1Ua faalogo le tupu fafine o Seepa i le tala ia Solomona, ona sau ai lea o ia i Ierusalema e tofotofo ia Solomona i upu faigata, sa ia te ia le au malaga e matuā toatele, ma kamela o au mai ai mea manogi, ma auro e matuā tele, ma maa tāua; na sau o ia ia Solomona, ona la tautalatala ai lea ma ia i mea uma na i ai i lona loto.
2Ua faamatalaina atu foi e Solomona ia te ia o ana upu uma; ua leai se mea e lilo ia Solomona na ia le ta‘u atu ia te ia.
3Ua iloa e le tupu fafine o Seepa o le poto o Solomona, ma le fale ua na faia,
4ma mea e ‘ai o i lana laulau, ma ona nonofo o ana auauna, ma le tutū o ana tautua, ma o latou ofu; o ana tautu uaina foi, ma o latou ofu; ma le ala na ia alu ae ai i le fale o Ieova; ona le toe ai lea o se loto ia te ia.
5Ona faapea mai lea o ia i le tupu, Ua moni le tala na ou faalogo ai i lo‘u nuu i au afioga ma lou poto;
6a e peitai na ou le talia a latou tala, ina seia ou sau, ma vaavaai i ai o‘u mata. Faauta foi, e itiiti mea na talaina atu ia te au, a e tele mea na le talaina atu i le tele o lou poto; auā e sili lava oe i le tala na ou faalogo ai.
7Amuia ou tagata, amuia foi au auauna nei, o e tutū i ou luma e le aunoa, ma faalogo i lou poto.
8Ia faafetaia Ieova lou Atua, o le na finagalo ia te oe, e faanofo ia te oe i lona nofoālii, e fai ma tupu mo Ieova lou Atua; auā na alofa lou Atua ia Isaraelu e faatumauina i latou e faavavau, o le mea lea ua ia fai ai oe ma tupu ia te i latou, ina ia e faia faamasinoga ma mea tonu.
9Ona foai mai lea e ia i le tupu o auro e tasi le selau ma le luafulu o taleni, ma mea manogi e matuā tele lava, atoa ma maa tāua; ua leai foi ni mea manogi e tusa ma mea na foaiina mai e le tupu fafine o Seepa i le tupu o Solomona.
10O auauna foi a Hiramo, ma auauna a Solomona, o e na au mai auro mai Ofeira, ua latou au mai laau o alemuka, ma maa tāua.
11Ua faia e le tupu o ala i le fale o Ieova, ma le fale o le tupu, ma kitara, ma napeli mo le au pepese i laau o alemuka; ua le iloa i le nuu o Iuta talu anamua ni laau faapena.
12Ona foai atu lea e le tupu o Solomona i le tupu fafine o Seepa o mea uma na ia finagalo ma faatoga i ai, e faaopoopo i mea na aumaia e ia i le tupu. Ona foi atu ai lea o ia, ma alu atu i lona nuu, o ia ma ana auauna.
13O le fua o le mamafa o auro na aumaia ia Solomona i tausaga taitasi, o taleni o auro e ono selau ma le onogafulu ma le ono;
14atoa foi ma auro na aumaia e i latou na feoai e faatau, atoa ma faatauoa. O tupu uma foi o Arapi, ma alii e pule i le nuu na au mai auro ma ario ia Solomona.
15Ona faia lea e le tupu o Solomona o talipupuni e lua selau i auro ua faasalalafaina; e taiono selau o sekeli auro ua faasalalafaina i talipupuni;
16ma talita e tolu selau i auro ua faasalalafaina; e taitolu selau o sekeli auro i talita. Ua tuuina atu ai e le tupu i le fale o le vao o Lepanona.
17Ua faia foi e le tupu le nofoālii tele i nifo o elefane, ua ia ufitia ai foi i le auro lelei.
18E ono tulagāvae faaapefai e alu ae ai i le nofoālii, ma le mea auro e tu ai ona vae ua faamauina i le nofoālii; sa i ai mea e faalagolago i ai i itu taitasi o le mea e tietie ai; na tutū foi leona e lua i tafatafa o mea e faalagolago i ai.
19Sa tutū ai foi leona e sefulu ma le lua i lea itu ma lea itu o tulagāvae faaapefai e ono; e leai se mea faapea e faia i se tasi malo.
20O ipu inu uma a le tupu o Solomona o auro ia, ma ipu uma o le fale o le vao o Lepanona o auro lelei ia. Sa leai ni ipu ario; ua ta‘ufaatauvaaina lava ario i ona po o Solomona.
21Auā o vaa o le tupu na folau atu ma auauna a Hiramo i Tasesa, na foi faatasi i tausaga e tolu o vaa Tasesa ma au mai ai auro, ma ario, ma nifo o elefane, ma kofi, ma tuki.
22Ua silisili le tupu o Solomona i tupu uma o le lalolagi i le mauoa ma le poto.
23Ua saili atu foi ia Solomona o tupu uma o le lalolagi e faalogo i lona poto na tuuina mai e le Atua i lona loto.
24Na taitasi i latou ma au mai lana mea alofa, o ipu ai, ma ipu auro, ma ofu, o auupega, ma mea manogi, o solofanua, ma falata, i lea tausaga ma lea tausaga.
25Sa ia Solomona e fa afe o mea e tuu ai solofanua ma kariota; ma ‘au e tietie i solofanua e sefulu afe ma afe e lua; na ia tuuina i latou i aai o kariota, ma Ierusalema faatasi ma le tupu.
26Na pule foi o ia i tupu uma, e gata mai i le vaitafe, e gata mai foi i le nuu o Filisitia e oo i le tuaoi o Aikupito.
27Na faateleina e le tupu i Ierusalema o ario ua faapei o maa, na ia faateleina foi o arasi ua faapei o sukamoru i le fanua maulalo.
28Na latou aumaia ia Solomona o solofanua mai Aikupito, ma nuu uma.
29O toe o mea na faia e Solomona, o mea muamua ma mea mulimuli, ua le tusia ea i le tala a Natano le perofeta, ma le valoaga a Akia o le Sailo, ma le faaaliga ia Itu le tagata vaai ia Ierepoamo le atalii o Nepata.
30O tausaga e fa sefulu na fai ai Solomona ma tupu ia Isaraelu uma i Ierusalema.
31Ona taoto ai lea o Solomona faatasi ma ona tamā, ua tanu foi o ia i le aai a Tavita lona tamā; ona soloai ane ai lea o Reopoamo lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
