SALAMO, 22 - Samoan Old Version Bible

O LE SALAMO XXII.O le tagi o le ua atuatuvale; o le tatalo ia laveaiina; o le faafetai i le Atua.Ma le usu pese, i le aila o le taeao. O le salāmo a Tavita.

1Lo‘u Atua e, lo‘u Atua e, se a ea le mea ua e tuulafoai mai ai ia te ‘au, e taumamao ma lo‘u faaolataga, o upu foi o lo‘u faataio?

2Lo‘u Atua e, ou te valaau ia te oe i le ao, a e te le faafofogaina mai; atoa foi ma le po, ua ou le mapu lava.

3A o oe, e paia oe; o loo e tietie i viiga a Isaraelu.

4Na faatuatua ia te oe o matou tamā; na latou faatuatua, ua e laveai foi ia te i latou.

5Na latou alalaga atu ia te oe, ona laveaiina ai lea o i latou; na latou faatuatua ia te oe, ona le faamaina lea o i latou.

6A o a‘u, o le tuga lava a‘u, a e le se tagata; ua faalumaina a‘u e tagata, ma inosia a‘u e le nuu.

7Ua faatauemu mai ia te au o i latou uma ua vaai mai; ua faamamaga o latou gutu, ua lialiai o latou ulu, ua faapea mai,

8Na ia faalagolago ia Ieova; ia na faaola ia te ia; ia laveai o ia ia te ia, auā ua na fiafia ia te ia.

9A o oe, na e aumaia a‘u mai le manava; o oe na saogalemu ai a‘u ina ou susu i lo‘u tinā.

10Na tuuina atu a‘u ia te oe talu lo‘u fanau mai; o oe lava lo‘u Atua talu ina ou i le manava o lo‘u tinā.

11Aua ne‘i e taumamao ia te au, auā ua latalata mai le puapuaga; auā e leai sē fesoasoani mai.

12Ua siosiomia a‘u e povi poa e tele; o e malolosi i Vasana ua vagavagai mai ia te au.

13Ua faamamaga o latou gutu ia te au, e pei o le leona ua saei manu, ma ua tagi.

14Ua sasaaina a‘u e pei o le suāvai, ua see o‘u ivi uma; o lo‘u loto ua pei o le pulu, ua liu suāvai i totonu o lo‘u manava.

15Ua mago lo‘u malosi, e pei o le ta‘egāipu, ma ua pipii lo‘u laulaufaiva i lo‘u gutu; ua e tuuina a‘u i le eleele o le oti.

16Auā ua siosiomia a‘u e ulī; ua punitia a‘u e le vao tagata amio leaga; ua tu‘ia e i latou o‘u lima ma o‘u vae.

17Ou te mafaia ona faitau o‘u ivi uma; o i latou, ua latou vaavaai mai, ua matamata mai ia te au.

18Ua latou tufatufa o‘u ofu mo i latou, ma latou fai le vili i lo‘u ofu tino.

19A o oe, Ieova e, aua ne‘i e taumamao; lo‘u malosi e, ia e vave mai e fesoasoani mai ia te au.

20Ia e laveai ia te au ai le pelu, ia laveaiina a‘u ua toatasi mai le lima o le ulī.

21Ia faaola mai ia te au ai le gutu o le leona; ua e faafofoga mai ia te au mai nifo o rema.

22Ou te ta‘u atu lou suafa i o‘u uso; ou te vivii atu ia te oe i totonu o le faapotopotoga.

23O outou o e matatau ia Ieova, ina vivii atu ia ia te ia; o outou o le fanauga uma a Iakopo, ina vivii atu ia ia te ia; o outou o le fanauga uma a Isaraelu, ia outou fefefe ia te ia.

24Auā e le ta‘ufaatauvaa o ia, e le ‘ino‘ino foi o ia i le puapuaga o le ua puapuagaina; e le liliu ese foi e ia ona fofoga ia te ia; na tagi atu o ia ia te ia, ona faafofoga mai ai lea o ia.

25Ou te vivii lava ia te oe i totonu o le faapotopotoga tele; ou te avatua foi ia te ia i luma o e matatau ia te ia o mea na ou tauto ai.

26E aai o e matitiva, ma latou maoona ai; e vivii atu ia Ieova e ua sailiili ia te ia; e faalototeleina outou e faavavau.

27E manatunatu ifo ma liliu mai ia Ieova o tulu‘iga uma lava o le lalolagi; e ifo atu foi i ou luma aiga uma o nuu ese.

28Auā o loo ia Ieova le malo; o loo pule o ia i nuu ese.

29E aai ma ifo ia te ia atoa uma o e puputa i le lalolagi; e punonou i ona luma atoa uma o e ō ifo i le eleele, atoa ma le ua le faaola o ia ia te ia.

30E auauna ia te ia le fanau; e ta‘ua i latou e fai ma tupulaga mo le Alii.

31E o mai i latou, ma latou faaali lana amiotonu i le nuu o le a fanau mai, na faia lava e ia.