1E luafulu o tausaga o Aasa ina ua fai o ia ma tupu; o tausaga e sefulu ma le ono na fai ai o ia ma tupu i Ierusalema; a ua le faia e ia le amiotonu i luma o Ieova, e pei o Tavita lona tamā;
2a ua savali o ia i ala o tupu o Isaraelu, ua faia foi e ia o tupua uamea o Paala.
3Ua ia faamu foi mea manogi i le vanu o le atalii o Hinoma, ma susunu ana fanau i le afi, e tusa ma tu leaga a nuu ese na tulia e Ieova i luma o le fanauga a Isaraelu.
4Ua ia fai taulaga foi, ma faamu mea manogi i mea maualuluga, i luga foi o mauga, atoa ma lalo o laau lauolaola uma.
5Ona tuuina atu ai lea o ia e Ieova lona Atua i le lima o le tupu o Suria; ua latou fasia foi lana itu taua, ma ua latou ave faatagataotaua ni o latou o le vao tagata e toatele, ma avatu ai i Tamaseko. Ua tuuina atu foi o ia i le lima o le tupu o Isaraelu, ua fasia foi lana itu taua i le fasi tele.
6Ua fasia e Peka le atalii o Remalia i Iuta o tagata e selau afe ma afe e luafulu i le aso e tasi, o toa uma ia; auā ua tuua e i latou o Ieova le Atua o latou tamā.
7O Sekari le toa o Efaraima, ua ia fasiotia Maaseia le atalii o le tupu, ma Aserikama le pule i le aiga, ma Elekana le aupito ane i le tupu.
8Ua ave faatagataotaua e le fanauga a Isaraelu o latou uso e lua selau o afe, o fafine, o tama, ma teine, ma mea foi e tele ua vete ia te i latou, ma ua ave i Samaria mea na vetea mai.
9Sa i ai foi i lea mea o le perofeta a Ieova, o Oteta lona igoa; ua alu atu o ia i luma o ‘au na o mai i Samaria, ma ua faapea atu ia te i latou, Faauta, sa toasa Ieova le Atua o outou tamā ia Iuta, ua tuuina mai ai i latou i o outou lima, ma ua outou fasioti ia te i latou i le ita e pai atu i le lagi.
10O lenei foi, ua outou manatu e faapologaina le fanauga a Iuta ma Ierusalema e fai ma auauna tane ma auauna fafine ia te outou; e le o ia te outou ea, o outou lava, o agasala ia Ieova lo outou Atua?
11O lenei, ia outou faalogo mai ia te au, ma ia toe tuuina atu o tagata o taua ua outou au mai faatagataotaua o outou uso; auā ua i luga ia te outou le toasa tele o Ieova.
12O isi alii sili o le fanauga a Efaraima, o Asaraia le atalii o Ioanana, o Perekia le atalii o Meselemita, ma Iesekia le atalii o Saluma, ma Amase le atalii o Atalai, ua tulai i latou e finau ma i latou e na o mai i le taua,
13ua faapea atu ia te i latou, Tou te le au mai tagata o taua iinei; auā ua nofo sala i tatou ia Ieova, ua outou manatu e faaopoopo i a tatou agasala, ma lo tatou nofo sala; auā ua matua nofo sala i tatou, ua ia Isaraelu foi le toasa tele.
14Ona tuua lea e le ‘au tau o tagata o taua ma mea na vetea i luma o alii, atoa ma le faapotopotoga uma.
15Ona tulai ai lea o tagata ua ta‘ua o latou igoa, ma ua latou ave tagata o taua, ma faaofu ia te i latou uma e ua le lavalava i mea na vetea, ma faaofuina i latou, ma faaseevaeina i latou, ma fafaga ia te i latou, ma faainu ia te i latou, ma faauu ia te i latou, ma ua faatietie ia i latou uma e ua vaivai i luga o asini, ma ua avatu ai i latou i o latou uso i Ieriko, o le aai o pama; ona toe foi ai lea o i latou i Samaria.
16O ia ona po ua alu ai le sāvali a le tupu o Aasa i tupu o Asuria ia fesoasoani mai ia te ia.
17Auā sa toe o mai o sa Etomā ma latou fasia Iuta, ma latou ave tagata o taua.
18Na vetea foi e Filisitia o aai o nuu maulalo, ma le itu i toga o Iuta, na latou faoa foi o Petesemesa, ma Ailona, ma Kiterota, ma Suka ma ona faoa aai, ma Timena ma ona faoa aai, ma Kimeso ma ona faoa aai, ma latou nonofo ai.
19Auā na faatoilaloina e Ieova o Iuta ona o Aasa le tupu o Isaraelu; auā na leaga Iuta ia te ia, ma ua agasala tele atu ia Ieova.
20Ua sau foi ia te ia o Tikila-pilesa le tupu o Asuria, ma faatiga ia te ia, a ua le fesoasoani mai ia te ia.
21Auā na ave e Aasa o mea nai le fale o Ieova, ma le fale o le tupu, ma fale o alii, ua avatu ai i le tupu o Asuria; a ua na le fesoasoani mai ia te ia.
22O aso foi o lona puapuaga ua atili ai ona agasala atu o ia ia Ieova; o le tupu lea o Aasa.
23Ua ia fai taulaga foi i atua o Tamaseko o e na fasi ia te ia; ua ia faapea atu, Auā o atua o tupu o Suria o loo fesoasoani ia te i latou, ou te fai taulaga ia te i latou ina ia latou fesoasoani mai ia te au. A ua avea i latou ma mea e malaia ai o ia, atoa ma Isaraelu uma.
24Ua faapotopoto foi e Aasa o ipu uma o le fale o le Atua, ma ua tipitipi i ipu o le fale o le Atua, ma ua tapuni i faitotoa o le fale o Ieova, ua ia faia foi mo ia o fata faitaulaga i pito aai uma o Ierusalema.
25Ua faia foi e ia i aai taitasi uma o Iuta o mea maualuluga e faamu ai mea manogi i atua ese, ma na faaonoono ai ia Ieova le Atua o ona tamā.
26O toe o mea na faia e ia ma ana amio uma, o mea muamua ma mea mulimuli, faauta, ua tusia i le tusi i tupu o Iuta ma Isaraelu.
27Ua taoto foi Aasa faatasi ma ona tamā, ma ua latou tanumia o ia i le aai o Ierusalema; a ua le aumaia o ia i tuugamau o tupu o Isaraelu; ona soloai ane ai lea o Esekia lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
