lana agelu e muamua ia te oe; e te au mai foi se avā mā lo‘u atalii ai lea mea.
8A e afai e le mafai le fafine ona oulua o mai ma ia, ona e magalo ai lea ai lau tautoga nei; a e aua lava lua te o atu ma lo‘u atalii i lea mea.
9Ona sulu ai lea e le auauna o lona lima i lalo o le aloivae o Aperaamo lona matai, ma tauto atu ia te ia i lea mea.
10Ona ave lea e le auauna o kamela e sefulu, ai kamela a lona matai, ua alu foi o ia ma mea lelei uma a lona matai i lona lima; ua tulai foi o ia, ma alu atu i Mesopotamia i le aai o Nakori.
11Ona fai atu lea o ia ia tootuli kamela i tua o le aai, e lata ane i le vaieli, i le afiafi, i le itu aso e o atu ai fafine e utu vai.
12Ona faapea atu lea o ia, Ieova e, le Atua o lo‘u matai o Aperaamo, ia e faamanuia lava ia te au i le asō, ma e alofa mai foi i lo‘u matai o Aperaamo.
13Faauta, o a‘u nei, ou te tu i luga o le vaipuna; o le a o mai foi afafine o tagata o le aai e utu vai;
14ia faapea ona fai, o le teine ou te faapea atu i ai, Se‘i e tuutuu ifo lau kate so‘u inu ae; ona faapea mai lea o ia, Ina inu ia, ou te faainua foi au kamela; o le teine lea ua o tofia mā lau auauna o Isaako; ou te iloa foi i lea mea ua e alofa mai i lo‘u matai.
15Faauta foi, e lei uma atu lana upu, a ua sau Repeka, o le afafine o Petueli, le tama tane lea a Meleka, le avā a Nakori, o le uso o Aperaamo, sa i lona ua lana kate.
16O le teine e matuā lalelei lava, o le taupou, e lei iloa e ia tane; ua alu ifo o ia i le vai, ua utu ai lana kate, ma toe alu ae.
17Ona momo‘e atu lea o le auauna e faafetaiai ia te ia, ua faapea atu, So‘u inu ae siua vai ai lau kate.
18Ona faapea mai lea o ia, Le alii e, taumafa ia; ona vave tuu ifo lea e ia o lana kate i lona lima, ma tuu atu ia te ia e inu ai.
19Ua uma ona avatu ia te ia e inu ona faapea atu lea o ia, Ou te utufia foi ma au kamela, seia latou feinu ai ia malilie.
20Ona faataalise lea o ia ma sasaa lana kate i le umete, ona toe momo‘e ifo lea o ia i le vai e utu ae, i le ua utu ae e ia ma ana kamela uma.
21O le tagata foi, ua ofo o ia ia te ia; ua faalologo i le fia iloa po ua faamanuia e Ieova lana malaga pe leai.
22Ua uma ona feinu o kamela, ona avatu lea e le tagata o le mama auro, o le vaeluagalemu o le sekeli lona mamafa, ma taulima auro e lua mo ona lima, e sefulu sekeli o lo la mamafa lea;
23ua faapea atu foi o ia, Se‘i e ta‘u mai ia te au, pe se afafine oe o ai? Pe ai ea se mea i le fale o lou tamā matou te api ai?
24Ona tali mai lea o ia ia te ia, O a‘u o le afafine o Petueli o le tama ia a Meleka, na fanau e ia ia Nakori.
25Ua faapea mai foi o ia ia te ia, O ia i matou ‘au o saito, ma mea e ‘ai e tele a manu, atoa ma le mea e api ai.
26Ona punou lea o le tagata, ma ifo atu ia Ieova.
27Ua faapea atu foi o ia, Ia faafetaia Ieova, o le Atua o lo‘u matai o Aperaamo, o le ua le tuuna lona alofa ma lona faamaoni i lo‘u matai; na ou i le ala, ona ta‘ita‘iina ai lea o a‘u e Ieova i le fale o uso o lo‘u matai.
28Ona momo‘e lea o le teine, ma ta‘u atu ia mea i le aiga o lona tinā.
29Sa ia Repeka le tuagane o Lapana lona igoa; ua momo‘e mai foi Lapana i le tagata i le vaipuna.
30Ua iloa e ia o le mama auro, ma taulima i lima o lona tuafafine, ua faalogo atu foi i upu a lona tuafafine o Repeka, ua faapea mai. Na faapea ona tautala mai o le tagata ia te au, ona alu lea o ia i le tagata, faauta foi, ua tu o ia ma kamela i luga o le vaipuna.
31Ona faapea mai lea o ia, Maliu mai ia o oe ua faamanuia e Ieova; se a le mea ua e tu ai i fafo? Auā ua uma ona ou tenteua o le fale, ma le mea e ave i ai kamela.
32Ona ulufale lea o le tagata i le fale; ona tatalaina lea e Lapana o kamela, ma avane ‘au o saito ma mea e ‘ai mā kamela, ma vai foi e mulumulu ai ona vae, ma vae o tagata na o mai ma ia.
33Ona laulauina mai ai lea ia te ia o mea e ‘ai; a ua faapea atu o ia, Ou te le ‘ai lava, a seia uma ona ou ta‘u atu o la‘u feau. Ona faapea atu lea o ia, Ina ta‘u mai ia.
34Ona faapea mai lea o ia O a‘u o le auauna a Aperaamo.
35Ua faamanuia tele lava e Ieova lo‘u matai; ua mamalu lava o ia; ua foaiina foi e ia ia te ia o lafu mamoe, ma lafu povi, ma ario, ma auro, ma auauna tane, ma auauna fafine, ma kamela atoa ma asini.
36O Sara foi le avā a lo‘u matai na fanau e ia le atalii o lo‘u matai ina o loomatua ia; ua foaiina atu foi e ia ia te ia o ana mea uma.
37O a‘u foi, na ou tauto ina ua fai mai ai o lo‘u matai, ua faapea mai, E te le au mai se avā mā lo‘u atalii i fafine o Kanana, o le nuu ou te nofo ai nei.
38A ia e alu atu i le aiga o lo‘u tamā, ma lo‘u aiga, ma au mai ai se avā mā lo‘u atalii.
39Ona ou tali atu lea i lo‘u matai, Atonu e le mafai le fafine ona ma o mai.
40Ona faapea mai lea o ia ia te au, O Ieova, o loo savali a‘u nei i ona luma, e auina atu e ia lana agelu lua te o faatasi ma ia, na te faamanuia ai lau malaga; e te au mai foi se avā mā lo‘u atalii mai lo‘u aiga, ma le aiga o lo‘u tamā.
41E te magalo i lau tauto, pe a e oo i lo‘u aiga; afai foi latou te le tuuna mai se tasi ia te oe, ona e magalo ai lea i lau tauto.
42Na ou sau foi i le aso nei i le vaipuna, ma ou faapea atu, Ieova e, le Atua o lo‘u matai o Aperaamo, afai e te faamanuia lava la‘u malaga ua ou sau ai;
43faauta, o a‘u nei, ou te tu i luga o le vaipuna, ia faapea ona fai, o le taupou e sau e utu vai, ma ou faapea atu i ai, se‘i au mai sina vai, so‘u inu ae ai lau kate;
44ona tali mai lea o ia ia te au, Ina inu ia oe, ou te utufia foi ma au kamela; o le avā lea ua tofia e Ieova mā le atalii o lo‘u matai.
45Na le uma foi ona ou faapea ifo i lo‘u loto, faauta, ua sau Repeka, ua faafuata mai lana kate; ona alu ifo lea o ia i le vaipuna ma utu ae ai; ona ou faapea atu lea ia te ia, So‘u inu ae.
46Ona vave tuu ifo lea e ia o lana kate, ma faapea mai, Ina inu ia; ou te faainua foi au kamela; ona ou inu lea; na faainua foi e ia o kamela.
47Ona ou fesili atu lea ia te ia, Pe se afafine oe o ai? Ona tali mai lea o ia, O le afafine o Petueli le atalii o Nakori, sa fanau ia te ia e Meleka; ona ou tuu atu lea o le mama i lona fofoga, ma taulima i ona lima.
48Ona ou punou lea, ma ifo atu ia Ieova, ma faafetai atu ia Ieova le Atua o lo‘u matai o Aperaamo o le na ta‘ita‘i ia te au i le ala tonu, e au mai le afafine o le uso o lo‘u matai e fai ma avā a lona atalii.
49O lenei foi, tou te ta‘u mai, pe tou te alofa ma faamaoni i lo‘u matai; a e afai e leai, ta‘u mai ia te au, ina ia ou faasaga i le itu taumatau po o le itu tauagavale.
50Ona tali mai lea o Lapana ma Petueli, ua faapea mai, Ua tupu mai ia Ieova lena mea; ma te le mafai ona fai atu ia te oe i sona lelei po o sona leaga.
51Faauta, o Repeka o i ou luma ia; ina o ia oulua ma ia, ia fai o ia ma avā a le atalii o lou matai, e pei ona fetalai mai ai o Ieova.
52Ua faalogo atu le auauna a Aperaamo i a la upu, ona ifo toele lea e ia ia Ieova.
53Ona au mai lea e le auauna o teuga ario, ma teuga auro, atoa ma ofu, ma avatu ia Repeka; ua ia foai atu foi i lona tuagane ma lona tinā o oloa tāua.
54Ona latou aai ai lea ma inu, o ia ma tagata na latou o mai ma ia, ona latou momoe ai lea; ua latou tulai foi i le taeao, ona faapea atu lea o ia, Tuu mai ia te au ia ou alu atu i lo‘u matai.
55Ona tali mai lea o lona tuagane ma lona tinā, Se‘i matou nonofo ma le teine i ni aso pe toe sefulu; a mavae mai ia, i le alu ai o ia.
56Ona faapea atu lea o ia ia te i laua, Aua lua te taofi ia te au, auā ua faamanuia mai e Ieova la‘u malaga; tuu mai ia te au ia ou alu atu i lo‘u matai.
57Ona tali mai lea o i laua, Se‘i ma valaauina ane le teine, ma fesili atu pe se a lona loto.
58Ona valaau ane lea o i laua ia Repeka, ua faapea atu foi ia te ia, Lua te o ea ma le alii nei? Ona tali mai lea o ia, Ma te o.
59Ona latou tuuina atu lea o Repeka lo latou tuafafine, ma le na tausi ia te ia, ma le auauna a Aperaamo, atoa ma ona tagata.
60Ua latou faamanuia atu foi ia Repeka, ua faapea atu ia te ia, O oe o lo matou tuafafine, ia avea oe ma tinā o afe e mano, ia maua foi e lau fanau o faitotoa o e ita mai ia te i latou.
61Ona tulai lea o Repeka, ma ona teine, ma latou tietie i kamela, ma mulimuli atu i le tagata; ua au mai Repeka e le auauna a Aperaamo, ona latou o ai lea.
62Ua sau foi Isaako i le ala e ui i Perelaaroi, auā sa mau o ia i le nuu i le itu i toga.
63Ua alu atu foi Isaako i le fanua i le afiafi e mafaufau ai; ua tepa ae foi o ia ma ilo atu, faauta foi, o kamela ua o mai.
64Ua tepa ae foi Repeka ua na ilo atu ia Isaako, ona alu ifo lea o ia i le kamela.
65Auā na ia fesili atu i le auauna, O ai lena tagata lē savali mai i le fanua e faafetaiai ia te i tatou? Na tali mai foi le auauna, O lo‘u matai ia. Ona tago ai lea o ia i le ufiufi mata, ma ufi ifo ai ia te ia.
66Ua faamatalaina atu foi e le auauna ia Isaako mea uma lava na faia e ia.
67Ona ta‘ita‘i atu lea e Isaako ia te ia i le fale ie o lona tinā o Sara, ua ave e ia o Repeka, ua fai foi o ia ma ana avā; ua fiafia foi o ia ia te ia; ona faatoa faamafanafanaina ai lea o Isaako talu ona oti o lona tinā.
Who We AreWhat We EelieveWhat We Do
2025 by iamachristian.org,Inc All rights reserved.
