ROMA, 4 - Samoan Old Version Bible

O LE MATAUPU IV.Na ta‘uamiotonuina Aperaamo i le faatuatua.

1O lenei, pe se a sa tatou upu i mea na maua i la le tino e lo tatou tamā o Aperaamo?

2Auā ana ta‘uamiotonuina Aperaamo i galuega, po ua ia te ia se mea e mitamita ai; a ua leai i luma o le Atua.

3Auā se a ea ua fai mai ai le Tusi? Na faatuatua Aperaamo i le Atua, ona ta‘ua ai lea ia te ia e fai ma amiotonu.

4A o le totogi o le faigaluega, e le ta‘ua lea o le alofa tunoa, a o le taui lava.

5A o le ua le galue, a e faatuatua i le na te ta‘uamiotonuina le ua faalemata‘u, ua ta‘ua lona faatuatua o le amiotonu.

6Faapei ona faaamuia foi e Tavita o le tagata ua ta‘ua i ai e le Atua le amiotonu, e le o i ai galuega,

7Amuia e ua faamagaloina o latou solitulafono, ma ua ufitia a latou agasala.

8Amuia le tagata e le ta‘usalaina o ia e le Alii.

9O lenei, pe gata ea i le ua peritomeina lenei faaamuia? e le oo foi ea i le ua le peritomeina? Auā ua faapea i tatou, Ua ta‘ua le faatuatua o Aperaamo o le amiotonu.

10Pe na ta‘ua ina ua a? ina ua peritomeina ea o ia, pe lei peritomeina? E lei ta‘ua ina ua peritomeina, a ua ta‘ua ina ua le peritomeina.

11Ua na maua foi le faailoga o le peritome, o le faamaoni mai lea o le amiotonu i le faatuatua a o lei peritomeina o ia; ina ia avea o ia ma tamā o e faatuatua uma lava o e le peritomeina; ia ta‘uamiotonuina i latou foi;

12ia fai foi ma tamā o e ua peritomeina, e le gata lava i e ua peritomeina, a e peitai o e savavali i tulagāvae o le faatuatua o lo tatou tamā o Aperaamo, a o lei peritomeina o ia.

13Auā e lei folafolaina atu ia Aperaamo, po o lana fanau, e fai mona tofi le lalolagi i le tulafono, a e maua i le amiotonu ua i le faatuatua.

14Auā pe afai ua tofia e ua i le tulafono, ua faaleaogaina ai le faatuatua, ua faaleina foi le folafolaga.

15Auā o le tulafono e tupu mai ai le toasa; auā pe a leai se tulafono, ua leai sē soli i ai.

16O le mea lea e maua ai i le faatuatua le mea na folafolaina, ina ia maua i le alofa tunoa; ina ia tumau lea i le aiga uma lava, e le tuli i le ua i le tulafono a e oo i le ua i le faatuatua o Aperaamo, o le tamā o ia o i tatou uma lava,

17(pei ona tusia, Ua ou tofia oe e fai ma tamā o nuu e tele,) i luma o le Atua, o lea na ia faatuatua i ai, o le faaola ia o e ua oti, ma le na te valaauina mea ua leai, peiseai ua i ai.

18Na ia faatuatua ma le faamoemoe, (a ua leai se mea e faamoemoe i ai,) ina ia avea o ia ma tamā o nuu e tele, pei ona fetalaia mai, E faapea lava lau fanau.

19E lei vaivai foi lona faatuatua, e lei manatu foi i lona tino ua oti, po ua selau ona tausaga, ma le manava foi o Sara ua oti;

20e lei masalo vale ia ma le le faatuatua i le mea na folafolaina e le Atua, a ua malosi tele o ia i le faatuatua ua vivii atu i le Atua,

21ua na mautinoa foi, e mafai ia te ia ona faia o le mea na folafolaina e ia.

22O lea foi ua ta‘ua ai lona faatuatua o le amiotonu.

23A e lei tusia ona o ia lava, Ua ta‘ua ia te ia;

24peitai ona o i tatou foi, o le a ta‘ua i ai, o i tatou o e faatuatua i le na faatu mai i lo tatou Alii o Iesu nai e ua oti;

25na tuuina mai o ia ona o a tatou agasala, ma toe faatuina mai ina ia ta‘uamiotonuina ai i tatou.