1Ina faalogologo mai ia i lenei mea o outou nuu uma; ina uai mai ia o outou taliga o outou uma o e nonofo i le lalolagi;
2o tagatānuu atoa ma alii; o e tamaoaiga faatasi ma e matitiva.
3E tautala lo‘u gutu i le poto; e atamamai foi mafaufauga o lo‘u loto.
4Ou te uai atu o‘u taliga i le faataoto, ou te faamatala a‘u upu lilo i le kitara.
5Se a le mea ou te fefe ai i aso vale, pe a vagavagaia mai a‘u e le agasala a e lamalama ia te au?
6O i latou o e faatuatua i o latou oa, ma mitamita i latou ona o le tele o a latou oloa;
7e le mafaia lava e so latou ona faatau i lona uso, pe avatu i le Atua se togiola mo ia,
8(auā e matuā faigata le togiola o latou agaga, e le mafaia lava ia e faavavau;)
9ina ia ola pea ia e faavavau; ia le iloa e ia le tuugamau.
10Auā ua iloa e ia e oti tagata popoto, e fano foi le tagata valea atoa ma le vale; ona tuua lea e i latou a latou oa mā nisi.
11O lo latou taofi, e faavavau o latou fale, ma mea e mau ai i latou e augātupulaga ia; ua faaigoa e i latou o latou fanua i o latou lava igoa.
12A e le tumau le tagata i lona lelei; e tusa i latou ma manu ona fano.
13O lo latou ala lenei, o lo latou lea valea; a ua fiafia e ua mulimuli ia te i latou i a latou upu. Selā
14Ua tuuina atu i latou e pei o mamoe i le tuugamau; e ‘aina i latou e le oti; e pule e ua amiotonu ia te i latou i le taeao; e mavae lo latou matagofie i le tuugamau, mai le mea latou te mau ai.
15A e peitai e faaola e le Atua lo‘u agaga ai le pule a le tuugamau; auā na te talia mai a‘u. Selā.
16Aua e te fefe pe a faatamaoaigaina se tasi, pe a faateleina le mamalu o lona aiga;
17auā e leai se mea na te avea pe a oti o ia; e le mulimuli ifo ia te ia lona mamalu.
18E ui ina faaamuia atu o ia i lona agaga ina o ola o ia; e viia foi oe pe a e agalelei oe ia te oe;
19E oo lava ia i le tupulaga o ona tamā; e le iloa e i latou le malamalama e oo i le faavavau.
20O tagata o loo i le lelei, a e le mafaufau, e tusa i latou ma manu ona fano.
Who We AreWhat We EelieveWhat We Do
2025 by iamachristian.org,Inc All rights reserved.
