1Ua matou te‘a ma i latou, ona tuuvaa atu lea ma folau tonu atu i Ko, o le taeao foi ua oo ai i Roto, ona toe o atu ai lea i Patara.
2Ua maua foi le vaa o le a folau atu i, Foinie, ona matou o ai lea, ua tuuvaa atu.
3Ua matou iloa atu Kuperu, ma tuanai ane i ai i le itu tauagavale, ona folau atu lea i Suria, ma matou o ae i uta i Turo; auā e avae ai le uta a le vaa.
4Ua maua foi e i matou nisi soo, ona matou nonofo ai lea i aso e fitu; ua latou fai mai ia Paulo i le Agaga, aua ne‘i alu ae i Ierusalema.
5Ua uma ia aso ia te i matou, ona matou o lea, ma o atu; ua momoli i matou e i latou uma, atoa ma avā ma fanau, ua oo i tua o le aai; ona tootuli lea o i matou i le matafaga, ua tatalo.
6Ua uma ona taumāvae, ona o ae lea o i matou i le vaa; a ua toe foi atu i latou i o latoū.
7Ua matou o mai i Turo ua oo i Tolumai, ua gata ai la matou folauga, ona matou fealofani lea ma le au uso, e tasi lo matou aso sa nonofo ai ma i latou.
8O le taeao ua o atu ai i matou o le au malaga a Paulo, ua oo i Kaisareia; ua matou ulu atu i le fale o Filipo lē folafola le tala lelei, o le tasi o ia o le toafitu; ua matou nonofo foi ia te ia.
9Sa i lenei tagata afafine e toafa, o taupou, o e perofeta.
10Ua tele aso o matou o nonofo ai, ona sau lea o le tasi perofeta mai Iutaia, o Akapo le igoa.
11Ua oo mai o ia ia te i matou, ona to ae lea o le fusi o Paulo, ma fusifusi ifo i ona lava lima ma vae, ua fai mai, O loo faapea mai le Agaga Paia, E faapea ona fusifusi i Ierusalema e Iutaia le tagata e ona lenei fusi, ma latou tuu atu ia te ia i lima o nuu ese.
12Ua faalogo atu i matou i na upu, ona aioi atu lea o i matou, atoa ma i latou o lea nuu, e aua le alu ae o ia i Ierusalema.
13A ua tali mai Paulo, Tou te fetagisi ma faatiga tele mai lo‘u loto i se a? auā ua ou sauni lava a‘u e le gata ina fusifusia, a ia ou oti lava i Ierusalema, ona o le suafa o le Alii o Iesu.
14Ua le mafaia o ia, ona faalologo lea o i matou, ua faapea ane, Ina faia ia le finagalo o le Alii.
15Ua mavae ia aso, ona taoso lea o i matou, ma o ae i Ierusalema.
16Ua o foi ma i matou nisi soo mai Kaisareia; ua au mai ma i latou le tasi tagata Kuperu, o Nasona, o le soo mai anamua, matou te api ma ia.
17Ua oo foi i matou i Ierusalema, ona talia mai lea o i matou e le au uso ma le fiafia.
18O le taeao ua o atu ai Paulo ma i matou ia Iakopo; ua i ai foi toeaina uma.
19Ua fealofani o ia ma i latou, ona laulau tasi atu lea e ia mea uma lava na faia e le Atua i nuu ese i lana galuega.
20Ua faalogo ai i latou, ona vivii lea o i latou i le Alii; ua fai atu foi ia te ia, Lo matou uso e, ua e iloa ia mano e tele o Iutaia ua faatuatua; o loo maelega foi uma lava i latou i le tulafono.
21Ua talaina oe ia te i latou, ua e a‘oa‘o atu ia Iutaia uma i nuu ese ia latou lafoai ia Mose, ua e vavao le peritomeina o a latou fanau, ma le anaana i ia tu.
22O lenei, pe faapefea? e faapotopoto mai lava le toatele; auā o le a faalogo i latou ua e sau.
23O lenei, e te faia lenei mea matou te fai atu ai ia te oe; o loo ia i matou tagata e toafa ua fai la latou tautoga;
24ia e faatasi mai ia te i latou, ma ia e faamamā ia te oe faatasi ma i latou, ma e avane ni oloa mo latou, ina ia latou tafi i o latou lauulu, e iloa ai e tagata uma e le moni se tasi mea o ia mea ua talaina ai oe ia te i latou; a ua tusa lau lava amio ma le tulafono.
25A e peitai o nuu ese e ua faatuatua, ua matou tusi i ai ua pule atu, aua le anaana i latou i se mea faapea, tau lava ona ia mamao i latou i taulaga i tupua, ma le toto, ma mea ua titina, ma le faitaaga.
26Ona ave lea e Paulo o ia tagata, o le taeao foi ua faamamāina ai o ia faatasi ma i latou ua ulufale atu i le malumalu, ua faailoa atu le faaiuina o aso o le faamamāina seia fai ni taulaga mo i latou, o le tagata ma lana taulaga.
27Ua tāli uma ona aso e fitu, ua vaavaai Iutaia mai Asia ia te ia i le malumalu, ona ului atu lea o i latou i le motu o tagata uma, ma latou pue ia te ia, ua alalaga,
28Sema e, o outou Isaraelu e, fesoasoani mai ia. O le tamaloa lenei, na te aoao atu i tagata uma i mea uma lava ia liliu ese i lenei nuu, ma le tulafono, ma lenei mea; ma ua au mai Eleni i le malumalu, ma ua soli e ia lenei mea paia.
29(Auā na muai iloa e i latou ia Tofimo le Efeso sa faatasi ma ia i le aai fa te i latou ua aumaia o ia e Paulo i le malumalu.)
30Ua vevesi foi le aai uma lava, ua femo‘ei mai ai le nuu; ua pue foi i latou ia Paulo, ma toso ia te ia i fafo o le malumalu; ona punitia loa lea o faitotoa.
31O loo naunau i latou e fasioti ia te ia, a ua logo ae i le alii e pule i ‘au, ua matuā lolofi mai Ierusalema uma lava.
32Ona au mai loa lea e ia o ‘au ma ta‘ita‘i o toaselau, ua momo‘e ifo ia te i latou; ua latou iloa atu foi le alii e pule i ‘au ma ‘au, ona tuu lea e i latou o lo latou taufaitu‘i ia Paulo.
33Ona faalatalata mai lea o le alii e pule i ‘au, ua pue mai ia te ia, ma fai ane ia fusifusia o ia i maea uamea se lua; ua fesili mai po o ai o ia, pe se a foi le mea ua na faia.
34Ua alalaga mai foi nisi o le motu o tagata i le tasi mea, ma nisi i le tasi mea; ua le mafai ona iloa e ia le tonu ona o le taalili vale, ona fai ane lea o ia ia ave ia te ia i le ‘olo.
35Ua oo foi o ia i le ala faaapefai, ua iu ina avae o ia e le ‘au, ona o le faamalosi mai o le motu o tagata.
36Auā ua mulimuli mai le motu o tagata, ma alalaga mai, Aveese ia te ia.
37O le a ta‘ita‘iina Paulo i le ‘olo, ua fai atu o ia i le alii e pule i ‘au, Pe tusa ona ou fai atu se upu ia te oe? Ua fai mai o ia, Ua e iloa ea le upu Eleni?
38E le o oe ea lea tagata Aikupito, le na faatupu le fouvale i ona po ua mavae, ma ta‘ita‘i tagata faasaua e toafa afe i le vao?
39A ua fai atu Paulo, O a‘u lava o le tagata Iutaia, o le Taso i Kilikia, e le se nuu faatauvaa lo‘u nuu; ou te aioi atu foi ia te oe, ia e tuu mai ia te au so‘u tautala atu i le nuu.
40Ua tuu mai foi o ia ia te ia, ona tu lea o Paulo i le ala faaapefai, ua tālo atu lona lima i le nuu. Ua matuā faalologo, ona tautala atu lea o ia i le upu Eperu, ua faapea atu.
Who We AreWhat We EelieveWhat We Do
2025 by iamachristian.org,Inc All rights reserved.
