MIKA, 3 - Samoan Old Version Bible

O LE MATAUPU III.O le upu e aoai atu i alii o le nuu ma perofeta pepelo.

1Sa a‘u faapea atu foi, Faafofoga mai ia outou matai o Iakopo, ma outou faipule o le aiga o Isaraelu, E le o ia te outou ea ona iloa le faamasinoga?

2O outou o loo ‘ino‘ino i mea lelei, ma fiafia i mea leaga, o loo outou sae ese o latou pa‘u, atoa ma aano i o latou ivi.

3O e aai foi i tino o lo‘u nuu, ma saeeseina o latou pa‘u, ma gauia o latou ivi, e vaevaea lava pei o mea e tuu i le ulo, pei o tufaaga foi i totonu o le pani.

4Ona latou alalaga atu ai lea ia Ieova, a e le faafofoga mai ai o ia ia te i latou; a e ‘alo ese ona fofoga ia te i latou i ia lava ona po, auā ua leaga lava a latou mea e fai.

5O loo faapea mai Ieova i perofeta o e faasese i lo‘u nuu, o e fēu i o latou nifo, ma latou alalaga atu, O le manuia; a o le ua le avane mea i o latou gutu, latou te sauni lava le taua ia te ia.

6O le mea lea e pogia ai outou ma le leai o se mea e vaaia, e oo foi le pouliuli ia te outou ma le leai o se iite; e goto foi le la i ia perofeta, e pogisa foi le ao ia te i latou.

7Ona masiasi ai lea o tagata vaai, e fememeai ai foi o e iite; latou te ufiufi foi i a latou ‘ava, o i latou uma lava, auā e leai se tali mai le Atua.

8A e peitai o a‘u, e moni lava, ua faatumuina a‘u i le mana e le Agaga o Ieova, o le faamasinoga foi, ma le malosi, e faailoa atu ai ia Iakopo o lana solitulafono, e faailoa atu foi ia Isaraelu o lana agasala.

9Ina faafofoga mai ia i le mea nei o outou matai o le aiga o Iakopo, ma outou faipule o le aiga o Isaraelu, o e ‘ino‘ino i le faamasinoga, ma faapiopio i mea tonu uma; o e ati ae Siona i le toto,

10ma Ierusalema i le amio leaga.

11O ona matai ua latou faamasino i le fia fai taui, o ana ositaulaga foi ua latou a‘oa‘o i le fia fai taui, ma ana perofeta ua latou iite i le fia fai tupe; a ua latou faalagolago ia Ieova, ma faapea ane, E le o ia te i tatou ea Ieova? e le oo mai se mea leaga ia te i tatou.

12O le mea lea e fai ai Siona ma fanua e suatia ona o outou, e fai foi Ierusalema ma faupuegāmaa, o le mauga foi o i ai le fale e fai lea ma mea maualuga i le vao matua.