1O gafa nei o Arona ma Mose i le aso na fetalai mai ai Ieova ia Mose i le mauga o Sinai.
2O igoa foi nei o atalii o Arona; o Natapu o le ulumatua ia, ma Aviu, o Eleasaro, ma Itamaro.
3O igoa ia o atalii o Arona, o faitaulaga na faauuina, e na tofia e ia e fai le faiva o ositaulaga.
4A ua oti Natapu ma Aviu i luma o Ieova ina o la faalatalata ma le afi ese i luma o Ieova i le vao o Sinai, au leai foi ni a la fanau; ona fai ai lea o le faiva o ositaulaga e Eleasaro ma Itamaro i luma o lo la tamā o Arona.
5Ua fetalai mai foi Ieova ia Mose, ua faapea mai,
6Ia e faalatalata mai le itu aiga o Levi, ma tuuina atu i latou i luma o Arona le ositaulaga, ina ia latou auauna ia te ia.
7Latou te tausi i ana mea e tausia ma mea e tausia e le faapotopotoga uma lava i luma o le fale fetafai o le faapotopotoga, e auauna ai i le galuega o le malumalu.
8Latou te tausia foi mea uma o i le fale fetafai o le faapotopotoga, ma mea e tausia e le fanauga a Isaraelu, e auauna ai i le galuega o le malumalu.
9E te avatua sa Levī ia Arona ma ona atalii; ua matuā avatua lava i latou ia te ia ai le fanauga a Isaraelu.
10E te tofia foi Arona ma ona atalii, latou te tausia lo latou faiva o ositaulaga; o le tagata ese foi e faalatalata i ai e fasiotia o ia.
11Ua fetalai mai foi Ieova ia Mose, na faapea mai,
12O a‘u foi, faauta, ua ou avea sa Levī ai le fanauga a Isaraelu e fai ma sui o ulumatua uma lava, o e muai fanauina i le fanauga a Isaraelu; e fai foi mo‘u o sa Levī;
13auā o ulumatua uma lava mo a‘u lava i latou; o le aso na ou fasi ai ulumatua uma i le nuu o Aikupito na ou faasaina ai mo a‘u o ulumatua uma lava a Isaraelu, o tagata atoa foi ma manu; mo a‘u lava i latou; o a‘u o Ieova.
14Ua fetalai mai foi Ieova ia Mose i le vao o Sinai, ua faapea mai,
15Ia e faitauina le fanauga a Levi i aiga o latou tamā, i o latou aiga; o tane uma lava, ia e faitauina i latou e afua mai i e ua tasi lo latou masina atoa ma e ua matutua ai.
16Ona faitau ai lea e ose i te i latou, e tusa ma le afioga a Ieova, e pei ona poloaiina mai ai o ia.
17O atalii ia o Levi; o latou igoa, o Keresoma, ma Koato, ma Merari.
18O igoa nei o atalii o Keresoma i o la aiga; o Lepeni ma Semi.
19O atalii foi o Koato i o latou aiga; o Amaramo, ma Isara, o Heperona, ma Usialu.
20O atalii foi o Merari i o la aiga; o Maali ma Muse. O aiga ia o sa Levī i aiga o latou tamā.
21Na tutupu mai ia Keresoma, o le aiga o sa Lepenī ma le aiga o sa Semī; o aiga ia o sa Keresomā.
22O i latou na faitaulia, o le aofai o tane uma, e afua mai i e ua tasi lo latou masina atoa ma e ua matutua ai, o i latou lava na faitaulia, e fitu o afe ma le lima o selau.
23E to lauapi aiga o sa Keresomā i tua o le malumalu i le itu i sisifo.
24O le alii sili foi o le aiga o le tamā o sa Keresomā, o Eliasafo lea o le atalii o Laeli.
25O mea foi nei e tausia e le fanauga ā Keresoma i le fale fetafai o le faapotopotoga, o le malumalu, ma le fale fetafai, ma lona ufiufi, ma le puipui tautau o le faitotoa o le fale fetafai o le faapotopotoga,
26o ie puipui foi o le lotoā, ma le puipui tautau o le faitotoa o le lotoā, o le ua felatai ma le malumalu e felatai foi ma le fata faitaulaga e faataaliolio ai, ma ona maea e fai a‘i ona sauniga uma.
27Na tutupu mai ia Koato o le aiga o sa Amaramō, ma le aiga o sa Isarā, ma le aiga o sa Heperonā, ma le aiga o sa Usialū; o aiga ia o sa Koatō.
28O le aofai foi o tane uma lava, e afua mai i e ua tasi lo latou masina atoa ma e ua matutua ai, e valu o afe ma le ono o selau, o loo tausi i le tausiga o le mea paia.
29E to lauapi aiga o le fanauga a Koato i le itu i toga o le malumalu.
30O le alii sili o le aiga o le tamā o aiga o sa Koatō, o Elisafano lea o le atalii o Usialu.
31O mea foi latou te tausia, o le atolaau, ma le laoai, ma le tuugālamepa, ma fata faitaulaga, ma mea o i le mea paia latou te auauna a‘i, ma le puipui tautau ma mea uma e fai a‘i ona sauniga.
32O Eleasaro le atalii o Arona le faitaulaga e fai o ia ma alii sili i alii sili o sa Levī, na te pule i e ua tausi le tausiga o le mea paia.
33Na tutupu mai ia Merari o le aiga o sa Maalī ma le aiga o sa Musē; o aiga ia o sa Merarī.
34O i latou foi na faitaulia, o le aofai o tane uma lava, e afua mai i e ua tasi lo latou masina atoa ma e ua matutua ai, e ono o afe ma le lua o selau.
35O le alii sili o le aiga o le tamā o aiga o sa Merarī, o Surielu lea o le atalii o Aviaila; e to lauapi i latou i le itu i matu o le malumalu.
36O le tofi o le fanauga a Merari latou te tausia laupapa o le malumalu, ma ona faalava, ma ona pou, ma ona lago, ma ana mea uma, ma mea uma e fai a‘i ona sauniga.
37O pou foi o le lotoā e iaataaliolio ai, ma o latou lago, ma o latou faamau, ma o latou maea.
38A o e to lauapi i luma o le malumalu i le itu i sasae, i luma lava o le fale fetafai o le faapotopotoga i le itu i sasae, o Mose lea, ma Arona, ma ona atalii, e tausi le tausiga o le malumalu ona o mea e tausia e le fanauga a Isaraelu; a o le tagata ese e faalatalata i ai e fasiotia lava ia.
39O sa Levī atoa uma e na faitaulia, o i latou na faitaulia e Mose ma Arona e tusa ma le afioga a Ieova, i o latou aiga, o tane uma lava, e afua mai i e ua tasi lo latou masina atoa ma e ua matutua ai, e lua sefulu o afe ma afe e lua.
40Ua fetalai mai foi Ieova ia Mose, Ina faitau mai ia o tane ulumatua uma lava o le fanauga a Isaraelu, e afua mai i e ua tasi lo latou masina atoa ma e ua matutua ai, ma e faitauina o latou igoa.
41Ia e au mai foi sa Levī e fai mo a‘u, (o a‘u o Ieova) e sui a‘i ulumatua uma lava o le fanauga a Isaraelu, o manu foi o sa Levī e sui a‘i ulumatua uma lava o manu a le fanauga a Isaraelu.
42Ona faitau mai ai lea e Mose, e pei ona poloai mai ai o Ieova ia te ia, o ulumatua uma lava o le fanauga a Isaraelu.
43O tane ulumatua uma lava, o le aofai o latou igoa, e afua mai i e ua tasi lo latou masina atoa ma e ua matutua ai, o i latou lava na faitaulia, e lua sefulu o afe ma afe e lua ma le lua o selau ma le fitu o sefulu ma le tolu.
44Ua fetalai mai foi Ieova ia Mose, ua faapea mai,
45Ina au mai ia o sa Levī e sui a‘i ulumatua uma o le fanauga a Isaraelu, o manu foi o sa Levī e sui a‘i a latou manu; e fai foi sa Levī mo a‘u; o a‘u lava o Ieova.
46A o i latou o le a faatauina e lua o selau ma le fitu o sefulu ma le tolu o ulumatua o le fanauga a Isaraelu o e ua sili ona toatele i sa Levī;
47e te talia mai ai e tailima a latou sekeli, o le sekeli lea a le malumalu e te talia mai ai; e luafulu o kire o le sekeli lea.
48O tupe foi e faatauina a‘i i latou ua sili i le faitau, e te foaiina atu ai ia Arona ma ona atalii.
49Ona talia mai ai lea e Mose o tupe o le tau o e na totoe na sil i e na suia e sa Levī.
50Ua talia mai e ia tupe mai ulumatua o le fanauga a Isaraelu; o sekeli e tasi le afe ma le tolu o selau ma le ono o sefulu ma le lima; o le sekeli lea a le malumalu.
51Ua avane foi e Mose o tupe o e na faatauina ia Arona ma ona Atalii, e tusa ma le afioga a Ieova, e pei ona poloai mai ai o Ieova ia Mose.
Who We AreWhat We EelieveWhat We Do
2025 by iamachristian.org,Inc All rights reserved.
