FAATAOTO, 24 - Samoan Old Version Bible

O LE MATAUPU XXIV.

1Aua e te losilosi i tagata amio leaga; aua foi e te fia toaga ia i latou.

2Auā ua mafaufau o latou loto i le sauaga; ua tautalatala o latou laugutu i mea e faatiga ai.

3Ua atiina ae le fale i le poto; a e faamausaliina i le faautauta;

4o le poto foi e tutumu ai afeafe i oloa uma lava e tāua ma le matagofie.

5O le tagata poto ua malosi ia; ma le tagata atamai e tupu lona malosi;

6auā o le filifili lelei e te fai ai lou taua; o le toatele foi o faipule e saogalemu ai.

7Ua maualuga le poto i le vale; na te le tautala lava i le faitotoa.

8O le ua mafaufau e fai mea leaga, e ta‘ua o ia o le tagata fai togafiti leaga.

9O le manatu o le vale o le agasala lea; e inosia foi e tagata le ua faatauemu.

10Afai e te faavaivai i le aso vale, ua itiiti lava lou malosi.

11Ia e laveai i e ua puea ia oti, ma ē a oo ina fasia.

12Afai e te faapea, Faauta, matou te lei iloa lenei tagata; o le ua fuatia loto, na te le lagona ea? o le ua tausia lou agaga, na te le silafia ea? na te le taui atu ea i le tagata e tusa ma lana galuega?

13Lo‘u atalii e, ia e ‘ai i le meli, auā e lelei; atoa ma le meli sisina, e suamalie i lou gutu;

14ia e iloa, e faapea foi le poto i lou agaga; afai ua e maua, ona i ai lea o le iuga; e le iu vale foi lou faamoemoe.

15Le tagata amio leaga e, aua e te lamalama i le mea e nofo ai le tagata amiotonu; aua e te faatafunaina le mea e taoto ai o ia.

16Auā e atu fitu ona paū lē amiotonu, a e toe tu o ia; a o e amio leaga, e pauu i latou i le malaia.

17A paū le ua ita ia te oe, aua e te fiafia i ai; a tausuai foi o ia, aua le olioli ai lou loto;

18ne‘i silafia e Ieova, ona leaga ai lea i ona luma; ma na faaliliu mai lona toasa ai ia te ia.

19Aua e te faameo i e ua fai mea leaga; aua foi e te losilosi i e amio leaga.

20Auā e le iu i se lelei le ua amio leaga; e tineia le lamepa a e amio leaga.

21Lo‘u atalii e, ia e mata‘u ia Ieova atoa ma le tupu; aua e te fefaauoai ma ē feliuliuai.

22Auā e faafuasei ona tulai mai o lo latou mala; o ai foi se na te iloa le malaia mai ia te i laua uma?

23E i ai foi nei mea i e popoto. O le faailogaina o tagata i le faamasinoga e le lelei lea.

24O le ua fai atu i lē amio leaga, O oe le amiotonu; e fetuuina o ia e le nuu; e faafanoina o ia e tagata.

25A o e ua aoai atu ia te ia, latou te fiafia; e oo ia i latou le faamanuia e lelei ai.

26E taufeasogi tagata uma ma le ua tali atu i upu tonu.

27Ia sauniuni i fafo lau galuega, ma ē teuteu ai i le vao; mulimuli ane, ona e faia lea o lou fale.

28Aua ne‘i fai fua oe ma molimau i lē lua te tuaoi; e te pepelo ea i ou laugutu?

29Aua ne‘i e faapea ane, E pei ona faia e le tagata ia te au, e faapea lava ona ou faia ia te ia; ou te taui atu ia te ia e tusa ma lana mea ua fai.

30Na ou alu ane i le fanua o le tagata paie; ma le tovine o le tagata ua leai se mafaufau;

31faauta foi, ua tutupu ae ua soo lava i laau tuitui, ua ufitia uma lava i le vao ogoogo, ma lana pa maa ua solo.

32Ona ou vaavaai lava lea, ma ou matuā manatunatu; ua ou iloa, ma ua a‘oa‘oina ai a‘u;

33se‘i toe itiiti sina moe, toe itiiti se matămoe, toe itiiti se piilima e taoto ai.

34A e oo mai lou mativa e pei o le malaga; ma lou le tagolima pei o le tagata ua sauni lana auupega.